Pryčynaj mahła być zdabyča zołata ŭ rehijonie.
Pra hibiel bolš jak 300 čałaviek paviedamlaje hazieta Papua New Guinea Post Courier, spasyłajučysia na słovy člena parłamienta krainy Ajmasa Akiema.
Apoŭzień adbyŭsia kala 3:00 nočy pa miascovym časie 24 maja ŭ vioscy Kaakałam, raźmieščanaj u pravincyi Enha, za 600 kiłamietraŭ ad stalicy krainy Port-Morśbi. Pavodle źviestak vydańnia, apoŭzień razburyŭ 1182 damy.
18 maja za 105 km ad miesca apoŭźnia adbyŭsia ziemlatrus mahnitudaj 4,5 bała. Ale Čyrvony Kryž zajaviŭ, što nie bačyć prykmiet taho, što apoŭzień moh być vyklikany ziemlatrusam, i źviazvaje jaho sa zdabyčaj zołata abo mocnymi daždžami.
Ad apoŭźnia paciarpieli nie mienš za šeść viosak, piša Reuters sa spasyłkaj na Ministerstva zamiežnych spraŭ i handlu Aŭstralii.
«Viarchoŭnaja kamisija Aŭstralii ŭ Port-Morśbi znachodzicca ŭ ciesnym kantakcie z uładami Papua-Novaj Hviniei dla dalejšaj acenki maštabaŭ škody i achviar», — paviedamili ŭ aŭtralijskim viedamstvie.
Aŭstralijskaja teleradyjoviaščalnaja karparacyja paviedamiła 25 maja, što ratavalniki, jakija prybyli ŭ małanasieleny rajon, dastali z-pad ziamli čatyry cieły. Apoŭzień zabłakavaŭ dostup da šašy, tamu da paciarpiełaha rajona možna dabracca tolki na viertalotach.
Kamientary