Kavaleŭski: Intaresy Biełarusi ŭ mirnych pieramovach pa Ukrainie nielha ihnaravać

«Łukašenka naŭrad ci apyniecca na mirnych pieramovach pa Ukrainie, niahledziačy na toje, što jon vielmi hetaha chacieŭ by. Heta vielmi małavierahodna praź jaho aktyŭny saŭdzieł u vajnie, a taksama praź jahonuju pazicyju admaŭleńnia realnaści — až da taho, što jon admaŭlaje sam fakt uvarvańnia rasijskich vojskaŭ z terytoryi Biełarusi. Ź inšaha boku, i biełaruskim demsiłam ciažka raźličvać na trapleńnie na pieramovy, u jakich udzielničajuć dziaržavy. Nichto nie viedaje, u jakim farmacie buduć prachodzić hetyja pieramovy.

Moža być, Pucin z Trampam buduć razmaŭlać, a ŭsie astatnija — čakać u kalidory. Što my možam rabić — heta davodzić infarmacyju pra ahulnyja nacyjanalnyja intaresy Biełarusi ŭ hetym pracesie.

U hetyja intaresy, biezumoŭna, uvachodzić vyklučeńnie rasijskaj vajskovaj prysutnaści na terytoryi Biełarusi, biezumoŭna, vyvad jadziernaj zbroi ź jaje terytoryi, biezumoŭna — heta los biełaruskich vajennapałonnych, jakija vajavali za Ukrainu i ciapier znachodziacca ŭ rasiejskim pałonie», — skazaŭ Kavaleŭski.

Valer Kavaleŭski ličyć, što pieramovy pavinny tyčycca taksama ŭnutrypalityčnaj situacyi ŭ Biełarusi.

«U našych nacyjanalnych intaresach taksama toje, kab pieramovy ŭklučali ŭnutrybiełaruskuju palityčnuju prablematyku — heta, biezumoŭna, spynieńnie represij i vyzvaleńnie palitviaźniaŭ. Treba razumieć, što heta nie ŭnutranaja prablema Biełarusi. Bo mienavita ŭ stanie takoha ciažkaha kryzisu i represij naša kraina stała nastolki schilnaja rasiejskamu ŭpłyvu i kantrolu, što heta pryviało da vykarystańnia jaje ŭ ahresii suprać Ukrainy.

Dla taho kab vyklučyć paŭtareńnie hetaha, u intaresach mižnarodnaj supolnaści — pieraadoleńnie hetaha kryzisu ŭ Biełarusi. Biełaruś pavinna znoŭ stać adkaznym mižnarodnym hulcom, jaki prytrymlivajecca damoŭlenaściaŭ i abaviazacielstvaŭ. Svajoj zadačaj ja liču daviadzieńnie da partnioraŭ, što isnuje biełaruskaja pierśpiektyva i biełaruski padychod, što pieramovy pavinny ŭklučać razhlad biełaruskaj tematyki, i kab u vyniku byli prapisany kankretnyja rečy pa Biełarusi, vykanańnie jakich budzie kantralavacca», — skazaŭ jon.

Kavaleŭski ličyć, što ŭ mirnych pieramovach mohuć pryniać udzieł biełaruskija ekśpierty.

«Adnoj z mahčymaściaŭ uziać udzieł u pieramovach moža być pryciahnieńnie biełaruskich ekśpiertaŭ, jakija ŭdzielničali b u zabieśpiačeńni nieabchodnaj u takich mierapryjemstvach ekśpiertnaj padtrymki. Heta nie pavinny być palityki, bo ŭ bolšaści svajoj palityki ekśpiertami nie źjaŭlajucca, heta pavinny być ekśpierty ŭ pytańniach biaśpieki i mižnarodnych adnosin.

Jany nie abaviazkova pavinny ŭdzielničać ułasna ŭ pieramovach, čaściakom ekśpierty znachodziacca ŭ asobnym pamiaškańni, jany nie prymajuć palityčnych rašeńniaŭ, ale karektujuć chod pieramovaŭ. Taki farmat dazvoliŭ by paźbiehnuć taho, što Biełaruskaja pierśpiektyva budzie całkam praihnaravanaja.

U Biełarusi jość ekśpierty, jakija mahli b udzielničać u takoj kanfierencyi jak kansultanty. Vyznačeńnie taho, chto budzie hetymi ekśpiertami, chto vałodaje adpaviednaj reputacyjaj i prafiesijnymi navykami — zadača dla hramadzianskaj supolnaści. Ale heta tolki adzin z varyjantaŭ — heta adkrytaje pytańnie, i heta nie pytańnie siońniašniaha dnia», — ličyć jon.

Kavaleŭski miarkuje, što Jeŭraparłamient moža padtrymać jahonuju ideju.

«Na Jeŭrapiejski parłamient ja hladžu jak na orhan, jaki moh by zafiksavać nieabchodnaść uliku biełaruskich intaresaŭ. Pra nieabchodnaść hetaha kažuć biełaruskija palityki, ekśpierty, pradstaŭniki hramadzianskaj supolnaści — u hetym płanie, ja liču, u Biełarusi isnuje kansensus. Jeŭraparłamient — heta lehitymny orhan, jaki moh by zafiksavać prysutnaść biełaruskich intaresaŭ u hetych pieramovach. Kali budzie pryniataja rezalucyja Jeŭraparłamienta ŭ hetym pytańni, to źjavicca mahčymaść damahčysia taho, kab biełaruskaja pazicyja nie była praihnaravanaja ŭ budučych mirnych pieramovach», — kaža Valer Kavaleŭski.

• 3
• 0
• 4
• 0
• 0
• 0
• 0
• 0