Džud Łoŭ źniaŭsia ŭ novym filmie — takim, što murašy pa skury

Svaju nazvu stužka The Order («Orden») atrymała ad adnajmiennaj arhanizacyi ŭ ZŠA, jakuju jašče nazyvali The Silent Brotherhood («Maŭklivaje braterstva»). U 1983-1984 hadach členy arhanizacyi ładzili rabavańni i maryli pieratvaryć ZŠA ŭ krainu biełych.

Pavodle filma, ich złačynstvy rasśleduje Tery Chask, byvały ahient FBR, jakoha hraje Džud Łoŭ. Jon bačyć ahulnaje ŭ niekalkich rabavańniach, što adbylisia na paŭnočnym zachadzie ZŠA, i prychodzić da vysnovy: reč nie ŭ arhanizavanaj złačynnaści, a ŭ tym, što ŭ krainie ŭźnikła radykalnaja hrupoŭka.

Paralelna my bačym, jak hetaja hrupoŭka nabiraje moc. Jaje kiraŭnik, charyzmatyčny junak Bob Mećjuz, sumiaščaje napady i rabavańni z žyćciom muža i baćki, jak i jaho paplečniki. Atrymlivajecca pa-svojmu strašna: u «Braterstvie» vučać małoje dzicia stralać, a dabrabyt siamji padtrymlivajuć skradzienymi hrašyma z kroplami kryvi na ich.

Srodki, adnak, patrebnyja i na bolš ambicyjnyja spravy, bo ŭ Mećjuza vialikija płany — jon maryć pra «biełuju» revalucyju. Šlach da jaje apisany ŭ čyrvonaj knižcy, što taksama źjaŭlajecca ŭ filmie: toje, što nazyvajuć dziciačymi kazkami, nasamreč akazvajecca ledź nie nieanacysckim manifiestam.

Kali vy z tych, chto šukaje ad kino jarkich emocyj, The Order moža rasčaravać. Pahoni i stralanina tut nie asnoŭnaje. U hetaj ciahučaj i doŭhaj (116 chvilin) historyi dziejańnie razvaročvajecca pavolna, ale napružana. Zbolšaha my sočym za Chaskam i jaho karpatlivym rasśledavańniem.

Napružanaść padtrymlivaje vydatny saŭndtrek i atmaśfiera, u jakoj adbyvajucca padziei stužki. Heta hłuchmień u harach, dzie ludziam žyviecca składana, i, moža, tamu ich hnieŭ transfarmujecca ŭ radykalizm. Depresiŭnaść — badaj, jašče adno pačućcio, jakim nasyčany film. Heta i pra losy hierojaŭ — toj ža Chask nie moža biez ałkaholu, i pra dekaracyi, i navat pra niajarkija kolery filmu, dzie vydzialajucca chiba što fašysckija ściahi.

Pavialičyć

Depresiŭnaść jość i ŭ tym, što zło, ź jakim zmahalisia Chask i kampanija, usio-tki nie pieramožanaje da kanca. U tytrach vam raskažuć, što «Dziońniki Ciorniera», taja samaja čyrvonaja knižka, dahetul natchniajuć na złačynstvy — naprykład, ich vykarystoŭvali padčas padrychtoŭki napadu na amierykanski Kapitolij 6 studzienia 2021-ha.

Napeŭna, nie budzie siurpryzam, što ŭ stužcy siabie vydatna pakazaŭ Džud Łoŭ. Ale film adkryvaje jašče adnaho akciora, brytanca Nikałasa Chołta, jaki stvaraje vobraz Boba Mećjuza. Jon dobra pakazaŭ šmatsłojnaść svajho piersanaža: Mećjuz — heta i kłapatlivy siemjanin, i charyzmatyčny lidar, i ŭpeŭnieny ŭ sabie fanatyk, hatovy abviaścić vajnu ŭsiamu śvietu. I pry hetym jon nie hublaje prostyja, amal žyviolnyja pačućci, jakija nie suadnosiacca z vobrazam taho, chto vyratuje krainu.

U vyniku atrymaŭsia intelektualny detektyŭ z kłapatliva dadadzienaj dolaj ekšnu i napružanaści. Jaje vam nie chopić, kali vy chodzicie ŭ kino pa papkorn. Ale kali šanujecie atmaśfieru — śmieła idzicie na The Order.

• 3
• 0
• 0
• 0
• 0
• 0
• 0
• 0