Тры чалавекі загінулі ў Кіеўскай вобласці ў выніку начной атакі дронаў
У выніку начной атакі дронамі ў Кіеўскай вобласці пашкоджаны цывільны аб'ект, цяпер вядома пра траіх загінулых і семярых параненых, інфармацыя ўдакладняецца, паведамляе абласная ваенная адміністрацыя ў сваім тэлеграм-канале.
![](http://d3kcf2pe5t7rrb.cloudfront.net/img/w840d4webp1/photos/z_2023_03/e10501f0-e1cf-4ebf-a7d8-0ed56543a6c2-afahw.jpg.webp)
Гаворка ідзе пра горад Ржышчаў у Кіеўскай вобласці, паведамляецца аб разбурэнні двух інтэрнатаў і адміністрацыйнага будынка. На месцы працуюць паліцыя, ратавальнікі і іншыя экстранныя службы, пацярпелым аказваецца дапамога, заявілі ў адміністрацыі. Пажар лакалізаваны.
Раней кіраўнік гарадской ваеннай адміністрацыі Сяргей Папко паведамляў, што ўсе цэлі, выяўленыя ноччу ў паветранай прасторы вакол горада, былі знішчаны. Паводле папярэдніх звестак, Кіеўскую вобласць і іншыя рэгіёны Украіны атакавалі расійскія дроны. Украінскі Генштаб заявіў, што ўсяго быў запушчаны 21 беспілотнік, 16 з іх было збіта.
У Адэсе напярэдадні вечарам ракета трапіла ў жылы дом. Паветраныя сілы Украіны заявілі, што СПА збіла над Адэскай вобласцю дзве авіяцыйныя ракеты Х-59, выпушчаныя расійскімі знішчальнікамі. Кіраўнік Офіса прэзідэнта Андрэй Ярмак паведамляў, што быў пашкоджаны трохпавярховы дом на тэрыторыі манастыра.
Каментары