Padatkaviki patłumačyli, čamu ŭźjelisia na 16-hadovuju siratu, jakaja pradavała ŭ Minsku harodninu
Učora padatkaviki raskazali pra 16-hadovuju siratu V., jakaja ŭ Minsku pradavała sadavinu i harodninu. Dziaŭčyna raskazvała, što biznes viadzie samastojna. «Tavary kuplaju na rynku ŭ Tabarach, adkul ich pryvodžu na taksi». Ale padatkaviki vyjavili, što tavary pradajucca nielehalna. Mnohija aburylisia, što siratu źbirajucca aštrafavać, zamiest taho, kab dapamahčy z pracaj. Padatkaviki apublikavali praciah historyi.
Padatkaviki paviedamili, što ŭ dziaŭčyny aryštavali i kanfiskavali 419 kh pradukcyi koštam 1 746 rub.
Jaje słovam pra samastojny biznes praviarajučyja orhany nie pavieryli. «Jana nie adkazała pa sutnaści ni na adno pytańnie: pa jakich cenach i ŭ kaho jana nibyta nabyvała pradukcyju; jak pradukcyja dastaŭlajecca na niezakonny punkt i jak vyvozicca; dzie składujecca», — pišuć padatkaviki ŭ svaim kanale.
«Zrazumieła, što jaje pryciahnuli da realizacyi darosłyja ludzi, ale bieź jaje pryznańnia našy padazreńni pavinny byli zastavacca pry nas. Jana ž, niahledziačy na ŭsiu niedarečnaść situacyi, uparta stajała na svaim. Sama, tak sama…» — dadali źniavažliva ŭ kanale.
Dziaŭčyna vučycca ŭ kaledžy. Piedahoh vyjazdžała na miesca raźbiralnictva. I paprakała siratu, što taja nie pajechała ŭ budatrad.
«Pierš za ŭsio spytała jaje: «Navošta ty zajmaješsia takimi spravami, a nie pajechała ŭ budatrad, jak usie?» I pačuła ŭ adkaz «A navošta ja budu tam za kapiejki karačycca!» Paśla čaho dadała, što ŭ internat načavać nie pryjdzie, bo źniała sabie kvateru», — taki dyjałoh pryvodzić padatkovaja.
Siracie pahražaje štraf pavodle častki 2 artykuła 13.3 KaAP za pradprymalnickuju dziejnaść bieź dziaržaŭnaj rehistracyi. Maksimalny štraf dla niepaŭnaletniaj — nie bolš za dźvie bazavyja vieličyni.
Kamientary