Каб спыніцца на ноч у Венесуэле, беларусу давялося прайсці кароткі тэст. Трэба было адказаць на адно пытанне
Падарожнік з Салігорска Саша цяпер вандруе па Венесуэле. Спыніцца на ноч у сталічным Каракасе ён вырашыў у мясцовага жыхара. Праўда, спачатку яго чакала праверка, расказвае праект «1906».
![](http://d3kcf2pe5t7rrb.cloudfront.net/img/w840d4webp1/photos/z_2022_10/este_de_caracas-7nymr.jpg.webp)
Для начоўкі Саша вырашыў скарыстацца каўчсёрфінгам. Гэта калі ты можаш бясплатна спыніцца ў кагосьці з мясцовых. Хлопец з Каракаса, перш чым адказаць, ці гатовы ён прыняць госця з Беларусі, запытаў: ці падтрымлівае той Лукашэнку? Саша адказаў, што ставіцца да палітыка негатыўна.
«Ён быў вялікім сябрам Чавеса. У гэтым падарожжы я наведваю Венесуэлу, каб пабачыць горшую будучыню для Беларусі», — адказаў беларускі падарожнік.
І адразу атрымаў згоду на засяленне.
![](http://d3kcf2pe5t7rrb.cloudfront.net/img/w732d4webp1/photos/z_2022_10/31199-kg0ni.jpg.webp)
Тое, што ў далёкай Венесуэле задалі пытанне пра стаўленне да рэжыму, Сашу не здзівіла. Кажа, там у курсе, што ў нас дыктатура.
«Мой хост з Каракаса расказваў, што ўважліва вывучае профілі каўчсёрфераў і пры самых дробных намёках на «левых» скасоўвае запыты ад іх. Яны там значна лепш, чым мы, разумеюць усё «хараство» сацыялізму, калі ў кватэрах днямі няма электрычнасці і вады. Пра нашу дыктатуру яны ведаюць толькі ў кантэксце сваёй», — дзеліцца хлопец.
Саша кажа, што такое здарылася з ім упершыню за год падарожжа па Лацінскай Амерыцы.
«У іншых краінах проста зусім нічога не ведаюць пра Беларусь. Венесуэльцы ж трошкі чулі пра нашу краіну, у кантэксце «вялікай дружбы» дыктатараў».
Каментары