Сем робатаў-дастаўшчыкаў гатовыя за лічаныя хвіліны прывезці гарачае капучына да дзвярэй жыхароў Дубайскага сіліконавага аазіса.
![](http://d3kcf2pe5t7rrb.cloudfront.net/img/w732d4webp1/photos/z_2023_02/aa17a8au1-547cv.jpg.webp)
Дубайскі сіліконавы аазіс уяўляе сабой буйны дзелавы і жылы раён, у якім месцяцца IT-кампаніі, прамысловыя прадпрыемствы, а таксама кампаніі, што займаюцца даследаваннямі і распрацоўкамі. На гэтым тыдні на яго вуліцах з'явіліся новыя ўдзельнікі дарожнага руху: першыя ў ААЭ робаты-дастаўшчыкі ежы прымаюць першыя замовы, паведамляе The National.
Пасля паспяховага выпрабавання падчас Expo2020, сем аўтаномных робатаў Talabat упершыню будуць абслугоўваць каля 300 дамоў жылога раёна.
Замаўляючы тавары ў Starbucks, Oregano і ліванскім рэстаране On the Wood у грамадскім цэнтры Cedre Villas, кліенты зараз могуць выбраць дастаўку робатам, якая звычайна займае да 15 хвілін.
«Нам прыйшлося пачынаць з малога, бо мы не можам абслужыць усе дамы і рэстараны, але гэта першы тэст за межамі «Экспа», — кажа Марыя Эстэван, дырэктар па спецыяльных праектах кампаніі Talabat.
«Тэхналогія паказала, што людзі выбіраюць дастаўку робатамі, але зараз нам трэба вывесці яе за межы кантраляванага асяроддзя».
![](http://d3kcf2pe5t7rrb.cloudfront.net/img/w732d4webp1/photos/z_2023_02/aa17asbc-pqt3j.jpg.webp)
Пакуль «талабаты» будуць працаваць толькі ў абмежаванай прасторы радыусам 4,8 км ад рэстаранаў. Аднак пры гэтым яны будуць дзяліць дарожную прастору з іншым паўсядзённым транспартам.
Кліенты могуць рабіць замовы праз праграму Talabat і адсочваць дастаўку.
Робаты надзейна захоўваюцца ўнутры блока з рэгуляванай тэмпературай, могуць працаваць у любое надвор'е і вытрымліваць экстрэмальную летнюю спякоту ў ААЭ.
Пасля прыбыцця робата кліенты могуць адкрыць яго, каб забраць сваю ежу, з дапамогай унікальнага кода доступу.
Штучны інтэлект, выкарыстаны ў «талабатах», абараняе асобу людзей так, што размывае твары і не распазнае іх.
Каб мірна ўпісацца ў вулічнае жыццё, робаты абсталяваныя некалькімі ўбудаванымі датчыкамі і алгарытмамі, якія ацэньваюць асяроддзе і выяўляюць перашкоды на шляху. Такім чынам, «талабаты» павінны трымацца на бяспечнай адлегласці ад малых дзяцей і цікаўных катоў, а таксама ўмець правільна ўзаемадзейнічаць з іншымі транспартнымі сродкамі.
![](http://d3kcf2pe5t7rrb.cloudfront.net/img/w732d4webp1/photos/z_2023_02/aa17aapd-9jw9r.jpg.webp)
Робаты не належаць кампаніі Talabat, але застрахаваныя на выпадак сутыкнення ці пашкоджання маёмасці.
«Калі хтосьці выпадкова ўдарыць робата, будзе звычайны страхавы выпадак, як калі б сутыкнуліся дзве машыны», — кажа спадарыня Эстэван. Па яе словах, хутка кліенты Talabat прызвычаяцца да таго, каб бачыць робатаў на вуліцах штодзень.
Дубайскі сіліконавы аазіс апавясціў жыхароў пра новыя эксперыменты. Робаты-дастаўшчыкі будуць працаваць мінімум тры месяцы, а потым кіраўнікі праекта вырашаць, куды рухацца далей.
Праект па дастаўцы ежы робатамі — частка трохмесячнай пілотнай праграмы кампаніі па анлайн-дастаўцы ежы Talabat, Упраўлення дарог і транспарту Дубая і Упраўлення інтэграваных эканамічных зон Дубая па паляпшэнні варыянтаў паслуг дастаўкі.
Каментары
У Macdonald's Тбілісі з'явіліся робаты-афіцыянты.
Робаты ёсць на Руставелі, ля палаца спорту і яшчэ ў 19 філіялах макдака будуць па ўсёй краіне.
Хутка чакаем у Кутаісі, спадзяемся, што ў Батумі таксама з'явіцца неўзабаве.
Вось тут відэа як ппацуе робат: https://t.me/newsingeorgia/8336
А гэта тэкст навіны:
https://www.facebook.com/718975441501712/posts/pfbid0juEiR1fEYqP5iWRuXW1hrPewJpQQt17DH9WjgbMJJ371zotcpVgvRcGDxx3Q69yZl