Для былога інкасатара Яна Папковіча запрасілі чатыры гады калоніі
У Мінскім гарадскім судзе дзяржабвінавачанне запрасіла 4 гады калоніі былому інкасатару Белгазпрамбанка і экс-спецназаўцу Яну Папковічу, паведамляе «Медыязона» на падставе інфармацыі, атрыманай ад яго старэйшага брата Станіслава.
![](http://d3kcf2pe5t7rrb.cloudfront.net/img/w840d4webp1/photos/z_2023_05/2023-05-12202926-mxrs8.jpg.webp)
Папковіча абвінавачваюць у грубым парушэнні парадку (артыкул 342 КК) і падрыхтоўцы да ўдзелу ва ўзброеным канфлікце на тэрыторыі замежнай дзяржавы (артыкулы 13 і 363-1 КК). Судзіць яго пачалі 10 мая.
Па словах Станіслава Папковіча, ягоны брат віны ў судзе не прызнаў. Адзін са сведак на судзе заявіў, што «на яго аказвалі ціск і ён падпісваў усё, што скажуць».
Сярод пісьмовых доказаў у судзе дэманстравалі перапіску Папковіча з сябрамі, якія, як сцвярджалася, служаць у палку Каліноўскага.
Ян Папковіч звольніўся з банка ў жніўні 2022 года і збіраўся з'язджаць з сям'ёй у Польшчу, аднак 2 верасня сілавікі прыйшлі да яго дадому з ператрусам. Былога спецназаўца затрымалі разам з жонкай Настай, якую пазней адпусцілі.
Пры затрыманні Ян быў моцна збіты. Акрамя таго, сілавікі паранілі сабаку сям'і.
У кастрычніку мінулага года па дзяржканале БТ паказалі сюжэт пра Яна Папковіча. Там яго назвалі «наймітам, які рыхтаваўся ехаць ваяваць ва Украіну ў складзе бандфармавання».
Адначасова з Янам Папковічам затрымалі і ягонага брата Алеся, яго ўжо асудзілі да двух гадоў калоніі.
Каментары