«Skazali, da kanca vajny navat nie sprabavać ujechać». Trenierku biełaruskich fihurystaŭ nie puścili ŭ Rasiju

Tancory na lodzie Viktoryja Płaskonnaja i Uładzisłaŭ Sycik jechali ŭ Mahnitahorsk na Hran-pry Rasii pa fihurnym katańni. Adnak vystupać biełaruskim spartsmienam pryjdziecca biez treniera-Taćcianu Bialajevu nie prapuścili ŭ Rasiju ŭ «Šaramiećcieva».

Usio tamu, što trenierka źjaŭlajecca hramadziankaj Ukrainy. Bialajeva pierajechała z Adesy ŭ Biełaruś u 2005 hodzie, žyvie ŭ krainie pa dazvole na žycharstva. Trenierka vychavała mnohich biełaruskich tancoraŭ na lodzie, jakija damahalisia pośpiechaŭ na junijorskim uzroŭni, piša «SE».

Bialajeva praz raniejšy dośvied viedała, što ŭkraincaŭ doŭha praviarajuć na miažy, tamu kamanda vyrašyła vyjechać na niekalki dzion raniej. Letaś paśla dbajnaj pravierki Taćcianu ŭ Rasieju puścili. Hetym razam trapić na spabornictvy Bialajevaj nie ŭdałosia.

«Fihurysty prajšli miažu, pajechali ŭ hatel zasialacca. A mianie ŭ hetym hodzie naohuł nie prapuścili! Nu i navošta ŭ hetaj situacyi kazać, što sport pa-za palitykaj, kali lacić trenier z delehacyjaj, sa spartsmienami, z kamandzirovačnym paśviedčańniem i kvitkami nazad, z zaprašeńniem ad rasijskaha boku i majecca dazvoł na žycharstva ŭ Respublicy Biełaruś?

Pratrymali mianie siem hadzin u aeraporcie, vydali papieru ab «vydvareńni» z terytoryi Rasii. Słova to jakoje! Dziakuj, što ŭ rasiejskim fihurnym katańni jość siabry i maich dziaciej nie kinuć u hetaj składanaj dla ich situacyi», — raskazała Bialajeva.

Pamiežniki paraili treniercy nie jeździć u Rasiju.

«Mnie było skazana, što da zakančeńnia SVA navat nie sprabujcie ŭjazdžać u Rasiju, heta bieskarysna.

Ja pieražyvu, ale spartsmieny ŭ hetaj situacyi pakutujuć bolš za ŭsio, a ŭ ich ciapier i tak składany pieryjad. Kali ŭsio pačynałasia ŭ 2022-m, mnie pastupali prapanovy papracavać za miažoj na Zachadzie, źjechać — ale ja, jak čałaviek, addany svajoj spravie i spartsmienam, zastałasia tut, kab praciahvać zajmacca raźvićciom tancaŭ na lodzie ŭ Biełarusi. U i biez taho składanaj abstanoŭcy pakidać spartsmienaŭ biez padtrymki nastaŭnika niapravilna», — zajaviła Bialajeva. 

Jana adznačyła, što rasiejcy «nie tam šukajuć vorahaŭ» i paabiacała źviarnucca da funkcyjanieraŭ, kab jany raźviazali hetuju prablemu.

Hramadzianie Ukrainy paśla pačatku poŭnamaštabnaj vajny majuć prava ŭjazdžać u Rasiju tolki praz pavietrany punkt propusku ŭ maskoŭskim aeraporcie «Šaramiećcieva». Tam ich čakaje doŭhi dopyt, pravierka telefonaŭ i inšyja filtracyjnyja mierapryjemstva. Rašeńnie, ci puskać ukrainca ŭ Rasiju, prymaje kankretny siłavik, jaki pravodzić pravierku.

• 2
• 1
• 0
• 0
• 0
• 0
• 1
• 0