Słavakija i Vienhryja spyniajuć pampavać naftu praz trubapravod «Družba». Heta važna i dla Biełarusi
Vienhryja i Słavakija zajavili pra spynieńnie prapampoŭki nafty pa paŭdniovaj halincy naftapravoda «Družba». Abmiežavańni źviazanyja z uzmacnieńniem ukrainskich sankcyj u dačynieńni da rasijskaj kampanii «Łukojł». «Fłahštok» u suviazi z hetym piša, što heta moža stać katastrofaj dla homielskaha pradpryjemstva «Homieltransnafta».
![](http://d3kcf2pe5t7rrb.cloudfront.net/img/w840d4webp1/photos/z_2024_07/image669a8f9f42b12lg-59bze.jpeg.webp)
Ciapier trubapravod pampuje kala 1,1 młn ton nafty ŭ Hiermaniju i 5 młn ton u Vienhryju i Słavakiju. Kali dźvie apošnija admoviacca ad pasłuh biełaruskaha tranzitu, to naftapravod «Družba» budzie zahružanaja ŭsiaho na 2,6% ad maksimumu. U pradpryjemstva zastaniecca dla prapampoŭki tolki 1,2 młn ton kazachstanskaj nafty.
Na piku zahruzki ŭ 2020 hodzie «Homieltransnafta» absłuhoŭvała abjom da 45,5 młn ton nafty. Padzieńnie tranzitu pryviadzie da ekanamičnych prablem kampanii, u jakoj pracuje bolš za 1600 čałaviek.
Tym časam pres-sakratar Uładzimira Pucina Dźmitryj Piaskoŭ pryznaŭ, što z pastaŭkami rasijskaj nafty ŭ Słavakiju i Vienhryju pa naftapravodzie «Družba» składvajecca kryzisnaja situacyja.
«Ja nie dumaju, što ŭ nas jość mahčymaść ustupić u kantakt z ukrainskimi kampanijami, jakija zabiaśpiečvajuć tranzit. Dy i taksama, rašeńnie prymałasia nie na techničnym, a na palityčnym uzroŭni, tut niejki dyjałoh u nas adsutničaje», — skazaŭ Piaskoŭ, adkazvajučy na pytańnie, budzie Rasija na dziaržaŭnym uzroŭni sprabavać razbłakavać tranzit nafty ŭ Słavakiju i Vienhryju pa naftapravodzie «Družba» paśla admovy Ukrainy pierazaklučać kantrakt, ci budzie dapamahać krainam šukać alternatyŭnyja sposaby dastaŭki.
«Sapraŭdy, situacyja dosyć kryzisnaja dla našych atrymalnikaŭ, ale heta nijak nie zaležyć ad nas», — dadaŭ Piaskoŭ.
Kamientary