У сталіцы ў 2024 годзе зʼявіцца некалькі новых ГЦ. Калі гэта адбудзецца, то буйнафарматных гандлёвых цэнтраў у Мінску будзе амаль сто, а агульная колькасць плошчаў стане большай за 1 млн 640 тыс. квадратных метраў. Па гэтым паказчыку беларуская сталіца супастаўная з суседнімі краінамі. Office Life разам з аналітыкам «Коліерз Інтэрнэшнл Кансалтынг» Дзмітрыем Солавых распавядае, што гэта за цэнтры і дзе яны зʼявяцца.
ГЗЦ «Чэрвеньскі»
Дзе: на скрыжаванні вуліц Маякоўскага і Аранскай на месцы былога Чэрвеньскага рынку.
Што будзе? Гандлёвы цэнтр дабудоўвае кампанія «Сільвер Капітал». З месцам і аб'ектам звязаная легендарная гісторыя. Яшчэ ў пачатку XX стагоддзі тут з'явіўся рынак, а ў савецкі час ён стаў адным з найбуйнейшых. У 2013 годзе яго перанеслі ў мікрараён Лошыца, а тут іранскі забудоўшчык хацеў узвесці ГЗЦ Didas. У выніку інвестар адмовіўся ад праекту па эканамічных прычынах, а пляцоўку вярнулі гораду. «Сільвер Капітал» змагаўся за яе на аўкцыёне.
ГЗЦ «Чэрвеньскі» размесціцца на 43,6 тыс. квадратных метраў. Тут будуць падземны і наземны паркінг на 1 тыс. машынамесцаў. Якарнай прадуктовай крамай стане Green. Таксама плануюцца магазіны вядомых аператараў бытавой тэхнікі, спорттавараў, адзення, абутку, тавараў для дзяцей, фуд-корт і дзіцячы забаўляльны цэнтр.
«Сільвер Капітал» уваходзіць у інвестыцыйную групу «РАПА», якая кіруе гіпермаркетамі Green. «РАПА» — праект бізнесмена Генадзя Кірэйкова. Ён на 28-м месцы ў топ-100 паспяховых бізнесменаў Беларусі, складзеным выданнем «Беларусы і рынак».
ГЗЦ Prizma
Дзе: побач са станцыяй метро «Партызанская» на Партызанскім праспекце, 77а.
Што будзе? Аб'ект будуе кампанія «Сігмаполюс». Забудоўшчык вядомы ўзведзеным у цэнтры Мінска шматфункцыянальным комплексам з бізнес– і гандлёва-забаўляльным цэнтрам «Тытан», бізнес-цэнтрамі «Хваля» і «Талбухіна, 3 А», і іншымі. Таксама група кампаній нядаўна за $7,8 млн купіла даўгабуд ГЗЦ «Мега Парк».
У ГЗЦ Prizma, дзе больш за 22 тыс. квадратных метраў гандлёвых плошчаў, будуць супермаркет «ГІПА», магазін электронікі і тавараў для дома «5 элемент», пякарня Pate, медцэнтр, аптэкі, зоамагазіны, магазіны адзення і абутку. Таксама адкрыюць фуд-корт, кавярню, кінатэатр і «Актывіці парк» на 3 тыс. квадратных метраў. У ГЗЦ будзе чатыры ўзроўні. У офіснай частцы — больш за 14 тыс. квадратных метраў. Уся плошча комплексу — 70 тыс. квадратных метраў.
ГЦ «Гудвіл»
Дзе: на скрыжаванні Шаранговіча і Гарэцкага ў Сухарава.
Што будзе?У ГЦ будуць магазіны, фуд-корт, паркінг, фітнес-цэнтр, аб'екты медыцынскага прызначэння і офісы, а таксама дзіцячы забаўляльны цэнтр. Канкрэтныя брэнды і якарныя аб'екты пакуль не называюцца. Агульная плошча — 8,5 тыс. квадратных метраў, гандлёвая — 4,3 тыс. квадратных метраў.
Забудоўшчык аб'екта — «Віранэс». У свой час ён узвёў ГЦ «Магніт» на праспекце Дзяржынскага і ў мікрараёне Сухарава.
Адкрыццё чакалі ў 2023 годзе, але гэтага не адбылося.
ГЗЦ AVIA MALL
Дзе: праспект Міра, 3, у квартале Minsk World.
Што будзе? Аб'ект узводзіць забудоўшчык Dana Holdings. Плануецца, што з вестыбюля станцыі метро «Аэрадромная» можна будзе ўвайсці ў ГЗЦ. Комплекс размесціцца на месцы ўзлётных палос першага беларускага аэрапорта. У Avia Mall будуць крамы, кінатэатр, фітнес-цэнтр і вялікі фуд-корт. Якарным прадуктовым гіпермаркетам стане Green.
ГЗЦ зойме 136 тыс. кв.
Якія яшчэ ГЦ чакаць у Мінску
У пачатку студзеня на аўкцыёне купілі недабудаваны ГЗЦ «Мега Парк». Калі яго ўвядуць у эксплуатацыю, не зразумела, але ў аб'екта высокая ступень гатоўнасці. Таксама на скрыжаванні вуліц Нямігі і Карла Лібкнехта будуюць ГЗЦ Sigma. Яго адкрыццё чакаецца ў 2025 годзе.
У ГЦ Green City на Прытыцкага, 156 пачаліся будаўнічыя работы па павелічэнні гандлёвых плошчаў.
Каментары