U Homieli asudzili ŭkrainca i dvuch biełarusaŭ za «ahienturnuju dziejnaść» i «zdradu dziaržavie». Letaś pra ich pakazvali film

Padrabiaznaści pieraśledu ŭkrainskaha jehiera stali viadomyja z prapahandysckaha filma, vypuščanaha hod tamu, u jakim Viačasłava na śledčych dziejańniach vadzili na łancuhu. Ahułam troch čałaviek abvinavacili adrazu pavodle šaści artykułaŭ Kryminalnaha kodeksa, u tym liku «zdrada dziaržavie» i «ahienturnaja dziejnaść». Sud ŭ zakrytym režymie prachodziŭ z 15 kastryčnika. Usie fihuranty spravy znachodzilisia pad vartaj.

Minułaj vosieńniu Kamitet dziaržaŭnaj biaśpieki paviedamiŭ, što zatrymaŭ u Biełarusi šeść čałaviek pa abvinavačvańni ŭ supracoŭnictvie sa «Słužbaj biaśpieki Ukrainy» i «padrychtoŭcy teraktaŭ». Pra heta stała viadoma ź filma 11 vieraśnia 2023 hoda, jaki pakazali adrazu na ŭsich dziaržaŭnych kanałach. Na videa niekatoryja ź ich vyhladajuć źbitymi, niekatorych na śledčych dziejańniach vodziać na łancuhach, adnaho z zatrymanych źniali ŭ SIZA KDB.

Ukrainskaha jehiera Viačasłava Barodzija zatrymali 1 vieraśnia 2023 hoda ŭ Jelskim rajonie Biełarusi, jaki miažuje z Žytomirskaj vobłaściu Ukrainy. Viadoma, što Viačasłaŭ naradziŭsia ŭ Žytomirskaj vobłaści, niekatory čas žyŭ u Mazyry, a potym viarnuŭsia va Ukrainu i pracavaŭ jehieram, vychoŭvaje troch dziaciej. U filmie raskazali, što Barodzij paśla pačatku poŭnamaštabnaj vajny nibyta prajšoŭ padrychtoŭku ŭ navučalnym centry Hałoŭnaha ŭpraŭleńnia raźviedki Minabarony Ukrainy i što «z sakavika 2023 hoda, akramia HUR Minabarony, jon staŭ supracoŭničać jašče i sa Słužbaj biaśpieki Ukrainy». U filmie kažuć:

«Pry zatrymańni jon zajaviŭ, što pryjšoŭ u našu krainu «zabrać chłopca i viarnucca nazad». Pra składy sa zbrojaj Barodzij nibyta ničoha nie viedaŭ i naohuł pierasiek miažu z našaj krainaj upieršyniu. Navošta ŭ jaho pry sabie byŭ pistalet SIG Sauer z hłušycielem i dźviuma abojmami, Barodzij patłumačyć nie zmoh. Zrešty, heta zrazumieła i tak. Pry sutyknieńni z našymi pamiežnikami ŭ Manhusta była b mahčymaść adstrelvacca ad ich». 

Pavialičyć

Viačasłava Barodzija, Mikałaja Łasoŭskaha i Valancinu Połaz u zaležnaści ad roli kožnaha abvinavacili pavodle nastupnych kryminalnych artykułaŭ:

• č. 1 art. 356 (zdrada dziaržavie);
• č. 2 art. 371-1 (arhanizacyja niezakonnaj mihracyi);
• č. 4 art. 295 (niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ);
• art. 358-1 (ahienturnaja dziejnaść);
• č. 3 art. 333-1 (niezakonnaje pieramiaščeńnie praź dziaržaŭnuju miažu Biełarusi ahniastrelnaj zbroi, bojeprypasaŭ, a taksama inšych vidaŭ uzbrajeńnia i vajennaj techniki);
• č. 3 art. 371 (niezakonnaje pierasiačeńnie dziaržaŭnaj hranicy Respubliki Biełaruś).

2 śniežnia sud pryznaŭ vinavatym Barodzija pavodle art. 295 KK,art. 333-1 KK, art. 358-1 KK, art. 371 KK i art. 371-1 KK. Łasoŭski i Połaz pryznanyja vinavatymi ŭ «zdradzie dziaržavie», a taksama ŭ «arhanizacyi niezakonnaj mihracyi».

• 0
• 0
• 0
• 1
• 1
• 0
• 4
• 0