Nie patrebnaja trenažorka i možna znajści skarby. Hrodzienski rok-muzyka raskazaŭ, jak uładkavaŭsia na śmiećciavoz u Polščy
«U škole zaŭsiody śmiajalisia z tych, chto nie chacieŭ vučycca. Kazali: «Budzieš lenavacca — budzieš vynosić śmiećcie za inšymi», — uzhadvaje hrodzieniec Uładzisłaŭ Biernat. Jon — vakalist pank-hurta Dzieciuki i nastaŭnik anhlijskaj movy. A ciapier žyvie ŭ Polščy i zarablaje akurat vyvazam śmiećcia.
Uładzisłaŭ, mnohim viadomy jak «Dziadzieńka», źjechaŭ ź Biełarusi ŭ 2022 hodzie. Jon asieŭ u Biełastoku, dzie pačaŭ pracavać na śmiećciavozie. Pra hetuju pracu jon raskazaŭ kanału «Biełarusy mohut», hutarku pierakazaŭ Hrodna life.
Zaŭsiody «tapiŭ» za working class
Karjernych płanaŭ na toje, kab być śmiećciarom, Uład nie mieŭ. Jon naohuł dumaŭ asieści ŭ Varšavie, bo tam užo žyli niekatoryja čalcy hurta Dzieciuki. «Ale potym siabar prapanavaŭ papracavać na śmiećciavozie ŭ Biełastoku», — kaža Uładzisłaŭ. Jon padumaŭ — i vyrašyŭ pasprabavać.
«Sumniavaŭsia, što praca na śmiećciavozie budzie čymści adpaviednym pa statusie. Ale adkinuŭ absalutna ŭsie sumnievy, kali pahladzieŭ na heta z boku čałavieka, jaki zaŭsiody «tapiŭ» za tak zvany working class — ludziej, jakija nie bajacca brudu, ciažkoj pracy», — kaža Uład. I dadaje karotkaje: «Nie hrafy my».
VR-akulary, noŭtbuk i załaty piarścionak — što možna znajści na śmietniku
Pracu na śmiećciavozie muzyka nie idealizuje. Składana siem-vosiem hadzin ciahać kantejniery na vietry i marozie. A jašče niama adpačynku, jaki apłočvaje kampanija, a taksama balničnaha. Dy i zarobak pa polskich mierkach nievysoki. Byccam vyšejšy za biełaruski, ale kali ŭličyć vydatki na žyllo, to zastajecca toje ž samaje, kaža Uładzisłaŭ.
Siarod plusaŭ muzyka vyłučaje toje, što nie treba vydatkoŭvać hrošy na trenažornuju zału — i tak štodzionna ciahaje ciažkija kantejniery. A jašče na śmietniku možna znajści niešta kaštoŭnaje.
«Samaje kaštoŭnaje, što ja znachodziŭ — VR-akulary dla telefona. I noŭtbuk, jaki ja tak i nie pratestavaŭ, bo nie znajšoŭ da jaho zaradki. Ludzi vykidajuć štości nieŭjaŭlalnaje: pačynajučy ad niejkaj drobiazi — dziciačych cacak, jakich u Biełarusi navat niemahčyma nabyć — i skančajučy šlubnymi piarścionkami. Załatymi ŭ tym liku. Adzin ź jakich lažyć u mianie doma», — raskazaŭ Uładzisłaŭ.
U Biełarusi ludzi biezadkazna staviacca da sartavańnia śmiećcia
Adroźnieńnie pracy na śmiećciavozie ŭ Biełarusi i ŭ Polščy, na dumku Uładzisłava, u tym, što ŭ Biełarusi ludzi biezadkazna staviacca da sartavańnia śmiećcia.
«U Polščy mnohija taksama nie prytrymlivajucca praviłaŭ sartavańnia. Ale ich [palakaŭ] dobra dyscyplinujuć: kala kantejnieraŭ visiać kamiery, jakija adsočvajuć pravilnaść sartavańnia, kab možna było vyličyć parušalnikaŭ i vypisać štraf», — kaža Uładzisłaŭ.
Praca nie pieraškadžaje vystupać na fiestyvalach
Muzyku Uładzisłaŭ nie zakinuŭ. Dzieciuki hrajuć kancerty ŭ polskich haradach i na fiestyvalach, choć muzyki i žyvuć u roznych haradach. Ale paŭnavartasna zajmacca tolki muzykaj i z hetaha žyć niama mahčymaści.
Śmiećciavoz — nie adzinaja praca
Uładzisłaŭ pracuje nie tolki na śmiećciavozie. Jašče jon padpracoŭvaje ŭ bary. Pavodle jaho słovaŭ, tam jaho časta paznajuć emihranty. Ale ž mienavita dziakujučy pracy na śmiećciavozie muzyka zrazumieŭ bolš pra žyćcio i emihracyju.
«Vyžyć možna zaŭsiody. Kali čałaviek choča čahości damahčysia, to jon heta zrobić. I dla hetaha nieabaviazkova iści pa hałovach, kamuści škodzić. Možna prosta pracavać na śmiećciavozie i śpiavać svaje lubimyja pieśni», — ličyć Uładzisłaŭ.
«Draiš čarhovy ŭnitaz i dumaješ: para z hetym skančać». Čym ciapier zajmajecca Lavon Chałatran
«Umieju daić karovu, piačy pirahi, tkać». Małady čałaviek znajšoŭ siabie ŭ hłybincy i ciapier ulublaje ŭ jaje turystaŭ
«Dyrektar spadziavaŭsia, što ja budu chadzić na spatkańni z kankurentami». Žančyny — pra najhoršyja sumoŭi
U Minsku zatrymali partnioraŭ Maziepina pa «Urałkalii», adnych z samych bahatych biełarusaŭ Rasii14
Kamientary