Браты Скрабцы і Тацяна Ваніна выйшлі на Кастрычніцкую плошчу Менску. Яны трымалі ў руках плякаты "Я абвяшчаю галадоўку". Акцыя доўжылася пару хвілін, пасьля чаго падышлі міліцыянты і параілі падумаць пра сваё здароўе.
 |
Сёньня а 18-й дэмакратычныя актывісты меліся выйсьці на Кастрычніцкую плошчу, каб у чарговы раз патрабаваць вызваленьня Аляксандра Казуліна ды іншых палітвязьняў. Асаблівасьцю акцыі ёсьць тое, што ўдзел у ёй павінны былі ўзяць людзі, што днямі распачалі эстафэтную галадоўку.
Ініцыявала акцыю грамадзкая актывістка Тацяна Ваніна. Яна прапанавала прыняць удзел у сымбалічнай галадоўцы кожнаму, хто жадае маральна падтрымаць палітвязьняў. Паводле Т. Ванінай, 20 сакавіка — сымбалічны дзень, бо акурат два гады таму было створанае намётавае мястэчка. І менавіта ў працяг тых падзеяў быў зьняволены А. Казулін.
Удзельнікі эстафэтнай галадоўкі плянуюць выходзіць штодзень а 18-й на Кастрычніцкую плошчу да 25 сакавіка.
Нагадаем, што 10 сакавіка бестэрміновую галадоўку за вызваленьне А. Казуліна пачалі браты Сяргей і Аляксандар Скрабцы. Пазьней да іх далучыліся актывіст Сяргей Галаганюк і былы міліцыянт Алег Алкаеў. Сёньня пачалі галадоўку актывістка Тацяна Ваніна і прадпрымальнік Мікалай Аўтуховіч.
Каментары