Rasija tajemna stvaraje ŭ Kitai novyja madeli bieśpiłotnikaŭ, u tym liku kopii amierykanskich BPŁA Reaper

Jak daviedałasia ahienctva Reuters, rasijski abaronny kancern «Ałmaz-Antej» i jaho daččynaje pradpryjemstva Ižeŭski elektramiechaničny zavod «Kupał» praz pasiarednictva rasijskaj kampanii TSK Vektor stvaryli i praviali na terytoryi Kitai lotnyja vyprabavańni novaj madeli ŭdarnaha bieśpiłotnika «Harpija-3».

Va ŭsich etapach im dapamahali kitajskija śpiecyjalisty i kitajskaja kampanija Redlepus TSK Vector Industrial, jakaja znachodzicca ŭ horadzie Šeńčžeń, vyśvietliła ahienctva.

Pavodle ŭnutranych spravazdač «Kupała», jakija jość u rasparadžeńni Reuters, novyja bieśpiłotniki «Harpija-3» źjaŭlajucca madernizavanaj viersijaj rasijskich dronaŭ «Harpija-A1» (palepšanaja viersija viadomych «šachiedaŭ»). Novaja madel moža pieraadolvać adlehłaść kala 2 tysiač kiłamietraŭ i pieranosić karysnuju nahruzku vahaj 50 kiłahramaŭ. Hatovyja ŭzory «Harpij-3» i niekatorych inšych madelaŭ bieśpiłotnikaŭ, vyrablenych u Kitai, byli dastaŭleny ŭ Rasiju dla dalejšaha testavańnia z pryciahnieńniem kitajskich ekśpiertaŭ, skazana ŭ dakumientach «Kupała».

Havoračy ab inšych madelach bieśpiłotnikaŭ, va ŭnutranych rasijskich dakumientach napisana, što «na praciahu vaśmi miesiacaŭ prajekt u Kitai budzie hatovy da vytvorčaści ŭdarnaha BPŁA kitajskaj raspracoŭki RAM 1 z karysnaj nahruzkaj 400 kh». Dźvie krynicy ŭ jeŭrapiejskich vyviedkach raskryli Reuters, što drony RAM 1 buduć padobnyja da amierykanskich bieśpiłotnikaŭ Reaper.

Krynicy taksama padkreślivajuść, što pastaŭka ŭzoraŭ bieśpiłotnikaŭ na zavod «Kupała» źjaŭlajecca pieršym kankretnym dakazanym vypadkam z pačatku poŭnamaštabnaj vajny va Ukrainie, što vyrablenyja ŭ Kitai sistemy ŭzbrajeńniaŭ u hatovym vyhladzie byli dastaŭlenyja ŭ Rasiju.

Pavialičyć

Akramia taho, inšy ŭnutrany dakumient raskryvaje płany z udziełam rasijskaha TSK Vektor i kitajskaj Redlepus pa stvareńniu sumiesnaha rasijska-kitajskaha daśledčaha i vytvorčaha centra bieśpiłotnych aparataŭ u kitajskaj pravincyi Sińczian. Novy centr płoščaj 80 hiektaraŭ budzie zdolny vyrablać da 800 bieśpiłotnikaŭ u hod dla patreb rasijskaj armii. Terminy ŭvodu centra ŭ ekspłuatacyju ŭ dakumiencie nie ŭkazvalisia.

Reuters adznačaje, što ŭsiaho atrymała piać unutranych dakumientaŭ rasijskaha VPK, uklučajučy dźvie spravazdačy «Kupała», adasłanyja ŭ Minabarony za pieršaje paŭhodździe 2024 hoda, i dva rachunki-faktury, jakija paćviardžajuć isnavańnie tajemnaha rasijskaha prajekta ŭ Kitai pa vytvorčaści bieśpiłotnikaŭ dla vykarystańnia va Ukrainie. Raniej ab hetaj prahramie nidzie nie paviedamlałasia.

U dakumientach nie nazyvalisia imiony kitajskich śpiecyjalistaŭ, jakija ŭdzielničali ŭ tajemnym prajekcie Rasii, jak i nie paznačalisia dakładnyja miescy raźmiaščeńnia abjektaŭ u Kitai, źviazanych z vytvorčaściu rasijskich bieśpiłotnikaŭ, piša Reuters.

«Kupał», «Ałmaz-Antej», TSK Vektor, kitajski Redlepus i Ministerstva abarony Rasii praihnaravali prośby žurnalistaŭ Reuters prakamientavać ich rasśledavańnie.

Ministerstva zamiežnych spraŭ Kitaja, u svaju čarhu, paviedamiła ahienctvu, što ničoha nie viedaje pra sakretnuju raspracoŭku rasijskich bieśpiłotnikaŭ na svajoj terytoryi, dadaŭšy, što ŭ krainie dziejničajuć strohija miery kantrolu za ekspartam bieśpiłotnych latalnych aparataŭ.

Abaronnyja pradpryjemstvy «Kupał» i «Ałmaz-Antej», aproč inšaha, aktyŭna absłuhoŭvajuć biełaruskaje Minabarony, pastaŭlajučy ŭ našu krainu roznyja vidy ŭzbrajeńniaŭ, asabliva sistemy supraćpavietranaj abarony, takija jak ZRK «Tor-M2» i rakietnyja kompleksy «S-300».

U lipieni japonskaja miedyjakarparacyja Nikkei Asia pry dapamozie abjadnańnia byłych biełaruskich siłavikoŭ «Biełpoł» vyjaviła schiemu pastavak z Kitaja ŭ Biełaruś detalaŭ dla rakiet i bombaŭ, jakija potym vykarystoŭvajucca rasijskaj armijaj suprać Ukrainy. 

Kitajskija i biełaruskija sałdaty na sumiesnych vučeńniach kala miažy z Polščaj i Ukrainaj. Fota: Minabarony Biełarusi

Pavodle rasśledavańnia, 1 śniežnia 2023 hoda kitajskaja kampanija Green Cycle Energy atrymała ad biełaruskaha abaronnaha padradčyka «BiełOMA» zakaz na pastaŭku 3000 kampanientaŭ dla łaziernaha modula LAD-21T. Hety najnoŭšy modul užyvajecca ŭ bombach i rakietach z łaziernym naviadzieńniem.

Płaciež pa dadzienaj damovie byŭ zrobleny ŭ juaniach. U apieracyi ŭdzielničaŭ šanchajski filijał rasijskaha dziaržaŭnaha banka VTB. 16 lutaha hetaha hoda Green Cycle Energy i «BiełOMA» padpisali novy kantrakt na sumu jašče 5,56 miljona juaniaŭ (764 tysiačy dalaraŭ) na zakupku ŭsio tych ža kampanientaŭ.

Jašče adna kitajskaja kampanija Morotack Technology 1 lutaha padpisała z rahačoŭskim zavodam «Dyjaprajektar» (naležyć chołdynhu «BiełOMA») kantrakt na pastaŭku 200 adzinak kamplektujučych, zvanych «fłancami», jakija taksama važnyja dla sistem naviadzieńnia. Suma ździełki skłała 114 tysiač juaniaŭ (15,5 tysiačy dalaraŭ), apieracyju pravodzili biełaruskija i kitajskija banki.

2 maja «Dyjaprajektar» iznoŭ zakazaŭ hetyja detali ŭ Morotack Technology.

Akramia taho, jak paviedamlaje Nikkei Asia, «Dyjaprajektar» 20 lutaha i 20 sakavika atrymlivaŭ šmatlikija kitajskija łaziernyja kampanienty ad rasijskaj kampanii Precision Laser Systems na sumu amal 500 tysiač dalaraŭ. Dalej biełaruski zavod pieradavaŭ ich «Pielenhu», a toj užo pieradavaŭ stvoranyja moduli naviadzieńnia i pryceły rasijskaj armii.

U toj ža čas blizki da Łukašenki biznesmien Alaksandr Šakucin zakuplaje detali dla rasijskich tankaŭ praz Kitaj u Tajvania i Japonii.

• 1
• 0
• 0
• 0
• 0
• 0
• 7
• 0