Paźniak pierakanany, što ŭ druhim tury vybaraŭ-1994 pieramoh by Łukašenku
«Vybary 1994 hoda byli samymi haniebnymi ŭ historyi Biełarusi», — miarkuje palityk.
Zianon Paźniak apublikavaŭ u svaim fejsbuku refleksiju na temu 30-hodździa z daty praviadzieńnia prezidenckich vybaraŭ — 1994. Nahadajem, pavodle aficyjnych padlikaŭ u pieršym tury tych vybaraŭ Paźniak zaniaŭ treciaje miesca, nabraŭšy 13%. U Alaksandra Łukašenki było 45%, u Viačasłava Kiebiča — 17%. Jany i sustrelisia ŭ druhim tury, jaki skončyŭsia pieramohaj Łukašenki.
Paźniak miarkuje, što vynik tych vybaraŭ byŭ zabiaśpiečany mocnym upłyvam Rasii i FSB na biełaruskuju ŭładu i hramadstva, a taksama falsifikacyjami.
Jon ličyć, što i Łukašenka, i Kiebič byli rasijskimi ahientami: «Zadača tandema — nie dapuścić da ŭłady kiraŭnika BNF Paźniaka».
Na dumku palityka, mienavita jon nasamreč prachodziŭ u druhi tur razam z Łukašenkam.
«Heta abaznačała b parazu Łukašenki ŭ druhim tury (jon nie mieŭ prahramy, cieniavoha ŭradu i traciŭ hałoŭny papuliscki kozyr — «antykiebič»)» — pierakanany Paźniak.
Jon pryvodzić i kankretnyja ličby: kaža, što nasamreč nabraŭ amal udvaja bolš, 22% hałasoŭ, ale hetyja hałasy addali Kiebiču, jaki realna išoŭ čaćviortym, nižej za Stanisłava Šuškieviča.
«Falsifikacyja była zafiksavana šmat dzie, prytym niekatoryja naziralniki BNF nie razumieli mietadaŭ, jak jana dasiahajecca. Zachavałasia, naprykład, raskładka hałasoŭ (u maim archivie) pa ŭsich učastkach horada Mienska. Amal paŭsiudna (prytym adlustravana ŭ padlikach i pratakołach) na pieršym miescy byŭ Paźniak. Ale potym, kali byli abjaŭlenyja vyniki vybaraŭ, — akazałasia, što na pieršym miescy pa Miensku Łukašenka i Kiebič. Našyja naziralniki tady jašče nie sutykalisia z praktykaj ułady, kali pratakoły hałasavańnia prosta pierapisvalisia ŭ administracyi», — piša Paźniak.
Nasamreč, pavodle aficyjnych vynikaŭ, Kiebič atrymaŭ u Minsku tolki čaćviortaje miesca, a na druhim miescy byŭ Šuškievič:
- Alaksandr Łukašenka — 26,5%
- Stanisłaŭ Šuškievič — 21,2%
- Zianon Paźniak — 20,9%
- Viačasłaŭ Kiebič — 18,2%
- Vasil Novikaŭ — 4,5%
- Alaksandr Dubko — 3,5%.
U jakaści dokazu falsifikacyj Paźniak pryvodzić razmovu z nastaŭnicami ź Miadziela, jakija ŭ 1994 byli ŭ vybarčych kamisijach. Pa słovach palityka, jany sami kłali biuleteni nie ŭ tyja stosy i pierapisvali pratakoły z adnoj zadačaj — nie puścić Paźniaka.
Darečy, pa aficyjnych padlikach, u Miadzielskim rajonie Paźniak nabraŭ 27%. Jon sastupiŭ Łukašenku (37%), ale apiaredziŭ Šuškieviča i Kiebiča (pa 11%).
Padsumoŭvajučy, Paźniak tłumačyć svaim čytačam, što vybary ŭ 1994 hodzie nie byli demakratyčnymi, jak by heta ni paŭtarała prapahanda.
«Vybary 1994 hoda byli samymi haniebnymi ŭ historyi Biełarusi. Heta byli vybary, jakija na dva pakaleńni vyznačyli duchoŭnuju stahnacyju hramadstva, stratu honaru, rusifikacyju, zaležnaść ad Maskvy i admaŭleńnie ad svabody. Heta było śviedčańnie, kali nacyja, zdabyŭšy niezaležnaść, i majučy kandydata niezaležnaści, svabody, nacyjanalnaj pierśpiektyvy i demakratyi, — prahałasavała za reniehata, biełarusafoba, nienaviśnika niezaležnaści, šarłatana i psichapata», — tłumačyć jon, paraŭnoŭvajučy siabie i Łukašenku.
«Čamu nie spytaje ŭ siabie: kali ja jezdžu ŭ Hiermaniju i zabiraju ŭsie ŭznaharody, čamu nie vyjšaŭ na kantakt ź niemcami?» Da kaho źviarnuŭsia Łatuška?22
Kamientary