Vyzvaleńniem novaj hrupy palitviaźniaŭ Łukašenka pasyłaje jašče adzin sihnał. Kamu i navošta?
Raściahnutaje ŭ časie vyzvaleńnie palitviaźniaŭ, jakoje faktyčna pieratvaryłasia ŭ palityčnuju kampaniju, patrebna ŭładam dziela dasiahnieńnia peŭnych metaŭ. Jano najpierš śviedčyć pra toje, što ciapierašni status-kvo nie zadavalniaje isny režym. Čamu? Piša na «Radyjo Svaboda» Valer Karbalevič.
Jak i było anansavana, vyzvalena jašče 37 palitźniavolenych. Alaksandr Łukašenka 16 vieraśnia padpisaŭ ukaz ab pamiłavańni napiaredadni śviatkavańnia «Dnia narodnaha adzinstva». Havorka idzie pra hramadzian, asudžanych za złačynstvy «ekstremisckaj nakiravanaści».
Heta ŭžo čaćviortaja hrupa biełaruskich palitviaźniaŭ, vyzvalenych ź lipienia 2024 hoda. Ahułam Łukašenka pamiłavaŭ 115 palitźniavolenych. Jak aceńvajuć pravaabaroncy, pavodle stanu na 14 vieraśnia ŭ Biełarusi było 1344 palitviaźni.
Admietna, što Łukašenka pieryjadyčna zajaŭlaje, što ŭ Biełarusi nibyta niama palitviaźniaŭ, bo ŭ Kryminalnym kodeksie adsutničajuć «palityčnyja» artykuły.
Tym nie mienš, vyzvaleńnie palitźniavolenych abstaŭlena tak, kab usie źviarnuli na heta ŭvahu.
Kali b ułady imknulisia niejak schavać vychad na volu praciŭnikaŭ režymu (bo, maŭlaŭ, «palitviaźniaŭ u nas niama»), to možna było b hety praces zamaskavać. Naprykład, vyzvalić ich u ramkach zakonu ab amnistyi, jakaja adbyłasia ŭ pieršaj pałovie hoda i była prymierkavanaja da 80-hodździa vyzvaleńnia Biełarusi ad niamieckaj akupacyi. I tady palitviaźni zhubilisia b siarod značnaj kolkaści inšych amnistavanych. Adnak tady ŭłady admysłova padkreślivali, što amnistyja nie budzie tyčycca palitźniavolenych (to bok tych, chto asudžany «za ekstremizm i teraryzm»).
U vyniku «palityčnyja» vyzvalajucca na padstavie nie amnistyi, a pracedury pamiłavańnia. Pryčym hety praces nabyŭ rysy palityčnaj kampanii. U kałonii pryjazdžała načalstva (pradstaŭniki prakuratury), nastojliva patrabavała ad viaźniaŭ pisać chadajnictvy ab pamiłavańni. Prapahandyst Juryj Vaskrasienski abtelefanoŭvaŭ svajakoŭ palitviaźniaŭ i ahitavaŭ ich uhavorvać blizkich pisać padobnyja zajavy.
Ułady mahli vyzvalić hetych 115 palitviaźniaŭ adrazu, adnym ukazam — jakraz napiaredadni novaha «śviata» 17 vieraśnia. Adnak vyrašyli rabić heta porcyjami, raździalili na čatyry hrupy. Vyzvaleńnie adbyłosia paetapna — u lipieni, žniŭni i vieraśni.
Raściahnuli na try miesiacy, kab bolš pryciahnuć uvahu da hetaha pracesu. Kab usie, kamu treba, ubačyli ci pačuli hety sihnał.
To-bok hetaje raściahnutaje ŭ časie vyzvaleńnie, jakoje faktyčna pieratvaryłasia ŭ palityčnuju kampaniju, dziela niečaha patrebna isnamu režymu.
Jano najpierš śviedčyć pra toje, što ciapierašni status-kvo nie zadavalniaje ŭłady. Čamuści jon dla Łukašenki nie kamfortny.
Choć vonkava, zdavałasia b, usio idzie narmalna: raście ekanomika, padvyšajucca zarobki, apazicyja i hramadzianskaja supolnaść źniščanyja, zamiežnyja pahrozy niejtralizavanyja, nijakich chmaraŭ na palityčnym niebaschile, jakija mahli b sapsavać kampaniju prezidenckich vybaraŭ, nie bačna.
I tym nie mienš situacyja z palitviaźniami niečym mulaje Łukašenku. Jon chacieŭ by atrymać niejkuju dadatkovuju strachoŭku — mahčyma, realizavać «płan B» na ŭsialaki vypadak. Tamu i pasyłaje hučny sihnał unutranaj i vonkavaj aŭdytoryi.
Kali havaryć pra vonkavych subjektaŭ, to sens hetaha sihnału palahaje ŭ tym, što Łukašenka hatovy da torhu. Maŭlaŭ, prapanovy prymajucca: rabicie vašy staŭki.
Bort Łukašenki z-za techničnych prablem viarnuŭsia ŭ Minsk bieź jaho16
Kamientary