Adzinoki ŭzbudžany delfin napadaŭ na kupalščykaŭ u Japonii. Mahčyma, takich vypadkaŭ paŭsotni
Za apošnija try hady na niekalkich plažach Japonii paciarpieła kala 50 čałaviek. Ekśpierty padazrajuć, što napadnikam moža być adzin i toj ža delfin.
Jak piša The New York Times, pačynajučy z 2022 hoda, u zalivie Vakaas (prefiektury Fukui i Kijota), što prykładna za 200 milaŭ na zachad ad Tokia, ad napadaŭ delfinaŭ paciarpieła nie mienš za 47 čałaviek.
Adzin z paciarpiełych u 2022-m raspavioŭ, što płyŭ kala bieraha, kali delfin učapiŭsia jamu ŭ ruku, a potym pasprabavaŭ naskočyć źvierchu i ściahnuć pad vadu.
Pa słovach pradstaŭnika palicyi prefiektury Fukui, u 2023-m ahresiŭnaja žyviolina złamała kupalščyku rebry. Z 21 lipienia 2021 hoda ŭ vyniku napadaŭ delfinaŭ paciarpieli 16 čałaviek. Dvoje ź ich atrymali surjoznyja traŭmy ruk, na jakija pryjšłosia nakłaści dziasiatki švoŭ.
Čamu delfiny tak blizka padychodziać da bieraha? Jany ahresiŭnyja ci prosta hullivyja? Čamu hetyja napady praciahvajucca tak doŭha?
Pa słovach dyrektara akijanaryuma z pravincyi Fukui Roičy Macubara (Ryoichi Matsubara), miarkujučy pa fatahrafijach i videa niekatorych napadaŭ, chutčej za ŭsio, heta robić adzin i toj ža samiec indyjska-cichaakijanskaj afaliny.
Macubara zajaviŭ, što dziejańni delfina nahadvajuć šlubnuju hulniu. Tak na zapisach zaŭvažna, što jon sprabuje prycisnucca hienitalijami da ludziej.
Ź im zhodnaja vykładčyca i daśledčyca mora Putu Mustyka (Putu Mustika) z aŭstralijskaha Univiersiteta Džejmsa Kuka. Jana vykazała zdahadku, što napad na čałavieka moža być seksualnym aktam i prykmietaj taho, što heta ŭzbudžany, samotny delfin.
Pa jaje słovach, demanstrujučy svaje šlubnyja pavodziny, delfiny mohuć nienaŭmysna traŭmiravać ludziej svajoj vializnaj siłaj.
Čamu ž tady delfin kusaje ludziej? Pa słovach Mustyka, delfin moža być prosta ahresiŭnym pa charaktary i razdražniacca, kali da jaho sprabujuć dakranucca.
Zvyčajna delfiny — sacyjalnyja žyvioły, jakija prytrymlivajucca čarady. Ale nie redkaść i delfiny-adzinočki, jakija šukajuć kantakt z čałaviekam.
Jak paviedamlaje vydańnie, ułady pravincyi Fukui pryniali šerah mier, kab pasprabavać spynić napady. Tak jany ŭstalavali dziasiatki padvodnych akustyčnych pryład, jakija vydajuć vysokačastotny šum, pryznačany dla adpužvańnia delfinaŭ.
Na plažy raźviesili papieradžalnyja znaki, a tym, chto adpačyvaje, razdajuć ulotki, jakija papiaredžvajuć ab pahrozie z boku delfinaŭ. Na niekatorych plažach abmiežavali hadziny kupańnia. Tam ciapier pracujuć vyratavalnyja patruli.
Kamientary