Centralnaj hierainiaj u praciahu kultavaj sieryi stanie darosłaja Cyry, pryjomnaja dačka Hieralta. Raspracoŭščyki pakazali šaścichvilinny siužetny trejler i padzialilisia pieršymi padrabiaznaściami prajekta, jaki stanie pačatkam novaj tryłohii. «Naša Niva» zaŭvažyła ŭ im i biełaruski śled.
Novuju hulniu ź sieryi pra Viedźmara (The Witcher) polskaja studyja CD Projekt RED aficyjna anansavała na cyrymonii The Game Awards 2024, jakaja adbyłasia ŭ noč na 13 śniežnia.
Sieryja hulniaŭ «Viadźmar» zasnavana na litaraturnaj pieršaasnovie — adnajmiennaj sieryi ramanaŭ polskaha piśmieńnika Andžeja Sapkoŭskaha. Sapraŭdy šalonuju papularnaść pa ŭsim śviecie historyja pra viedźmara atrymała paśla vychadu hulniaŭ. «Viadźmar 3: Dzikaje Palavańnie», jakaja vyjšła ŭ 2015 hodzie, stała sapraŭdy kultavaj hulnioj.
Pa siužecie «Viedźmara 4» Cyryła, pryjomnaja dačka viedźmara Hieralta z Ryvii i jaho kachanki čaradziejki Jenifer, vypraŭlajecca va ŭłasnaje padarožža, kab stać prafiesijnaj zabojcaŭ monstraŭ. Raspracoŭščyki paviedamili, što «Viadźmar 4» stanie pieršaj častkaj tryłohii, pryśviečanaj jaje pryhodam.
Hulnia, nad jakoj siońnia pracuje 400 raspracoŭščykaŭ, stvarajecca na bazie Unreal Engine 5. Pavodle słoŭ pradstaŭnikoŭ CDPR, heta budzie samy «ambicyjny i pahłybleny» prajekt u historyi fentezijnaj sieryi.
Pakul nieviadoma, ci źjavicca ŭ hulni Hieralt, hieroj pieršych troch častak, adnak akcent na Cyry adkryvaje vialikija mahčymaści dla raźvićcia suśvietu. Aficyjnaj daty relizu pakul niama, ale raspracoŭščyki abiacajuć chutka pradstavić dadatkovuju infarmacyju.
Što pakazali
Kiniematahrafičny trejler, jaki ŭ čymści pierahukajecca z trejleram samaj pieršaj hulni sieryi, adlustroŭvaje ahulny zmročny nastroj hulni i pakazvaje dobra viadomaha piersanaža ŭ novaj jakaści zabojcy pačvaraŭ.
U roliku maładuju dziaŭčynu rychtujuć da abradu, apranajučy ŭ śviatočny stroj i nadziavajučy na hałavu vianok. Dziaŭčyna, jakuju byccam by vybrali bahi, vychodzić da svaich adnaviaskoŭcaŭ i abiacaje baćku, što pryniasie vioscy zbaŭleńnie. Jana nakiroŭvajecca ŭ ciomny les, a ŭ natoŭpie zaŭvažajuć viedźmara, jakomu, vidavočna, zapłaciŭ baćka dački, jaki nie chacieŭ jaje hibieli.
Pad kapiušonam nieznajomca akazvajecca pastalełaja Cyry Cyryła. Jana nosić miedaljon škoły Rysi i pa jaje niečałaviečych zrenkach zrazumieła, što jana prajšła ŭrešcie praź viadźmarskija mutacyi.
Viadźmarka nahaniaje dziaŭčynu ŭ lesie i pierakonvaje jaje ratavać svajo žyćcio, a sama zastajecca, kab adoleć miascovaha bažka — vielizarnuju chimieryčnuju pačvaru, jakaja musiła zžerci dziaŭčynu. Cyry, karystajučysia siarebranym miačom i viadźmarskimi znakami, pieramahaje pačvaru, adsiakajučy joj hałavu.
Dziaŭčynu ŭratavać nie ŭdajecca. Źbiehšy ad žudasnaj pačvary, jana znachodzić śmierć ad nie mienš žudasnych pačvar — ułasnych adnaviaskoŭcaŭ, jakija zabivajuć jaje nažom u serca za toje, što jana parušyła spradviečnuju tradycyju i nie stała zbavicielnaj achviaraj baham.
— My chacieli, kab jana pajšła da bahoŭ!
— Da bahoŭ? Niama tut nijakich bahoŭ. Jość tolki pačvary!
Akramia roznych drobiaziaŭ, jakija źviartajuć na siabie ŭvahu fanataŭ sieryi, my taksama źviarnuli ŭvahu na śviatočny stroj dziaŭčyny ŭ trejlery. Stroj upryhožany hieamietryčnym arnamientam, jaki nahadvaje biełaruski.
Biełaruski arnamient ź Jaryłam
Nie sakret, što hulni ź sieryi pra Viedźmara majuć hłyboki praŭdapadobny śviet, jaki splecieny z masavaj kultury, słavianskaj mifałohii, estetyki i historyi Centralnaj i Uschodniaj Jeŭropy. U pieršuju čarhu polskija raspracoŭščyki, viadoma, aryjentujucca na polskuju kulturu, ale nie tolki.
Tak, naprykład, u dadatku «Kamiennyja sercy» pradstaŭniki adnaho rodu nasili imiony Vitold (Vitaŭt), Alhierd i Kiejstut, jakija jaŭna adsyłajuć da imionaŭ vialikich kniazioŭ litoŭskich z dynastyi Hiedziminavičaŭ.
Taki hieamietryčny arnamient, u jakim pieravažaje čyrvony koler, jak pakazali ŭ trejlery da novaj častki Viedźmara, niecharakterny dla polskaj narodnaj kultury. Ale vielmi charakterny dla biełaruskaj.
Mahčyma, hiejmdyzajniery šukali dla svaich vobrazaŭ niešta archaičnaje, a tamu źviarnulisia da biełaruskaha narodnaha arnamientu, u jakim schavany roznyja jazyčnickija simvały.
Arnamient, jaki amal identyčny z arnamientam na dole śviatočnaha stroju dziaŭčyny z trejlera, my zmahli adšukać na ŭzorystaj pałasie ručnika ź vioski Sałaŭi Dubrovienskaha rajona Viciebskaj vobłaści, jaki byŭ vytkany ŭ 1910-ja hady. Siońnia vioska nazyvajecca Kotaŭščyna i pa jaje ŭschodniaj uskrainie prachodzić dziaržaŭnaja miaža z Rasijaj.
Dubrovienskija ručniki, jakija vyrablali ŭ vioskach Dubrovienskaha i Aršanskaha rajonaŭ, viadomyja pa ŭzorach, jakija źbierahlisia z kanca XIX stahodździa. Ich tkali z adbielenaha kužalu i biełaj bavoŭny ŭ technicy branaha i šmatnitovaha tkacva. Daŭžynia adnaho dubrovienskaha ručnika mahła być ad 150 da 360 sm.
U asnovie ŭzorystaj pałasy na hetym ručniku ź vioski Sałaŭi razietka ŭ vyhladzie romba z pramianiami. Jaho daśledčyk biełaruskaha arnamientu Michaił Kacar nazyvaje matyvam Jaryły.
Vobraz Jaryły ŭ narodnym ujaŭleńni ŭvasablaŭ abudžeńnie pryrody paśla zimovaha snu, źmienu zimovaha choładu na viesnavuju kviecień. Jaryła — simvał adviečnaha roskvitu vytvorčych, žyćciovych sił pryrody. Jahonyja dzieci, Žycień, Sparyš i Bahač, taksama kłapociacca pra ŭradžaj na nivie.
Matyŭ Jaryły padobny da simvała Sonca, i heta nievypadkova. Niekatoryja tkačychi havaryli, što Jaryła — syn Sonca.
Ručnik ź vioski Sałaŭi zachoŭvajecca ŭ kalekcyi ŭ Muziei biełaruskaha narodnaha mastactva ŭ vioscy Akolica (spartkompleks «Raŭbičy»), ale jaho lohka adšukać u tematyčnaj padborcy biełaruskich ručnikoŭ na Vikischoviščy. Jašče adna nahoda papaŭniać hety prajekt fotazdymkami — jak znać, moža być jašče jakaja-niebudź častka biełaruskaj kultury stanie refierensam dla dyzajnieraŭ.
«Naša Niva» — bastyjon biełaruščyny
PADTRYMAĆ
Kamientary