«Pa kodavym słovie «Barysaŭna» vykinuła ŭ akno €760 tysiač». 16-hadovy kurjer zabraŭ u dvaich piensijanieraŭ 2,7 młn rubloŭ

Junak šukaŭ padpracoŭku i adhuknuŭsia na prapanovu nieznajomaha internet-karystalnika za ŭznaharodžańnie aformić na svajo imia bankaŭskija karty. Pry hetym surazmoŭca zapeŭniŭ, što ničoha supraćzakonnaha niama. Pavieryŭšy padletak adkryŭ u roznych bankach čatyry rachunki, a paśla paviedamiŭ ich rekvizity, za što atrymaŭ 175 rubloŭ.

Paśla toj ža karystalnik prapanavaŭ chłopcu padzarabić jašče — patrabavałasia ŭ taksista zabrać bujnuju sumu (10 600 dalaraŭ) i pieradać jaje kryptavalutčyku. Junak pahadziŭsia i vykanaŭ daručeńnie, za što atrymaŭ 300 dalaraŭ. Akazałasia, hrošy naležali pažyłomu žycharu Salihorska, jakoha telefonnyja machlary pierakanali «zadekłaravać» źbieražeńni.

Praz tydzień «pracadaŭca» paprasiŭ fihuranta zabrać hrošy ŭ žycharki vulicy Rozy Luksiemburh — 76-hadovaja žančyna taksama stała achviaraj machlaroŭ.

Tyja telefanavali joj z zamiežnych numaroŭ, pradstaŭlalisia supracoŭnikami DFR i pierakonvali, što nieviadomyja z dapamohaj jaje pašpartnych źviestak sprabujuć pieravieści hrošy na sumnieŭnyja rachunki. Surazmoŭca nastojliva rekamiendavaŭ adpravicca ŭ najbližejšaje adździaleńnie banka i zadekłaravać usie najaŭnyja źbieražeńni, adnak žančyna admoviłasia vykonvać ukazańni.

Tady afierysty pačali pa čarzie nazvońvać minčancy pa videasuviazi, pakazvali svaje «paśviedčańni» i pierakonvali prysłuchacca da ich mierkavańnia. Jany prapanavali joj samim zabrać hrošy — usiaho patrabavałasia zaharnuć hrošy ŭ ručnik i pa kodavym słovie «Barysaŭna» ad pasylnaha vykinuć skrutak u akno.

Piensijanierku zadavoliŭ hety varyjant. Jana sabrała ŭsie siamiejnyja hrošy: 764 500 jeŭra, 5 300 dalaraŭ i 5 700 rubloŭ — i, dačakaŭšysia kamandy ad kurjera, skinuła jamu pakiet.

Chłopiec, atrymaŭšy pakiet z hrašyma, nakiravaŭsia ŭ kaviarniu na vuł. Maksima Bahdanoviča na sustreču z kryptavalutčykam. Pa ŭkazańni kuratara jon uziaŭ sabie ŭ jakaści ŭznaharodžańnia 5 700 rubloŭ, 700 jeŭra i 300 dalaraŭ.

Adnak hrošy da ašukancaŭ tak i nie patrapili — tam ža, u kaviarni, padletka zatrymali. Paśla ŭ dačynieńni da jaho raspačali kryminalnuju spravu. Vinu junak pryznaŭ častkova.

Chłopiec na momant ździajśnieńnia złačynstva navučaŭsia ŭ 10-m kłasie adnoj sa staličnych himnazij, raniej prablem z zakonam nie mieŭ.

Sud pryznaŭ jaho vinavatym u ździajśnieńni złačynstvaŭ, praduhledžanych č. 1 art.222 KK (niezakonny abarot srodkaŭ płaciažu i (abo) instrumientaŭ) i č. 4 art. 209 KK (machlarstva), i pryznačyŭ kančatkovaje pakarańnie ŭ vyhladzie pazbaŭleńnia voli na termin 3 hady i 6 miesiacaŭ sa štrafam 30 bazavych vieličyń (1 200 rubloŭ).

Adnak u adpaviednaści z č. 2 art. 77 KK sud adterminavaŭ vykanańnie pakarańnia na try hady, abaviazaŭšy abvinavačanaha nie mianiać miesca žycharstva biez zhody orhana, jaki ažyćciaŭlaje kantrol za pavodzinami, pieryjadyčna źjaŭlacca ŭ milicyju dla rehistracyi i nie vyjazdžać za miežy horada pa asabistych spravach na termin bolš za adzin miesiac.

• 1
• 0
• 7
• 0
• 7
• 4
• 1
• 0