«Milicyjanier ciaham usiaho pracesu hulaje ŭ telefon». Pačytali vodhuki na biełaruskija sudy
U internet-kartach možna znajści vodhuki ledź nie na što zaŭhodna, u tym liku na biełaruskija sudy. Voś što tam pišuć.
Pačniem ź minskich sudoŭ. Užo ŭ vodhukach na ich jość niamała historyj drennaha staŭleńnia da ludziej.
Adna karystalnica raskazała, što ŭ sudzie Centralnaha rajona Minska zhubili jaje zajavu. Jana padała skarhu, i tady supracoŭniki suda pačali joj aktyŭna zvanić z prośbaj adklikać skarhu. Ale ž biełaruska vyrašyła dačakacca adkazu pa skarzie. Kali jana atrymała adkaz, joj padałosia, što ŭ im supracoŭniki suda abvinavacili ŭ zhubie skarhi vypadkovaha čałavieka.
I heta nie adziny sumny kamientar pra minskija sudy — takich, što pradkazalna, bolšaść:
«Pisaŭ zajavu adnu. Skazali, što ciaham dvuch tydniaŭ razhledziać. U vyniku prajšoŭ miesiac, zajavu navat sudździ nie pieradali. Prosta vykinuli» (sud Centralnaha rajona).
«Ahidnaje miesca! Nie była tam, ale z majho rachunku raptoŭna z-za ich źniali 4410 biełaruskich rubloŭ za štraf, jaki byŭ spłačany ŭ 2016 hodzie, 2016 Karł! […] Dziaŭčyna, jakaja adpraŭlała list, ni pra što nie choča hutaryć i pryznavać svaju vinu, a toje, što čałaviek dva dni z sercam pakutavaŭ i jašče try dni raźbiraŭsia i pakutavaŭ, heta mała kaho chvaluje!» (sud Leninskaha rajona).
«U našaj krainie paŭsiul patrebny błat, a jašče lepš siastła. Biez błatu nikudy nie varta sunucca. Dva miesiacy razhladali zajavu, a ŭ vyniku ŭvohule admovili ŭ razhladzie ŭ suviazi z zakančeńniem terminu, dadzienaha dla vypraŭleńnia niedachopaŭ» (sud Maskoŭskaha rajona).
Fota: Hienprakuratura
«Milicyjanier-achoŭnik, jaki ciaham usiaho pracesu hulaje ŭ telefon, što schavany na stale ŭ jaho kiepcy. Sakratar z sudździoj, jakija karotkimi skazami i znakami abmiarkoŭvajuć manikiur na rukach abvinavaŭcy, i jakija ŭśmichajucca ŭ toj čas, pakul vyrašajuć los čałavieka. Jak brydka heta ŭsio vyhladaje z boku» (sud Savieckaha rajona).
Dziela spraviadlivaści dadadzim, što možna znajści adzinkavyja stanoŭčyja vodhuki pra taho ci inšaha sudździu, pryčym nie zaŭsiody isnujuć danyja, što hetyja sudździ prymali ci prymajuć udzieł u represijach. A časam karystalniki pišuć dobraje i pra inšych supracoŭnikaŭ sudoŭ — maŭlaŭ, i ŭ hetaj sistemie jość miesca čałaviečnaści.
Ź inšaha boku, šmat pišuć i pra niespraviadlivaść u sudach, a taksama pra niekampietentnaść supracoŭnikaŭ. Asobnaja historyja — staŭleńnie da naviedvalnikaŭ: biełarusy skardziacca, što im ciažka dazvanicca ŭ sudy, što supracoŭniki sudoŭ hruba ź imi hutarać, nie dapamahajuć abo nie zdolnyja dapamahčy z pošukam infarmacyi i inšymi patrebnymi rečami.
A što ŭ rehijonach? Siarod vodhukaŭ na abłasnyja sudy šmat abstraktnaha abureńnia ŭ duchu «praŭdy tut nie šukajcie». Ale jość i kankretnyja pretenzii. Naprykład, pra sud Leninskaha rajona (Mahiloŭ) pišuć, što tam sudździ prymajuć nieabjektyŭnyja rašeńni i słuchajuć tolki adzin bok.
My znajšli kamientar pra ŭmovy padčas samoha pasiadžeńnia — jon datyčyć Hrodzienskaha abłasnoha suda: «Ćviordyja draŭlanyja łaŭki dla ŭdzielnikaŭ. Adzinaja prybiralnia ŭ padvale».
Voś niekalki inšych historyj z rehijanalnych sudoŭ:
«Dasłali list na imia majho poŭnaha ciozki. Na moj zvanok u sud adkazali — maŭlaŭ, nie chvalujciesia, pamyłačka, niačyścik zbłytaŭ. Vypravili pamyłačku. U mužyka chatu kałhas adsudziŭ, a mnie 32 rubli dziaržpošliny» (sud Bresckaha rajona).
«Pryjšli na pasiadžeńnie suda, nas tam navat nichto nie słuchaŭ! Tvary niezadavolenyja, a samaje cikavaje, što rašeńnie suda było vyniesienaje za 1 chvilinu: nie paśpieli vyjści za dźviery, jak viarnulisia ŭ zału i začytali, padobna, što zahadzia było napisanaje» (Homielski abłasny sud).
«Sudździa była zacikaŭlenaja ŭ vyniku spravy, mahčymy karupcyjny składnik. Budu źviartacca ŭ adpaviednyja orhany, kab praviali pravierku» (sud Savieckaha rajona, Homiel).
Sustrakajucca i vodhuki z humaram:
«Pastaviŭ piać zorak, pasłuhami nie karystaŭsia — tak, na ŭsiaki vypadak!» (sud Savieckaha rajona Minska).
«Kłasnaje miesca, ledź nie pasadzili» (sud Minskaha rajona).
«Naša Niva» — bastyjon biełaruščyny
PADTRYMAĆBort Łukašenki z-za techničnych prablem viarnuŭsia ŭ Minsk bieź jaho16
Kamientary
Dziaržabnym ža ŭstanovam - jak nia łysyja.
Nu źviarniciesia da nas pa achovu pravoŭ spažyŭcoŭ.