Як у Францыі спрабуюць абмежаваць доступ непаўналетніх да парнаграфіі
Як піша Le Monde, жаданне ўрада Францыі, як і іншых краін, прымусіць платформы з парнаграфічным зместам правяраць узрост сваіх наведвальнікаў цяжка рэалізаваць, бо дагэтуль няма эфектыўнага тэхнічнага рашэння.
Французскі ўрад хоча абмежаваць доступ да сайтаў для дарослых, каб абараніць дзяцей ад непажаданага кантэнту. Для гэтага ён патрабуе ад такіх інтэрнэт-платформаў увесці сістэму праверкі ўзросту. Калі сайты не зробяць гэтага, яны могуць быць заблакаваныя судом ці рэгулятарам.
Але, як адзначае Le Monde, палітычная воля ўпіраецца ў сцяну тэхнічных праблем.
З тым самым сутыкнуліся ў Вялікабрытаніі, дзе некалькі ўрадаў пачынаючы з 2017 года спрабавалі рэалізаваць падобную ідэю. Нягледзячы на поўны палітычны кансэнсус у дачыненні да ўвядзення блакавання парнаграфічных сайтаў для непаўналетніх, праект абмяркоўваўся чатыры гады, і гэтае абмеркаванне нічым не скончылася.
З тым самым сутыкнулася і Германія.
Сапраўды, як вызначыць узрост інтэрнэт-карыстальнікаў і пры гэтым не парушыць іх ананімнасць?
Як піша Le Monde, вызначыць узрост без ідэнтыфікацыі асобы немагчыма. Карыстальнікі не будуць паказваць порнасайтам копію пашпарта.
Адзінае рашэнне — працэдура «двайной ананімнасці», у якой удзельнічае «давераная асоба», якая правярае, што чалавек сапраўды паўналетні, і перадае гэтую інфармацыю порнасайту, напрыклад, з дапамогай кода, не раскрываючы яго асобу.
Журналісты згадваюць, што ў Вялікабрытаніі было разгледжана паўтузіна такіх рашэнняў. Адзін з праектаў планаваў продаж «кодаў доступу», якія пацвярджаюць паўналецце асобы, у крамах або ў праграме, што скануе ваш твар, каб вызначыць, непаўналетні вы ці дарослы.
Адзін з самых паспяховых інструментаў нават прапанавала холдынгавая кампанія MindGeek, якая кіруе многімі папулярнымі бясплатнымі парнаграфічнымі вэб-сайтамі, а таксама кампаніямі па вытворчасці парнаграфічных фільмаў.
Выданне цытуе справаздачу Цэнтра лічбавай экспертызы пры ўрадзе Францыі:
«З праведзенага аналізу розных існых метадаў праверкі вынікае, што ніводны з іх не можа лічыцца адначасова эфектыўным, цалкам празрыстым для карыстальніка, мець малую ступень умяшальніцтва ў прыватнасць і быць даступным для ўсіх, хоць некаторыя здаюцца лепшымі за іншыя».
Спецыялісты па гэтым пытанні таксама адзначаюць, як піша Le Monde, што магчымае фільтраванне порнасайтаў будзе лёгка абысці. У некалькі клікаў віртуальная прыватная сетка (VPN) дазваляе падключацца да інтэрнэту з іншай краіны і такім чынам пазбегнуць блакавання.
Журналісты заўважаюць, што гэта нагадвае сітуацыю з французскім законам Hadopi (2009 года), які павінен быў змагацца з нелегальнымі спампоўкамі музыкі і фільмаў, але аказаўся неэфектыўным, таму што інтэрнэт-карыстальнікі знайшлі іншыя спосабы атрымліваць кантэнт без аплаты.
Пірацкія інструменты для спампоўкі, якія пераважалі ў той час і добра паддаваліся кантролю, замянілі новымі сэрвісамі, якія стала складаней кантраляваць. У той жа час зніжэнне пірацтва звязваюць найперш з развіццём такіх недарагіх платформаў, як Spotify, Deezer ці Netflix.
Як піша «Монд», праблема не толькі ў парнаграфіі.
Журналісты нагадваюць, што ў Францыі, як і ў Вялікабрытаніі, рэгулярна вяртаюцца да іншай ідэі: распрацоўшчыкі абароненых месенджараў павінны даваць сваім карыстальнікам зашыфраваныя каналы камунікацыі, але пры патрэбе дазваляць доступ да зместу паведамленняў дзяржаўным органам (у выпадку барацьбы з тэрарызмам, кібермахлярствам, педафіліяй і г.д.).
Гэтае патрабаванне ўтрымліваецца ў новым англійскім законапраекце аб бяспецы ў інтэрнэце, які скіраваны на процідзеянне распаўсюду дзіцячай парнаграфіі.
«Людзі, якія стаяць за гэтым законапраектам, кажуць, што прызнаюць важнасць шыфравання і канфідэнцыйнасці, але пераконваюць, што можна адсочваць паведамленні без шкоды для скразнога шыфравання. Між тым гэта немагчыма»,
— цытуе французскае выданне адкрыты ліст кіраўнікоў WhatsApp (група Meta).
Le Monde звяртае ўвагу на тое, што акрамя тэхнічных цяжкасцяў, такія законапраекты не могуць быць эфектыўна выкарыстаныя, бо сутыкаюцца з палітычнымі перашкодамі. Большасць карыстальнікаў порнасайтаў — дарослыя, адпаведна, яны галасуюць і не падтрымліваюць празмерных абмежаванняў.
Чытайце яшчэ:
Netflix тэстуе гульні на тэлевізары, якія могуць выкарыстоўваць тэлефоны ў якасці кантролераў
Порна ў розных краінах Еўропы: у чым адрозненне
Што парнаграфія робіць з дзіцячым мозгам і як зрабіць, каб яна не трапляла да падлеткаў
Пасля даносу Бондаравай раптоўна адмянілі выставу ў музеі Янкі Купалы. Цяпер яна патрабуе на музеі шыльды па-руску29
Каментары