![](http://d3kcf2pe5t7rrb.cloudfront.net/img/w840d4webp1/photos/z_2017_07/plakat_mozdzeduzy222-cifmw.jpg.webp)
Незвычайны канцэрт адбыўся ў менскай Філармоніі 29 чэрвеня. У гонар 25-й гадавіны падпісання беларуска-польскай дамовы аб дружбе і добрасуседстве ігралі беларускі і польскі піяністы.
Паляк Лешак Можджэр іграў босы. Думаю, гэта першы раз у гісторыі нашай Філармоніі, каб піяніст іграў босы.
Выбар піяністаў быў не выпадковы. Можджэр мае карані ў Гродне. Увогуле то Можджэр — сусветна вядомае імя, віртуоз джазавага фартэпіяна. Ён харызматычная асоба, незвычайна трымаецца і выдатна размаўляе з залай.
![](http://d3kcf2pe5t7rrb.cloudfront.net/img/w732d4webp1/photos/z_2017_07/z21284891ihbosy-leszek-mozdzer-podczas-uroczystosci-z-okazji--ezqe8.jpg.webp)
З ім іграў беларус Кірыл Кедук — ураджэнец Гродна, але гадаванец польскай фартэпіяннай школы. У Кедуку спалучаюцца майстэрства і нейкі прыродны хуліганскі шарм.
![](http://d3kcf2pe5t7rrb.cloudfront.net/img/w732d4webp1/photos/z_2017_07/keduk-n5qh4.jpg.webp)
Спалучэнне джазавага стылю Можджэра і класічнага — Кедука — давала незвычайны эфект.
Перад канцэртам да прысутных звярнуліся пасол Польшчы ў Беларусі Конрад Паўлік, першы міністр замежных спраў Беларусі Пятро Краўчанка (ён у сваім выступе цытаваў Геніюш і назваў польскі народ такім сама братнім беларусам, як і расійскі) і першы пасол Польшчы ў Беларусі Эльжбета Смулкова, якая пад гарачыя апладысменты выйшла на сцэну з кіёчкам.
Канцэрт зладзіў Польскі інстытут у Менску. Дзяржаўным камерным аркестрам дырыжыраваў Алег Лясун. Варта адзначыць, што зала не была поўная, бо частка білетаў была размеркаваная па запрашальніках, але дзень правядзення імпрэзы супаў з прыёмам з нагоды Дня незалежнасці ЗША, куды збіраецца сталічны бамонд.
Кульмінацыяй вечару стала выкананне Можджэрам і Кедуком, на два фартэпіяна, разам з беларускім дзяржаўным камерным аркестрам і перкусіяністамі Варыяцый на тэмы з Паганіні Вітаўта Лютаслаўскага. А на закуску Можджэр і Кедук пад авацыі імправізавалі на тэму «Купалінкі». Зала была ў захапленні і доўга не адпускала іх.
Каментары