Pieršaja łedzi Francyi — vialikaja prychilnica «Emili ŭ Paryžy».
Pieršaja łedzi Francyi Bryžyt Makron źjaviłasia ŭ epizadyčnaj roli ŭ novym siezonie papularnaha kamiedyjnaha sieryjała «Emili ŭ Paryžy». U čaćvier na płatformie Netflix vyjšła druhaja častka čaćviortaha siezona. Žonka prezidenta Francyi źjaviłasia na ekranach u 7-j sieryi, piša Bi-bi-si.
Pavodle siužetu, žycharka Čykaha Emili Kupier (jaje hraje brytana-amierykanskaja telezorka Lili Kolinz) pierajazdžaje ŭ Paryž. Sieryjał zavajavaŭ mnostva prychilnikaŭ, ale ŭ toj ža čas padvierhnuŭsia krytycy: toje, jak u sieryjale pradstaŭlena francuzskaja stalica, mnohim zdałosia zališnie stereatypnym.
Bryžyt Makron, jakoj sioleta spoŭniŭsia 71 hod, źjaviłasia na ekranie ŭ roli siabie samoj — u karotkaj scenie ŭ restaranie, dzie Emili robić sełfi ź pieršaj łedzi.
Pra toje, jak naradziłasia ideja kamiea (tak nazyvajecca źjaŭleńnie viadomaha čałavieka na ekranie ŭ roli siabie samoha) dla žonki francuzskaha prezidenta, raspavioŭ u pačatku hetaha tydnia žanočy časopis Elle.
Pa słovach Lili Kolinz, sprava była ŭ śniežni 2022 hoda ŭ Jelisiejskim pałacy (aficyjnaj rezidencyi prezidenta Francyi), kudy Bryžyt Makron zaprasiła jaje razam sa stvaralnikam sieryjała Darenam Staram.
U pieršym siezonie sieryjała zhadvajecca, što pieršaja łedzi padzialiłasia postam Emili ŭ Instagram, dzie taja vykazvała svajo rasčaravańnie z nahody taho, što ŭ francuzskaj movie słova vagin — «Vahina» — mužčynskaha rodu.
«Jana vialikaja prychilnica sieryjała i ŭspryniała zhadku pra siabie ŭ pieršym siezonie ź vialikim humaram», — raspaviała Kolinz u intervju Elle.
«Novaja scena, u čaćviortym siezonie — našy pieramihvańni ź joj na zdymačnaj placoŭcy — dla mianie vielizarny honar i sapraŭdnaje zadavalnieńnie».
Kolinz zajaviła, što ŭ pieršaj łedzi Francyi vialikija akciorskija zdolnaści.
U čaćviortaj sieryi ŭ momant, kali Emili (Kolinz) padychodzić da Bryžyt Makron, taja siadzić u restaranie ŭ kampanii dźviuch inšych žančyn.
Na hierainiu idzie ciełaachoŭnik, ale taja tłumačyć, što jana aŭtar Instagram-akaŭnta Emily in Paris, i pieršaja łedzi žestam adpuskaje achovu.
Paśla karotkaha abmienu replikami Emili robić z Bryžyt Makron sełfi i vykładvaje jaho ŭ Instagram, dadaŭšy da jaho chešteh #makeiticonic — łozunh prezidenta Makrona, nakiravany na pryciahnieńnie ŭ Francyju zamiežnych inviestaraŭ.
Sieryjał viadomy svajoj vialikaj uvahaj da mody i źniešniaha vyhladu, adnak Netflix paćvierdziŭ ahienctvu AFP, što na zdymačnaj placoŭcy pieršaja łedzi była ŭ svajoj zvyčajnaj vopratcy i «nie atrymlivała z hetaj nahody nijakich asablivych instrukcyj».
Pa słovach Kolinz, Bryžyt Makron sama źviarnułasia da jaje i Stara z prośbaj źjavicca ŭ sieryjale — «heta byŭ poŭny adpad».
Zrešty, aficyjna Jelisiejski pałac prainfarmavaŭ francuzskija ŚMI, što nasamreč prośba była ad pradziusaraŭ šou.
Bryžyt Makron maje vopyt akciorskaj ihry. Mienavita hety pradmiet jana vykładała ŭ siaredniaj škole ŭ 1993 hodzie, kali ŭpieršyniu sustreła budučaha prezidenta Francyi, jakomu tady było 15 hadoŭ. Praź jašče 14 hadoŭ jany pažanilisia.
U 2018 hodzie Bryžyt Makron źniałasia ŭ šou Vestiaires, francuzskim kamiedyjnym sieryjale pra dvuch płyŭcoŭ ź invalidnaściu. Akramia taho, u hetym hodzie było abvieščana ab stvareńni šaścisieryjnaha dakumientalnaha sieryjała pra jaje žyćcio.
Sieryjał «Emili ŭ Paryžy», jaki vyjšaŭ na ekrany ŭ 2020 hodzie, krytykavali za dalokuju ad realnaści vyjavu žyćcia francuzskaj stalicy, u jakoj jak byccam niama takich prablem, jak śmiećcie, złačynnaść i sacyjalnaja napružanaść.
Star vystupiŭ u abaronu svajho stvareńnia, zajaviŭšy, što jano pavinna było stać «luboŭnym listom Paryžu» — takomu, jakim jaho ŭbačyła Emili.
«Heta ž pohlad jaje vačyma, — patłumačyŭ jon u intervju ŭ 2020 hodzie, — tak što jana, viadoma ž, usiudy bačyć kliše. Ja chacieŭ zrabić šoŭ, jakoje b apiavała hety bok Paryža».
«Siarhiej» nie adzin. Voś jak KDB prapanuje zarabić na sačeńni za biełaruskimi emihrantami2
Kamientary