Betmabil šukaje svajho betmiena. Limitavanuju sieryju lehiendarnych supiermašyn vystavili na prodaž
Kinakampanija Warner Bros. abviaściła ab prodažy niekalkich całkam funkcyjanalnych i aryhinalnych betmabilaŭ z tryłohii Krystafiera Nołana «Ciomny rycar». Kolki budzie kaštavać hetaje zadavalnieńnie i jakija charaktarystyki ŭ supiermabila?
Aryhinalny čorny i całkam funkcyjanalny betmabil vystaŭleny na prodaž usiaho ŭ dziesiaci ekzemplarach u honar 85-hodździa lehiendarnaha supierhieroja Betmiena.
Aŭtamabil abstalavany mahutnym bienzinavym ruchavikom LS3 abjomam 6,2 litra i mahutnaściu 525 konskich sił, što dazvalaje jamu spraŭlacca navat z samymi składanymi zadačami. Vaha mašyny składaje kala 2,5 tony, a jaje rama zroblena sa stali, jakaja vykarystoŭvajecca ŭ avijacyjnaj i kaśmičnaj pramysłovaści.
Korpus betmabila stvorany z kieŭłara, vuhlarodnaha vałakna i mietałaŭ, što zabiaśpiečvaje vydatnuju tryvałaść. Zborka mašyny taksama ŭklučaje sistemu imitacyi reaktyŭnaha ruchavika, šaścistupienistuju tranśmisiju i technałohii dla kiravańnia ŭ składanych umovach, napisana na imitacyjnym sajcie Wayne Enterprises, jaki byŭ stvorany kinakampanijaj Warner Bros.
Akramia taho, u kanstrukcyi betmabila buduć ubudavanyja kananičnyja zbrojevyja viežy (niesapraŭdnyja) i sistema vypuskańnia dymavych zasłon.
Košt kožnaha aŭtamabila składaje 2,99 miljona dalaraŭ (amal 10 miljonaŭ biełaruskich rubloŭ), i nabyć jaho možna tolki pa indyvidualnym zaprašeńni, jakoje možna atrymać paśla padačy zajaŭki na imitacyjnym sajcie Wayne Enterprises.
Dastaŭka mašyny abranamu klijentu adbudziecca praz 15 miesiacaŭ paśla ŭniasieńnia depazitu. Zakazčyku taksama prapanujecca ekskluziŭny dostup da vytvorčaha pracesu betmabila. Pry hetym na betmabili nielha budzie jeździć pa darohach ahulnaha karystańnia.
Jak paviedamlaje kinakampanija Warner Bros., hetyja mašyny pryznačany «dla sapraŭdnych kalekcyjanieraŭ i amataraŭ unikalnaha dyzajnu».
Kali Kanapackaja stała całkam padkantrolnaja Łukašenku?22
Kamientary