Беларускія календары на 2024 год: фантастычны выбар як унутры Беларусі, так і за мяжой
Мы знайшлі інфармацыю пра дванаццаць выданняў, але, магчыма, не ўсе заўважылі. Вялізны выбар календароў на наступны год, да якога застаецца нейкі там месяц з хвосцікам.
Адрыўны каляндар «Мова вольных» прапануе слоўнічак беларускай мовы з перакладам розных слоў на англійскую і яшчэ паўсотні іншых моў. Да 25 лістапада па перадзаказе можна набыць каляндар за 89 злотых (73 рублі), а пасля ўжо давядзецца выкласці 99 злотых (82 рублі). Дасылаць календары пачнуць 1 снежня.
Свой насценны каляндар прапаноўвае і праект «Нішо», які стварае адкрыты слоўнік беларускага слэнгу. За папяровую версію, на якую можна зрабіць перадзаказ, давядзецца выкласці 25 еўра (90 рублёў). Але PDF-версію календара, якую пасля можна раздрукаваць, можна атрымаць прама цяпер усяго за 5 еўра (18 рублёў).
Адрыўны «Простыя крокі», прэзентаваны Oz.by, знаёміць з беларускай мовай і культурай. На старонках прыводзяцца простыя парады, як дакрануцца да беларускай мовы ў паўсядзённым жыцці, каля 500 беларускіх слоў, аб'яднаных у тэматычныя слоўнікі, моўныя гульні, якія дапамогуць весела бавіць час з сям'ёй і сябрамі, вершы, матывацыйныя выслоўі, а таксама кароткія біяграфіі выбітных беларусаў ад Рагнеды да Васіля Быкава. Каляндар можна набыць на сайце за 65 руб.
Адрыўны каляндарык «Лёгкая Мова» выходзіць ужо не першы год. Сёлета зноў на кожнай з 366 сваіх старонак (наступны год будзе высакосным) ён будзе знаёміць з самабытнымі беларускімі словамі, фразеалагізмамі, прымаўкамі, цытатамі і скарагаворкамі з перакладам на англійскую і рускую мовы. На старонках таксама змешчаны яскравыя карцінкі і прыклады ўжывання слоў і выразаў у мастацкай літаратуры.
Кожны каляндарык змяшчаецца ў падарункавую скрынку, у камплекце да яго таксама ідуць магніцікі для мацавання ўпадабаных старонак на халадзільнік.
Кошт календара складае 50 руб., пры заказе ад 10 штук можна атрымаць зніжку 10%. Заказаць можна як у Беларусі, так і за мяжу.
Адрыўны каляндар з аптымістычнай назвай «Мой шчаслівы год» прапаноўвае выдавецтва «Папуры». Лісты, аформленыя ілюстрацыямі і цытатамі на кожны дзень, пасуюць таксама для штодзённых запісаў. Каляндар распаўсюджваецца з падарункавай скрынкай і мае падстаўку на магнітах.
Каляндар за 60,28 руб. можна заказаць на Wildberries.
Дзяржаўнае выдавецтва «Беларусь» прапаноўвае класічны адрыўны каляндар «Родны край», у якім на старонках надрукаваныя цікавосткі пра Беларусь, яе гісторыю, культуру, прыроду, юбілейныя даты айчынных вучоных, пісьменнікаў, актораў, мастакоў і архітэктараў, традыцыйныя абрады і звычаі, аповеды пра чырванакніжную флору і фаўну, парады псіхолагаў, педагогаў, садаводаў і агароднікаў, а таксама рэцэпты прыгатавання страў нацыянальнай і сусветнай кухні.
Цана календара, які можна набыць у крамах, складае ўсяго 8 руб.
Насценны каляндар «Мая нябачная Беларусь», аформлены 12 акварэлямі мастачкі Марыі Каралёвай, прысвечаных страчанай архітэктурнай спадчыне Беларусі. Велічныя храмы і сядзібы суправаджаюцца кароткімі гістарычнымі даведкамі.
Каляндар за 15 руб. можна заказаць у інтэрнэт-краме з дастаўкай.
Краязнаўчым выдавецтвам «Рыфтур» падрыхтаваны адразу два насценныя календары ў серыі «Планета Беларусь» — па гістарычных і прыродных мясцінах, як напісана на вокладках, для вашых падарожжаў.
На старонках першага календара прадстаўлены галоўныя архітэктурныя цікавосткі краіны — гарадзішчы, замкі, цэрквы і касцёлы, паказаныя з вышыні птушынага палёту. Другі каляндар паказвае найбольш дзікія куткі Беларусі, прыроду нацыянальных паркаў, заказнікаў і запаведнікаў з выявамі характэрных для гэтых тэрыторый птушак ці звяроў. Усе здымкі выкананы прафесійным фотамастаком Сяргеем Плыткевічам, які кіруе выдавецтвам.
Набыць календары за 22,41 руб. можна ў каталогу «Планета Беларусь».
Найбольш беларускіх календароў, здаецца, было выпушчана выдавецтвам «Тэхналогія».
Адным з такіх з'яўляецца каляндар «Лапы і крылы» з фотаздымкамі беларускіх звяроў і птушак на кожны месяц, зробленымі Інай Субоцінай. На кожнай старонцы разам з фота звяроў змешчаны беларуская і лацінская назвы.
Насценны каляндар-постар аформлены ілюстрацыяй з серыі «Талонапіс» мастака Багдана Даўгялы можна набыць за 4 рублі.
Яшчэ адзін насценны каляндар «Гарады і людзі» таго ж аўтара, аформлены дэталізаванымі гарадскімі пейзажамі, якія можна разглядаць бясконца, прадаецца за 7,65 руб.
Арыгінальны настольны каляндар прапаноўвае мастак Віталь Назарэвіч, які аформіў яго выцінанкамі на марскую тэматыку, створаныя ім у 2020 годзе падчас жыцця на Чорным моры. Заказаць можна непасрэдна на старонцы ў мастака.
«Наша Нiва» — бастыён беларушчыны
ПАДТРЫМАЦЬ
Каментары