Жыхарам Новай Баравой далі па 10 сутак арышту за выкрыкі «Жыве Беларусь» з акна
Траіх жыхароў Новай Баравой затрымалі за выкрыкі з акон «Жыве Беларусь», дома ў іх правялі ператрусы. Дваіх арыштавалі на 10 сутак, паведамляе тэлеграм-канал «Вясна назірае».
21 красавіка траіх жыхароў забралі ў РУУС за выкрыкі «Жыве Беларусь» з акон іх кватэр. У кватэрах 29-гадовай Яны Апасавай, 31-гадовага Аляксандра Анісько і 32-гадовага Алега Ляліка правялі ператрусы. На іх склалі пратаколы па арт. 24.23 КаАП.
Згодна з пратаколам, жыхароў Новай Баравой абвінавацілі ў тым, што яны «20 красавіка ў перыяд часу 21:00-21:03 наўмысна парушылі закон «Аб масавых мерапрыемствах», прыняўшы ўдзел у несанкцыянаваным пікетаванні, высунуўшыся з акна кватэры, выкрыкнулі лозунг «Жыве Беларусь».
Іх справы 23 красавіка разглядзела суддзя Кацярына Новікава ў судзе Мінскага раёна.
Алег і Аляксандр жывуць на другім паверсе, а Яна жыве на восьмым, але гэта не перашкодзіла сведку-міліцыянту ў цёмны час сутак разглядзець іх твар, пасля чаго апазнаць іх на судзе.
На судзе Алег і Яна сказалі, што ў той дзень чулі крыкі, але ўдзелу ў гэтым не прымалі. Аляксандр у гэты час наогул разам з жонкай купалі дзіця, а незадоўга да затрымання быў панятым пры ператрусе ў суседа па тамбуры.
Калі прыйшлі дадому да сям'і Апасавых, дома была яшчэ іх сяброўка. Супрацоўнікі міліцыі прапанавалі жыхарам самім выбраць, каму праехаць з імі у РУУС для гутаркі. Так як муж Яны хварэе, дзяўчына вырашыла паехаць сама. Сведка-міліцыянт жа сцвярджае, што ён асабіста бачыў, як Яна выкрыквала лозунгі з акна, таму і затрымалі менавіта яе.
Вокны Аляксандра Анісько ў адзінага выходзяць не на двор, а на лес. Сведка-міліцыянт у гэты раз не стаў агаворваць чалавека, таму, не маючы ніякіх доказаў, суддзя Новікава вырашыла адправіць яго справу на «дапрацоўку».
Алег Лялік і Яна Апасава па рашэнні суддзі Новікавай будуць адбываць 10-сутачныя арышты.
Двайнікі вядомых беларусаў. І не кажыце, што не задумваліся пра іх падабенства12
Каментары