19—20 kastryčnika ŭ Bierlinie, u prastory Hotel Continental — Art Space in Exile pa adrasie Elsenstraße 87 adbudziecca fiestyval intelektualnaj knihi Pradmova, jaki praciahnie tradycyju intelektualnych razmoŭ, dyskusij i litaraturnych sustreč.
Asnoŭnyja temy fiestyvalu zakranajuć pytańni sučasnaha hramadstva i kulturnaj identyčnaści: transfarmacyja instytuta hramadzianstva ŭ aŭtarytarnaj Biełarusi, moŭnaja dyskryminacyja i praktyki supracivu, paviedamlaje Bellit.info.
Fiestyval raspačniecca ŭ siońnia z uračystaha adkryćcia i prezientacyi vystavy pieramožcaŭ konkursu maładych ilustrataraŭ i dyzajnieraŭ knihi ART PRADMOVA.
Dyskusija «Novaje aŭtarytarnaje hramadzianstva: kanfarmizm, emihracyja, supraciŭ?» z udziełam ekśpiertaŭ Alaksieja Bratačkina, Viktara Šadurskaha, Aleny Aharełyšavaj budzie pryśviečanaja analizu taho, jak hramadstva Biełarusi źmianiajecca pad ciskam represij i jak hetyja źmieny ŭpłyvajuć na hramadzianskija pravy i abaviazki.
Na fiestyvali buduć pradstaŭlenyja biełaruskija i mižnarodnyja prajekty: adbuducca prezientacyja samvydat-zina Pamyłka, pryśviečanaha pryrodaznaŭčym i techničnym navukam, dyskusii pra biełaruski pierakład «Ilijady» i pierakłady biełaruskaj litaratury na zamiežnyja movy, litaraturnyja sustrečy z aŭtarami, jakija pracujuć u roznych žanrach — ad paezii da dramy i aŭtafikšn.
Jula Cimafiejeva pradstavić svaju paeziju i dramaturhiju, što stanie nahodaj dla dyskusii pra ŭsprymańnie biełaruskaj litaratury ŭ Jeŭropie; a «Volnyja kupałaŭcy»pakažuć śpiektakl «Zekamieron» pavodle ramana Maksima Znaka, napisanaha im u źniavoleńni.
Na bierlinskaj PRADMOVA adbudziecca šerah imprez z udziełam Alhierda Bachareviča, u tym liku abmierkavańnie niamieckaha pierakładu ramana «Sabaki Eŭropy» i prezientacyja novaj knihi «Papiarovy holem», što abiacaje stać adnoj ź jarkich litaraturnych padziej fiestyvalu. Asobnaj padziejaj stanie i dyskusija «Pieśni lubovi i nianaviści» z udziełam Śviatłany Aleksijevič i Alhierda Bachareviča. Maderataram vystupić Andrej Chadanovič. U časie razmovy ŭdzielniki abmiarkujuć, jak u sučasnym śviecie, napoŭnienym nianaviściu i kanfliktami, tvorcy vykarystoŭvajuć svoj hołas, kab vykazać biaźmiežnuju luboŭ i rasčaravańnie, hnieŭ i nadzieju.
Fiestyval praciahniecca ŭ niadzielu 20 kastryčnika. Asablivaja ŭvaha budzie nadadzienaja temie palityčnych represij i litaratury, stvoranaj u ekstremalnych umovach. Panelnaja dyskusija «Jeŭrapiejski Panoptykum XXI stahodździa» budzie pryśviečanaja asensavańniu dośviedu turemnaha źniavoleńnia i hvałtu ŭ sučasnaj Biełarusi ŭ paraŭnańni ź jeŭrapiejskimi represiŭnymi praktykami XX stahodździa.
Na praciahu dvuch dzion PRADMOVA stanie placoŭkaj dla aktyŭnaha abmierkavańnia sučasnych vyklikaŭ dla biełaruskaj kultury, a taksama prablem, źviazanych z pravami čałavieka i svabodaj słova.
Udzielniki i ŭdzielnicy zmohuć pahłybicca ŭ litaraturnyja i intelektualnyja pytańni, sustrecca ź viadučymi aŭtarami, siarod jakich Prahrama fiestyvalu ŭklučaje i muzyčnyja imprezy, u tym liku kancert Lavona Volskaha i Ketevan.
Asobnaj padziejaj fiestyvalu stanie varštat «Voices Unbound: stvareńnie zinaŭ na temy movy i niebinarnaści», arhanizavany inicyjatyvami Fem*Bridging Cultures, Europäische Medien Initiative i Fem.Cultural Network. Udzielniki i ŭdzielnicy hetaj sustrečy zmohuć pahłybicca ŭ temu niebinarnaści movy i tvorča adlustravać svaje razvažańni ŭ formie zinaŭ.
Prahrama całkam dastupnaja na sajcie pradmova.eu.
Miesca praviadzieńnia: Bierlin, prastora Hotel Continental — Art Space in Exile pa adrasie Elsenstraße 87 (źviarnicie ŭvahu, što niekatoryja mierapryjemstvy projduć u inšych łakacyjach).
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary4
Kamientary
Cikava, što było b