Dziaŭčat u formie prybiralščyc nie puścili ŭ handlovy centr u Minsku praz hałoŭny ŭvachod
«U nas dres-kod, razumiejecie, tut ludzi ŭ čystym chodziać», — skazaŭ achoŭnik.
U redakcyju Onliner.by źviarnułasia čytačka Alina (imia źmienienaje) i raspaviała, što jaje z kalehaj nie puścili ŭ handlovy centr Galileo va ŭniformie prybiralščyc Pa słovach dziaŭčyny, achoŭnik nie dazvoliŭ im zajści praz hałoŭny ŭvachod mienavita z-za adzieńnia. Paźniej administracyja handlovaha centra pryniesła prabačeńni — kanflikt byŭ vyčarpany.
Dziaŭčyna raspaviała, što jany z kalehaj pracavali prybiralščykami terytoryi na vakzale i ranicaj paśla pracoŭnaj źmieny vyrašyli zajści ŭ kramu «Susiedzi» ŭ handlovym centry Galileo.
— Tak jak «Susiedzi» znachodziacca na druhim paviersie, my padymalisia na eskałatary navierch. Da nas padyšoŭ achoŭnik, zastupiŭ darohu i spytaŭ: «Kudy vy idziacie?» Skazaŭ, što nam u kramu možna, ale praź inšy ŭvachod — toj, što la aŭtavakzała. Jon skazaŭ: «U nas dres-kod, razumiejecie, tut ludzi ŭ čystym chodziać».
Alina miarkuje, što praź inšy ŭvachod zajści im prapanavali z-za jarka-aranžavaha śpiecadzieńnia. Jak joj zdavałasia, u praviłach handlovaha centra jość punkt pra zabaronu na ŭvachod dla naviedvalnikaŭ u brudnaj vopratcy — ale heta była nie ich historyja. Pa słovach dziaŭčyny, u toj dzień jany nie pracavali ź piaskom, prosta padbirali śmiećcie — i nie zapeckali vopratku.
U kramu dziaŭčyny tady patrapili, ale praź inšy ŭvachod, nie centralny. Čytačka raspaviała, što handlovy centr prynios prabačeńni i na hety momant kanflikt uładžany.
Što kažuć u handlovym centry Galileo?
U administracyi handlovaha centra Galileo rastłumačyli, što nie ŭstanaŭlivajuć zabaronaŭ abo abmiežavańniaŭ na naviedvańnie kompleksu. Situacyju, jakaja adbyłasia 30 maja, tłumačać tak:
— U hety dzień supracoŭnik słužby achovy Galileo źviarnuŭ uvahu na dźviuch dziaŭčat, jakija pakinuli biez nahladu invientar dla ŭborki (vieniki i saŭki) la hałoŭnaha ŭvachodu našaha kompleksu i apranutych u adzieńnie z nadpisam «Remaŭtadar Kastryčnickaha rajona». Jany źbiralisia naviedać praduktovuju kramu. U chodzie razmovy ź imi supracoŭnik słužby achovy daŭ rekamiendacyju skarystacca ŭvachodam u handlovy centr, jaki raźmieščany pobač z kramaj praduktaŭ. Heta było zroblena dla biaśpieki i zručnaści ŭsich našych naviedvalnikaŭ. Jak paćviardžajuć zapisy z kamier videanazirańnia, dziaŭčaty bieśpieraškodna naviedali kramu i pretenzij abo zaŭvah ad ich nie pastupała.
Taksama ŭ handlovym centry adznačyli, što paśla taho, jak dziaŭčaty raźmiaścili skarhu ŭ sacsietkach, ich zaprasili ŭrehulavać kanflikt. Paśla razmovy dziaŭčaty zajavili, što pretenzij u ich bolš niama.
Što kaža zakon?
Pa słovach jurysta, śpiecyjalista pa pravach spažyŭcoŭ Ivana Rajkieviča, zakon nie robić vyklučeńniaŭ dla naviedvańnia handlovaha abjekta ludziam u peŭnaj vopratcy: ci jana formiennaja ci tradycyjnaja.
— Abmiažoŭvać prava spažyŭca na naviedvańnie handlovaha abjekta z pryčyny nieadpaviednaści adzieńnia vyznačanym praviłam liču niedapuščalnym. I kali praviły handlovaha centra ŭtrymlivajuć takija pałažeńni, to ja b rekamiendavaŭ paciarpiełym spažyŭcam źviarnucca ŭ miascovy vykanaŭčy kamitet dla reahavańnia apošniaha ŭ ramkach artykuła 43 zakona «Pra abaronu pravoŭ spažyŭcoŭ» z zajavaj ab tym, što adbyłosia, i prośbaj vynieści handlovamu abjektu pradpisańnie ab spynieńni parušeńnia pravoŭ spažyŭcoŭ.
Taksama Ivan Rajkievič dadaŭ, što arhanizacyja maje prava ŭstaloŭvać praviły dres-koda dla svaich rabotnikaŭ, ale nijak nie dla naviedvalnikaŭ handlovaha centra.
Kamientary