Raiła bić nahoj u skivicu kožnamu maskvarotamu, nazyvała akupacyju Maryupala karmaj — chto takaja Iryna Faryjon, jakuju zabili ŭ Lvovie
Tym časam u śledstva dźvie asnoŭnyja viersii pa zabojstvie žančyny.
![](http://d3kcf2pe5t7rrb.cloudfront.net/img/w840d4webp1/photos/z_2024_07/faryjon_iryna240720-asv82.jpg.webp)
U śledstva dźvie asnoŭnyja viersii pa zabojstvie Iryny Faryjon u Lvovie.
«Asnoŭnyja viersii, jakija razhladajucca na hety momant: asabistaja niepryjaznaść, hramadska-palityčnaja dziejnaść spadaryni Faryjon. My nie vyklučajem, što zabojstva nosić zakazny charaktar», — skazaŭ kiraŭnik MUS Ukrainy Ihar Klimienka na načnym bryfinhu ŭ Lvovie.
Pavodle jaho słoŭ, kamiery na miescy zabojstva nie pracavali z-za pierabojaŭ sa śviatłom.
Nahadajem, što ŭ byłuju deputatku Viarchoŭnaj Rady ad partyi «Svaboda» stralali viečaram u piatnicu. Padčas zamachu jana atrymała ciažkoje ranieńnie i była špitalizavanaja, na momant pastupleńnia jaje stan byŭ vielmi ciažki. Bolš za try hadziny daktary zmahalisia za jaje žyćcio, ale ničoha zrabić nie zmahli. U 23.20 60-hadovaja Iryna Faryjon pamierła. Zabojca, pavodle apošnich źviestak, pakul nie zatrymany.
Chto takaja Iryna Faryjon
Iryna Faryjon była viadomaj abaroncaj ukrainskaj movy, fiłałahiniaj, prafiesaram, čalcom partyi «Svaboda». Jana nie raz traplała ŭ skandały z-za svaich rezkich vykazvańniaŭ u abaronu ŭkrainskaj movy, piša Bi-bi-si — Ukraina.
Faryjon naradziłasia i vyrasła ŭ Lvovie, atrymała fiłałahičnuju adukacyju i ŭsio žyćcio pracavała ŭ śfiery ŭkrainskaj fiłałohii, mieła navukovaje zvańnie doktara fiłałahičnych navuk i amal 30 hadoŭ vykładała ŭ Lvoŭskaj palitechnicy. Jana zajmała pasadu prafiesara kafiedry ŭkrainskaj movy.
Aktyŭnuju dziejnaść u kansiervatyŭna-nacyjanalistyčnaj «Svabodzie» Faryjon pačała ŭ pačatku «nulavych». Z 2006 hoda była deputatam Lvoŭskaj abłasnoj rady i rehularna bałatavałasia ŭ Viarchoŭnuju Radu. Ale ŭ parłamient zdoleła prajści tolki adzin raz u 2012 hodzie.
Samaj viadomaj zrabili jaje vostryja, časta na miažy palitkarektnaści zajavy ab ukaranieńni ŭkrainskaj movy i chiejtarskija vypady ŭ adras usiaho, što źviazana z Rasijaj.
U 2010 hodzie jana krytykavała imiony dziaciej, jakija zdavalisia joj niedastatkova ŭkrainskimi.
Paśla abrańnia ŭ parłamient, kali va ŭładzie byŭ Viktar Janukovič i Partyja rehijonaŭ, palityk aktyŭna vystupała suprać usich inicyjatyŭ, jakija abmiažoŭvali vykarystańnie ŭkrainskaj movy.
U 2014 hodzie «Svaboda» nie prajšła ŭ parłamient, a spadarynia Faryjon viarnułasia ŭ Lvoŭ.
U 2014-2019 prafiesar viała histaryčny prajekt na telekanale «Rada» «Vielič asoby». Jaho metaj była papularyzacyja vybitnych fihur Ukrainy ad Ściapana Bandery da Ivana Maziepy.
U 2017 hodzie jana zaklikała nie davać pracu i adukacyju tym, chto nie havoryć na ŭkrainskaj, a paśla svarki z televiadučym Dźmitryjem Hardonam na kamieru prajšła detektar chłuśni, kab abvierhnuć, što jana — ahient FSB.
U 2018-m palityk raiła «bić nahoj u skivicu kožnamu maskvarotamu», kab atrymać pieramohu ŭ vajnie, a ŭ 2023-m zajaviła, što akupacyja Maryupala i hibiel tysiač jaho žycharoŭ padčas rasijskaha ŭvarvańnia — «karmičnaść» i «determinizm».
U 2013 hodzie žurnalisty apublikavali dakumienty, što Faryjon była ŭ kamsamole i navat členam Kamunistyčnaj partyi.
Faryjon nie stała kamientavać hetyja vykryćci, zajaviŭšy, što «arlicy nie spaviadajucca pierad hijenami». A paśla paćvierdziła, što była kamunistkaj, ale tolki, kab «razburać ich (kamunistaŭ) znutry».
U listapadzie 2023 hoda SBU adkryvała kryminalnuju vytvorčaść u dačynieńni da Iryny Faryjon. Pierad tym jana ŭ intervju rezka raskrytykavała ŭkrainskich vajskoŭcaŭ, jakija praciahvajuć razmaŭlać na rasijskaj movie.
Paśla razhareŭsia skandał, jana apublikavała słovy padtrymki na svoj adras adnaho sa svaich padpisčykaŭ z Kryma. U publikacyi byli piersanalnyja danyja padpisčyka. Paśla hetaha ŭ Krymie jaho nibyta zatrymali rasijskija śpiecsłužby.
Studenty vyjšli na pratest u Lvovie i patrabavali zvalnieńnia prafiesara.
15 listapada 2023 hoda Lvoŭskaja palitechnika zvolniła Faryjon.
U mai 2024 hoda Lvoŭski apielacyjny sud adnaviŭ jaje na pasadzie prafiesara i prysudziŭ joj kampiensacyju. Faryjon kupiła 11 dronaŭ dla vajskoŭcaŭ za hrošy, jakija adsudziła ŭ Lvoŭskaj palitechniki.
Pa stanie na 19 lipienia dasudovaje rasśledavańnie pa kryminalnaj spravie suprać Iryny Faryjon praciahvałasia. U pryvatnaści, u artykule ab abrazie honaru i hodnaści vajskoŭca. SBU inicyjavała psichołaha-linhvistyčnuju ekśpiertyzu vykazvańniaŭ Faryjon.
Kamientary