Polskija daktary dastali ź biełarusa kulu, jakoj u jaho stralali ŭ 2020 hodzie

Adsiedzieŭšy termin, mužčyna źbieh u Litvu, pierapłyŭšy pamiežnuju raku, i paprasiŭ ab mižnarodnaj abaronie. A potym u Polščy pakazaŭ doktaru ruku, traŭmavanuju pry zatrymańni. Akazałasia, u ruce zatrymaŭsia askołak šrotu. Jaho dastali praz čatyry hady paśla ranieńnia. Svaju historyju Jahor raspavioŭ prajektu Most «My vierniemsia».

U 2020 hodzie Jahor znachodziŭsia ŭ zakrytym čacie, u jakim było ŭsiaho 11 čałaviek. Akazałasia, siarod ich byli padbuchtorščyki z MUS. Chtości ź ich zakinuŭ u čat ideju — sapsavać mašynu siłavika. Jahor paddaŭsia na pravakacyju. Mašynu padrapali, pafarbavali z bałončyka biełaj i čyrvonaj farbaj, zapienili. Akazałasia, siłaviki spłanavali apieracyju dla nastupnaj publikacyi materyjału ab vychadcy ŭ prapahandysckich miedyja.

Pry zatrymańni Jahora paranili šrotam z pompavaj strelby. Paśla na ciele jon vyjaviŭ kala 18 ranieńniaŭ.

Adsiedzieŭšy try hady, Jahor spačatku nie płanavaŭ pakidać Biełaruś. Ale nieŭzabavie zrazumieŭ, što zastavacca ŭ krainie dla jaho ryzykoŭna: spakojnaha žyćcia siłaviki jamu nie daduć. U mužčyny była humanitarnaja polskaja viza, ale jon vyrašyŭ nie pierasiakać miažu praz aficyjny pamiežny pierachod. Ź jahonych słoŭ, pakinuć krainu lehalna nie było mahčymaści, bo da ŭdzielnikaŭ hrupy byŭ padadzieny pazoŭ strachavoj kampanii.

Jahoru pryjšłosia pierapłyvać raku na miažy ź Litvoj. Byŭ cakavik, śnieh užo rastaŭ, ale vada była jašče chałodnaj.

Kab padrychtavacca da ŭciokaŭ, Jahor napaŭniaŭ vannu ledzianoj vadoj i siadzieŭ u joj.

Pakolki ŭ Jahora była polskaja viza, Litva pa Dublinskim pahadnieńni pieradała jaho Polščy.

U kancy žniŭnia ŭ Biełastoku Jahor źviarnuŭsia da chirurha i raspavioŭ svaju historyju. Biełarus skardziŭsia, što ŭ jaho na ruce hłyboka pad skuraj utvaryŭsia buharok. Chirurh pravioŭ abśledavańnie i pryjšoŭ da vysnovy, što ŭ ruce zatrymaŭsia askołak i spatrebicca apieratyŭnaje ŭmiašańnie.

— Ja nie vieryŭ i kazaŭ, što heta małavierahodna. U 2020 hodzie paśla zatrymańnia mianie advieźli ŭ balnicu, tam apracavali rany i zašyli. Ja nie moh padumać, što ŭ mianie zastanucca niejkija askiepki. Ale ŭsio ž navažyŭsia na apieracyju. I sapraŭdy, doktar znajšoŭ u mianie askołak u vyhladzie humovaha šaryka, jaki nie znajšli ŭ Biełarusi.

Hety šaryk miedyki addali Jahoru na pamiać. Chutčej za ŭsio, u Biełarusi jaho nie znajšli, bo tady ruka mocna raspuchła.

• 1
• 0
• 0
• 0
• 0
• 3
• 0
• 0