Apple prezientavała liniju novych ajfonaŭ sa štučnym intelektam
Kampanija Apple u paniadziełak pakazała novaje pakaleńnie ajfonaŭ z ubudavanymi technałohijami hienieratyŭnaha štučnaha intelektu ŭ sprobie pavialičyć prodažy svaich pryład i pakazać, što jana nie adstaje ad kankurentaŭ u technałahičnaj honcy.
Na štohadovaj vosieńskaj prezientacyi ŭ svajoj kalifarnijskaj štab-kvatery Apple pakazała liniju novych iPhone 16 i 16Pro, a taksama abnoŭlenyja madeli razumnych hadzińnikaŭ Apple Watch i navušnikaŭ AirPods, piša Bi-bi-si.
Kampanija zajaviła, što jaje novyja smartfony, jakija asnaščanyja daŭhaviečnymi akumulatarami i bolš mahutnymi čypami, stali pieršymi pryładami, raspracavanymi śpiecyjalna dla pracy sa štučnym intelektam i naboram funkcyj Apple Intelligence, jaki byŭ pradstaŭleny na kanfierencyi raspracoŭščykaŭ u červieni.
Hienieralny dyrektar kampanii Apple, Cim Kuk skazaŭ, što abnaŭleńnia «pašyryć miežy taho, što smartfon moža zrabić».
«My rady pradstavić pieršyja iPhone, raspracavanyja z nula dla Apple Intelligence i jaho praryŭnych mahčymaściaŭ», — skazaŭ jon.
Prodažy iPhone — asnoŭnaha praduktu Apple, na jaki prypadajuć kala pałovy ŭsich prodažaŭ, — zamarudzilisia ŭ apošnija miesiacy. Kampanija ŭskładaje vialikija nadziei na novyja smartfony.
Pry hetym technałohii Apple Intelligence buduć dastupnyja ŭ viersii apieracyjnaj sistemy iOS 18.1, jakaja vyjdzie ŭ kastryčniku, i pakul tolki na anhlijskaj movie. Inšyja movy źjaviacca paźniej.
Start prodažaŭ novych ajfonaŭ zapłanavany na 20 vieraśnia.
U paniadziełak byli pradstaŭleny novyja razumnyja hadzińniki Apple Watch Series 10 i Ultra 2, a taksama navušniki AirPods 4 i abnoŭlenyja AirPods Max.
Kampanija zajaviła, što praviersiju AirPods možna budzie vykarystoŭvać u jakaści słychavoha aparatu ludziam ź lohkaj abo ŭmieranaj strataj słychu.
Hetaja funkcyja čakaje adabreńnia adpaviednych orhanaŭ i stanie dastupnaja vosieńniu bolš čym u 100 krainach.
«Skazaŭ: ja tut ničoha prasić nie budu». Žonka raskazała, jak Vieramiejčyka pryznali pahrozaj u Litvie17
Kamientary