Ličycca, što jon byŭ na hałavie Isusa padčas ukryžavańnia.
U adnoŭleny paśla pažaru Sabor Paryžskaj Božaj Maci ŭ piatnicu ŭračysta viarnuli adnu z hałoŭnych chryścijanskich relikvij — ciarnovy vianok, jaki, jak pryniata ličyć, byŭ na hałavie ŭ Isusa Chrysta pry raśpiaćci na Hałhofie, piša Bi-bi-si.
Cyrymoniju ŭniasieńnia ciarnovaha vianka, vyratavanaha padčas pažaru piać hadoŭ tamu, uznačaliŭ arcybiskup Paryžski Łaran Ulrych, u joj udzielničali členy rycarskaha ordena Śviatoj truny haspodniaj Jerusalimskaj.
Relikvija składzienaja ŭ novy kryštalny futlar z arnamientam z zołata.
U 1239 hodzie karol Francyi Ludovik IX addaŭ za ciarnovy vianok pałovu hadavych vydatkaŭ svajoj kazny — 135 tysiač liŭraŭ. Vianok zachoŭvaŭsia ŭ Kanstancinopali i paśla zachopu horada kryžakami apynuŭsia ŭ rukach pastaŭlenych imi kiraŭnikoŭ, a zatym byŭ zakładzieny ŭ vieniecyjancaŭ, u jakich i vykupiŭ relikviju francuzski karol.
Pieršyja niekalki stahodździaŭ vianok zachoŭvaŭsia ŭ karaleŭskaj carkvie Sent-Šapiel, a ŭ 1806 hodzie byŭ pieraniesieny ŭ raźmieščany pobač Notr-Dam, dzie i prabyŭ da pažaru 2019 hoda.
Kali sabor zahareŭsia, pažarnyja i palicejskija stali ŭ žyvy łancuh i vyratavali ad ahniu i vianok, i inšyja relikvii z sabora.
Pakul sabor adnaŭlali, vianok zachoŭvaŭsia ŭ Łuŭry, dzie jamu zrabili novuju raku — futlar.
Na ahlad publiki relikvija budzie vystaŭlenaja 10 studzienia.
Sabor Paryžskaj Božaj Maci ŭračysta adkryli 8 śniežnia. Adnaŭleńnie sabora, u jakim udzielničali kala dźviuch tysiač restaŭrataraŭ, mularoŭ, cieślaroŭ, skulptaraŭ, inžynieraŭ i inšych śpiecyjalistaŭ, praciahvałasia piać hadoŭ i abyšłosia ŭ 700 młn jeŭra.
Na cyrymoniju adkryćcia prezident Francyi Emanuel Makron zaprasiŭ lidaraŭ mnohich krain śvietu.
U Biełarusi pierad vybarami mohuć błakavać internet — jak da hetaha padrychtavacca, kab być na suviazi1
Kamientary