Apazicyja ŭ Abchazii zaklikała hramadzian sabracca dniom la parłamienta, kab znoŭ zapatrabavać adstaŭki prezidenta

Kaardynacyjnaja rada apublikavała zaklik da hramadzian pryjści da 14: 00 pa miascovym časie da parłamienta, kab zapatrabavać ad prezidenta Asłana Bžanija syści ŭ adstaŭku, piša Bi-bi-si.

«Čas jaho kiravańnia ŭžo skončyŭsia. Naša zadača — damahčysia adstaŭki Bžanija i stabilizavać palityčnuju situacyju ŭ krainie», — havorycca ŭ zajavie.

Napiaredadni viečaram hramadzianie niepryznanaj respubliki, niezadavolenyja novym inviestycyjnym pahadnieńniem z Rasijaj, siłaj pranikli na terytoryju kompleksu ŭradavych budynkaŭ, źniosšy varoty. Jany zaklikali prezidenta syści.

U adkaz Bžanija zajaviŭ, što praciahnie pracavać, i ŭnačy, paśla narady ź siłavymi strukturami, źjechaŭ z Suchumi ŭ svajo rodnaje siało Tamyš. U subotu jon maje namier pravieści tam sustreču sa svaimi prychilnikami.

Pres-słužba prezidenta ŭ piatnicu anansavała adklikańnie inviestpahadnieńnia, ale paźniej abvierhła takija płany.

Ranicaj suboty vakoł kompleksu ŭradavych budynkaŭ u Suchumi było spakojna i biaźludna.

Asłan Bžanija kiruje rehijonam z 2020 hoda.

Z-za čaho ŭźnikli pratesty?

Pratesty ŭ Abchazii ŭźnikli z-za ratyfikacyi inviestycyjnaj damovy z Rasijaj. Voś čamu dakumient nie padabajecca abchazskaj apazicyi, piša «Mieduza».

Prajekt damovy byŭ anansavany hod tamu. Jon praduhledžvaje vydzialeńnie ziamielnych učastkaŭ dla rasijskich biznesoŭcaŭ i mnohija hady padatkovych kanikułaŭ. Taksama dakumient dazvalaje pryvozić u Abchaziju zamiežnych pracoŭnych, biazmytny impart budaŭničych materyjałaŭ i adkryćcio ŭ častkova pryznanaj krainie filijała rasijskaha banka.

Minimalnaje abmiežavańnie inviestycyj — dva miljardy rasijskich rubloŭ za prajekt (20 młn dalaraŭ). Pry hetym dachodnaja častka biudžetu Abchazii na 2024 hod składaje 12 miljardaŭ rubloŭ (120 młn dalaraŭ).

Ułady Abchazii śćviardžajuć, što inviestycyi nieabchodnyja dla stabilizacyi ekanomiki ŭ krainie. Krytyki dakumienta ličać, što jon vyhadny tolki Rasii.

Asablivaje niezadavalnieńnie vyklikajuć punkty, jakija praduhledžvajuć pieradaču abchazskich ziamiel rasijskim pradprymalnikam. Apazicyja taksama ličyć, što biznesoŭcy z RF vycisnuć abchazaŭ z važniejšaj dla krainy turystyčnaj śfiery.

Nam naviazvajuć ideju, zakładzienuju ŭ pahadnieńni, asvoić Abchaziju biez hramadzian Abchazii. <…> To-bok heta budzie paralelnaja niejkaja ekanomika z udziełam rasijskich inviestaraŭ, rasijskich bankaŭ», — zajaviŭ ekanamist Achra Arystava.

Maskva nastojvaje na ratyfikacyi dakumienta ŭ Abchazii. Rasija zabiaśpiečvaje amal treć biudžetu Abchazii, i finansavy cisk u častkova pryznanaj respublicy adčuvalny. Akramia taho, u Abchazii znachodzicca vajskova-marskaja baza Rasii.

• 1
• 0
• 0
• 0
• 0
• 0
• 0
• 0