Sproby viarboŭki, pahrozy HUBAZiKa — rasśledavańnie ab zatrymańni administrataraŭ kanała «Kiroŭcy 97»
Bajpoł raskryŭ padrabiaznaści spravy suprać administrataraŭ kanału, jaki abjadnaŭ pratestujučych kiroŭcaŭ.
Na chvali hramadzianskaj aktyŭnaści letam 2020 hoda biełarusy stychijna abjadnalisia i stvarali šmatlikija resursy ŭ telehramie jašče da vybaraŭ. Heta byŭ adkaz na pieradvybarčaje biezzakońnie i aryšty patencyjnych kandydataŭ u prezidenty. Na vulicy haradoŭ vyjechali sotni kiroŭcaŭ, jakija sihnalili i tak vykazvali svajo abureńnie.
16 lipienia 2020 hoda ŭźnik telehram-kanał «Kiroŭcy 97». Resurs abjadnoŭvaŭ kiroŭcaŭ usich transpartnych srodkaŭ i naličvaŭ bolš za 5 tysiač padpisčykaŭ. Kanał dapamahaŭ aŭtaamataram kaardynavacca padčas mirnych pratesnych akcyj. Tam ža raźmiaščałasia infarmacyja ab falsifikacyi vybaraŭ, pratestach, hvałcie siłavikoŭ. A ŭ 2021 hodzie — ab arhanizacyi režymam niezakonnaj mihracyi ŭ krainy Jeŭrasajuzu.
Chutčej za ŭsio, HUBAZiK źviarnuŭ uvahu na kiroŭcaŭ letam u pieršyja ž dni isnavańnia kanała. Bajpoł źviartaje ŭvahu na adnu važnuju akaličnaść.
Supracoŭnikam HUBAZiK u mai 2020 hoda byli vydadzieny dakumienty prykryćcia na imiony supracoŭnikaŭ roznych słužbaŭ RUUS Minska. Zajmajučysia palityčnymi kryminalnymi spravami, jany vykarystoŭvali mienavita hetyja dakumienty, tamu mnohija aktyvisty nie viedajuć, jakaja słužba realna ich zatrymlivała.
Miarkujučy pa ŭsim, havorycca ŭ materyjale Bajpoł, za niekatorymi aktyvistami ŭstalavali nazirańnie. I nieŭzabavie pa materyjałach HUBAZiK hienieralny prakuror zavioŭ kryminalnuju spravu ŭ dačynieńni da administratara kanała «Kiroŭcy 97».
Pieršyja aktyvisty, jakija mieli dačynieńnie da administravańnia kanała, byli zatrymanyja nieŭzabavie paśla składańnia pratakoła ahladu telehram-kanała «Kiroŭcy 97». Pieršym 22 vieraśnia byŭ zatrymany Dzianis Hucin.
Nastupnaj zatrymali Taćcianu Škrobat. Pad ciskam jana pajšła na supracoŭnictva i dała dostup da svajho telefona i administravańnia kanała.
Staršy apierupaŭnavažany treciaha adździełu piataha ŭpraŭleńnia HUBAZiK pa Minsku Ihar Bušyła dabiŭsia ŭ jaje zhody stać tajnym supracoŭnikam, uziaŭšy adpaviednuju padpisku. Jak vyśvietliłasia, Škrobat pad kantrolem supracoŭnikaŭ HUBAZiK pryznačała sustrečy z aktyvistami Zavadskoha rajonu horadu Minska, jakich brali pad nazirańnie, a paśla vyśviatleńnia asoby zatrymlivali.
28 vieraśnia była zatrymana Hanna Višniak. Joj vystavili abvinavačańnie pa artykule 342 Kryminalnaha kodeksu. Žančyna dała dostup da svajho telefona i administravańnia kanała «Kiroŭcy 97».
4 listapada 2020 hoda zatrymali Viktoryju Kulšu. U rasparadžeńni Bajpoł akazaŭsia zapis razmovy namieśnika načalnika HUBAZiK Michaiła Biedunkieviča z žančynaj. Z hutarki stanovicca zrazumieła, što Viktoryja paśpieła pazbavicca svajho telefona. Tamu dokazaŭ jaje nibyta złačynstvaŭ na toj momant u siłavikoŭ nie było — akramia jaje nika ŭ śpisie administrataraŭ i asobnych paviedamleńniaŭ.
Biedunkievič nastojliva prapanoŭvaŭ Viktoryi supracoŭnictva ŭzamien na mahčymuju źmienu miery strymańnia. U vypadku admovy Biedunkievič pahražaŭ terminam. Viktoryja ad prapanovy admoviłasia.
4 červienia 2021 hoda ŭ sudzie Zavodskaha rajona Minska abvieścili prysud pa kryminalnaj spravie suprać čatyroch administrataraŭ telehram-kanała «Kiroŭcy 97». Słuchańni prachodzili ŭ zakrytym režymie.
Prakuror Alaksandr Karol paprasiŭ pakarać Hucina, Kulšu i Višniak, jakija svajoj viny nie pryznali, dvuma hadami i šaściu miesiacami pazbaŭleńnia voli ŭ kałonii ahulnaha režymu. Taćcianu Škrobat, jakaja supracoŭničała sa śledstvam i pryznała vinu, tryma hadami chatniaj chimii. Mienavita taki prysud i vyniesła sudździa Žanna Chvajnickaja.
Dzianis Hucin vyjšaŭ na volu 25 kastryčnika 2022 hoda. Hanna Višniak vyzvaliłasia 25 listapada taho ž hoda. Za hety čas administracyja kałonii nakłała na jaje 16 dyscyplinarnych spahnańniaŭ.
Viktoryja Kulša na volu tak i nie vyjšła. Jaje jašče dvojčy sudzili pa artykule 411 Kryminalnaha kodeksu (złosnaje niepadparadkavańnie patrabavańniam administracyi papraŭčaj ustanovy). Za 2023 hod u ŠYZA i PKT jana praviała bolš za sto dzion. Niadaŭna ŭ žančyny vyjavili ankałahičnaje zachvorvańnie.
Čytajcie jašče:
Zatrymali jašče adnaho administratara Telegram-kanała «Kiroŭcy 97»
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary