Грамадства

У Брэсце асудзілі двух лекараў па «справе артапедаў»

Суд Маскоўскага раёна Брэста асудзіў двух вядомых у горадзе лекараў, якіх затрымалі ў канцы сакавіка 2022 года ў рамках «справы артапедаў». Андрэй Варановіч і Сяргей Кісель атрымалі 1,5 года хатняй хіміі і 4 гады пазбаўлення волі з адтэрміноўкай на два гады адпаведна за атрыманне незаконнага ўзнагароджання (артыкул 433 КК), піша «Зеркало».

Брэсцкая цэнтральная гарадская бальніца. Фота: «Яндэкс. Карты»

Андрэй Варановіч працаваў загадчыкам аддзялення з 2016 года. Лекара абвінавачваюць у тым, што ён прапаноўваў пацыентам пратэзы Waldemar Link, якія ў Беларусь пастаўляла адзіная кампанія — «Медлінк».

Закупка пры гэтым праходзіла ў адпаведнасці з усімі правіламі і працэдурамі. Аднак, згодна з абвінавачаннем, перыядычна спецыяліст фірмы «Медлінк», калі прывозіў у бальніцу пратэзы, перадаваў Варановічу грошы ад дырэктара фірмы як падзяку за выбар іх фірмы. Сума незаконных узнагарод склала 6100 еўра.

Лекар пасля затрымання напісаў яўку з павіннай. Падчас следства ён кампенсаваў у казну суму атрыманага ўзнагароджання, а таксама пералічыў у даход дзяржавы яшчэ 25 537 даляраў. На судзе мужчына заявіў пра раскаянне ў зробленым.

Суд прызнаў Варановіча вінаватым у атрыманні незаконнага ўзнагароджання (частка 1 і 2 артыкула 433 КК). Улічваючы змякчальныя абставіны: раскаянне, садзейнічанне следству, выплату злачыннага даходу, «дзеянні, накіраваныя на загладжванне шкоды, у выглядзе пералічэння ў бюджэт грашовых сродкаў», — а таксама адсутнасць ранейшых судзімасцяў, добрыя характарыстыкі, высокі прафесіяналізм і каштоўнасць як спецыяліста, яму прызначылі 2,5 года абмежавання волі без накіравання ў папраўчую ўстанову адкрытага тыпу. Пры гэтым год знялі па амністыі да Дня народнага адзінства. У выніку лекару засталося адбыць 1,5 года «хатняй хіміі».

60-гадовы Сяргей Кісель — лекар вышэйшай катэгорыі. 26 сакавіка 2022 года ў яго быў апошні працоўны дзень, бо яму не працягнулі кантракт, і ён развітаўся з калектывам. У гэты ж дзень яго затрымалі. Крыху больш за месяц ён правёў у СІЗА.

Абвінавачанне Кісялю практычна такое ж, як і Варановічу: у 2019—2022 гадах прапаноўваў пацыентам пратэзы Waldemar Link. Паводле абвінавачання, за гэты перыяд Кісель атрымаў ад дырэктара «Медлінк» і прадстаўніка фірмы сумарна не менш за 25 400 еўра ў якасці ўзнагароджання за садзейнічанне. Пасля затрымання лекар напісаў яўку з павіннай. Падчас следства ён выплаціў у бюджэт увесь незаконны даход, а на судзе прызнаў сваю віну ў атрыманні грошай.

Кісяля прызналі вінаватым у прыняцці незаконнага ўзнагароджання паўторна і ў асабліва буйным памеры (частка 2 і 3 артыкула 433 КК). З улікам раскаяння, выплаты грошай і садзейнічання следству яму вырашылі даць адтэрміноўку пакарання. Суд прызначыў мужчыну 4 гады пазбаўлення волі з адтэрміноўкай на два гады. Пры гэтым лекару далі штраф у памеры 22 200 рублёў.

Пра «справу артапедаў» ці «справу траўматолагаў» стала вядома вясной мінулага года. У яе рамках КДБ кашмарыў артапедаў па ўсёй рэспубліцы. Пасля заступніцтва міністра аховы здароўя Піневіча і даручэння Лукашэнкі «ўзяць на парукі» затрыманых тым выставілі драконаўскія ўмовы выхаду.

Як стала вядома «Нашай Ніве», абвінавачаным па справе быў выстаўлены дзесяцікратны мультыплікатар ад «нанесенай шкоды»: у кагосьці сума выкупу перавышае сотню тысяч даляраў.

«Нехта, каб разлічыцца, вымушаны быў прадаць кватэру, нехта — недабудаваны дом. Тыя, хто не прызнаў віну і не сплаціў шкоды, па-ранейшаму сядзяць. Адказ на пытанні родных кожны дзень ад следчых адзін: «Збірайце грошы», — казалі раней «Нашай Ніве» абазнаныя суразмоўцы. 

Тыя, хто змог кампенсаваць «шкоду», з паніжэннем былі адпушчаныя на працоўныя месцы. 

Каментары

Чаму ў Мазыры амаль двое сутак не маглі аднавіць электразабеспячэнне? І пры чым тут вайна7

Чаму ў Мазыры амаль двое сутак не маглі аднавіць электразабеспячэнне? І пры чым тут вайна

Усе навіны →
Усе навіны

Беларуса затрымалі пасля адпачынку ў Італіі3

«Выйшлі хлопчыкі з чамаданчыкамі». Лідар гурта РСП расказаў, як Лукашэнка прыязджаў на здымачную пляцоўку5

Рэспубліканская партыя афіцыйна вылучыла Трампа кандыдатам у прэзідэнты ЗША9

У Кабардзіна-Балкарыі беларус сарваўся са скалы2

Трамп назваў свайго кандыдата ў віцэ-прэзідэнты22

Некаторыя беларусы сустракалі ўчарашні ўраган, купаючыся ў возеры ВІДЭА

Змітра Дашкевіча будуць судзіць па новай крымінальнай справе ўжо на гэтым тыдні7

Латушка: Я магу баяцца піць ваду ці каву ў грамадскіх месцах14

Каля мяжы Польшчы з Беларуссю агрэсіўная моладзь атакавала польскіх вайскоўцаў ВІДЭА28

больш чытаных навін
больш лайканых навін

Чаму ў Мазыры амаль двое сутак не маглі аднавіць электразабеспячэнне? І пры чым тут вайна7

Чаму ў Мазыры амаль двое сутак не маглі аднавіць электразабеспячэнне? І пры чым тут вайна

Галоўнае
Усе навіны →