Учора позна ўвечары пасля рэканструкцыі адкрылі Новы мост у Гродне. Рабілі гэта са спецэфектамі, піша NewGrodno.by.
![](http://d3kcf2pe5t7rrb.cloudfront.net/img/w732d4webp1/photos/z_2023_04/0z04l3nmst0q0zgtaxfpj9ophrppyfxc-frps8.jpg.webp)
«Запусцілі мост у эксплуатацыю ў пятніцу, 14 красавіка, якраз напярэдадні праваслаўнага Вялікадня! Дабрацца ў госці да блізкіх гараджанам дакладна будзе прасцей!» — піша выданне.
На адкрыццё моста прыйшло шмат гараджан, а ўлады падрыхтавалі да гэтай падзеі спецыяльную праграму — светлавое шоу, музыку і танцы.
Першай па мосце прайшла калона гарадской тэхнікі, на чале якой ехалі рэтрааўтамабілі. За імі рушылі сучасныя машыны гарадскіх службаў, а таксама новы электрабус і бескантактны тралейбус. Пасля ўрачыстай цырымоніі і шоу з салютам рух па мосце адкрылі для ўсіх ахвотных.
Перад аўтамабілістамі мост перайшлі пешаходы.
![](http://d3kcf2pe5t7rrb.cloudfront.net/img/w732d4webp1/photos/z_2023_04/q0fhxcyo8m2u9zf255mqc2tol060bqk8-hirda.jpg.webp)
Мост праз Нёман у раёне вуліцы Паповіча з'явіўся ў Гродне на пачатку 1970-х гадоў. Ён злучае вуліцы Паповіча і Вясновую, Кастрычніцкі і Ленінскі раёны горада. Запатрабаванасць збудавання заўсёды была вялікай: праз мост праходзяць важныя транспартныя шляхі, маршруты грамадскага транспарту.
![](http://d3kcf2pe5t7rrb.cloudfront.net/img/w732d4webp1/photos/z_2023_04/bak0fo0kp5mqinc1lejlx1wu6r0vljca-yk7y8.jpg.webp)
У верасні 2022 года мост закрылі на абследаванне, а пасля адразу ж паставілі на рэканструкцыю. Работы павінны былі заняць каля 11 месяцаў, але завяршыліся на 5 месяцаў раней за прызначаны тэрмін.
Мост практычна цалкам разабралі, а затым пабудавалі нанова. Будаўнікі ўмацавалі апоры, а замест усіх пралётаў з'явіўся адзін маналітны, даўжынёй больш за 300 метраў! Стала менш і дэфармацыйных швоў: яны ўладкаваныя на ўездах на мост.
Больш зручным мост стаў і для пешаходаў з веласіпедыстамі, бо мачты асвятлення, якія раней стаялі на ходніках, пасля рэканструкцыі перанеслі на край моста.
![](http://d3kcf2pe5t7rrb.cloudfront.net/img/w732d4webp1/photos/z_2023_04/73k0wpv8ekxmq0s631i92uu2jrgrozpr-gk68w.jpg.webp)
Пасля адкрыцця моста на звыклыя маршруты вернецца гарадскі грамадскі транспарт. Таксама, як чакаецца, ужо ў найбліжэйшыя дні разгрузіцца цэнтр горада, стане менш затораў на пад'ездзе да Старога моста.
Каментары