Rasija pačała palavać na aktyvy Google pa ŭsim śviecie praz «siabroŭskija krainy». Užo jość precedent
Bujny paŭdniovaafrykanski partał Moneyweb paviedamiŭ, što vysoki sud PAR dniami nakłaŭ aryšt na aktyvy kampanii Google unutry krainy za toje, što jana «nie vykanała patrabavańni Rasii» pa razbłakavańni jutub-staronki pravasłaŭnaha telekanała «Spas». Ekśpierty adznačyli, što heta źjaŭlajecca precedentam, jaki moža pieratvarycca ŭ tendencyju i ŭ inšych krainach.
Pavodle partała Moneyweb, Rasija razasłała pa ŭsim śviecie zvaroty z prośbaj vykarystać zamiežnyja jurysdykcyi dla vykanańnia sudovaha rašeńnia suprać kampanii Google za admovu zdymać błakiroŭku z rasijskich resursaŭ u sacsietkach.
Tak, pa zapycie Rasii dniami byli aryštavanyja aktyvy Google u Paŭdniova-Afrykanskaj Respublicy (PAR) za błakiroŭku jutub-staronki pravasłaŭnaha telekanała «Spas».
«U červieni 2023 hoda ŭ rasijskim sudzie było vyniesiena rašeńnie, pavodle jakoha amierykanski filijał kampanii Google (Google LLC) pavinien adnavić jutub-kanały rasijskaha Fondu pravasłaŭnaha telebačańnia, jakomu naležyć telekanał «Spas», albo vypłacić štraf.
Da nas źviarnułasia rasijskaja jurydyčnaja firma Art De Lex, jakaja chacieła, kab my pryznali hetaje rasijskaje rašeńnie i atrymali dazvoł na vykanańnie jaho ŭ jurysdykcyi PAR. My vykanali heta, i ŭ vyniku vysoki sud zavioŭ spravu na kampaniju Google i aryštavaŭ jaje aktyvy», — zajaviŭ partału Moneyweb paŭdniovaafrykanski juryst Chjuha Džonstan, čyja firma pahadziłasia supracoŭničać z rasijanami.
Džonstan adznačyŭ, što ŭ PAR užo jość vopyt pryznańnia zamiežnych sudovych rašeńniaŭ, adnak vypadak z Rasijaj — «heta novaŭviadzieńnie, jakoje raniej nie vypraboŭvałasia ŭ paŭdniovaafrykanskaj jurysdykcyi».
Juryst dadaŭ, što rasijskaja firma Art De Lex nakiravała anałahičnyja zvaroty i ŭ inšyja krainy pa ŭsim śviecie, kab jany raspačali padobnyja spravy suprać Google.
Adnak, jak pryznajecca Džonstan, aryšt aktyvaŭ Google nie aznačaje, što jany buduć pradadzienyja na karyść PAR albo Rasii. Juryst padkreślivaje, što vysoki sud krainy jašče nie pryznavaŭ rasijskaje patrabavańnie na atrymańnie kampiensacyi ad Google za nievykanańnie sudovaha rašeńnia.
«Tamu heta možna nazvać nie aryštam, a tolki zachoŭvańniem aktyvaŭ. Google nie zmoža pravodzić ź imi nijakich apieracyj, ale i ŭłady PAR taksama nie buduć mieć da ich nijakaha dostupu. Google usio jašče maje prava abskardzić i asprečyć aryšt aktyvaŭ.
Pavodle rasijskaha suda, kali Google nie vykanaje patrabavańni za 6 dzion z momantu vyniasieńnia rašeńnia, to štraf dla kampanii budzie składać kala 4 miljonaŭ rasijskich rubloŭ (kala 45 000 dalaraŭ ZŠA) kožny 9-miesiačny pieryjad praterminoŭki. Ale naš sud jašče nie pryznavaŭ prava Rasii na atrymańnie takoj kampiensacyi», — zajaviŭ Džonstan.
Nahadajem, što Rasija aficyjna ŭnosić PAR u śpis «siabroŭskich krain» (tam jość i Biełaruś). Kali Mižnarodny kryminalny sud vydaŭ ordar na aryšt Uładzimira Pucina za złačynstvy suprać čałaviečnaści va Ukrainie, Paŭdniovaja Afryka płanavała vyjści z-pad jurysdykcyi suda, kab nie aryštoŭvać rasijskaha kiraŭnika, jaki chacieŭ pryjechać u krainu na samit BRIKS.
Kamientary