Televiadučaja Śviatłana Baroŭskaja raskazała pra novaha muža — zahadkavaha rasijskaha biznesmiena
Apošnija hady televiadučaja Śviatłana Baroŭskaja nie lubić afišavać asabistaje žyćcio. U 2020 jana pabrałasia šlubam z rasijskim biznesmienam, a niadaŭna raskazała pra jaho padrabiaźniej.
Śviatłana druhi raz praštampavała pašpart u kastryčniku 2020 hoda. U dzień viasiella niaviesta chvareła na karanavirus i tamu była na mierapryjemstvie nie tolki ŭ błakitnym velumie, ale i ŭ błakitnaj mascy.
Abrańnikam Śviatłany staŭ biznesmien za Sankt-Pieciarburha.
— Jon taksama druhi raz žanaty, u nas ź im 2:2, — raskazała televiadučaja ŭ pieradačy «100 pytańniaŭ darosłamu». — U jaho dźvie dački, čaćviora ŭnukaŭ. U mianie jašče niama ŭnukaŭ.
Śviatłana raspaviała, što mužčyna davoli doŭha zalacaŭsia da jaje, choć prapanovu ruki i serca zrabiŭ praz tydzień paśla znajomstva. Mužčyna pisaŭ Baroŭskaj pa 70 sms-paviedamleńniaŭ na dzień.
— Jon skazaŭ: «Ja ŭvohule nie pracavaŭ. Ja prosta siadzieŭ i pisaŭ tabie». Heta było cudoŭna. Potym jon 10 hadoŭ da mianie zalacaŭsia. Bo ja nie chacieła bolš zamuž. Viedajecie, jak kažuć: darosłuju žančynu možna ździvić tolki kachańniem, bo astatni cyrk jana ŭžo bačyła.
Śviatłana śćviardžaje, što 10 hadoŭ spatrebiłasia abrańniku na toje, kab svaimi ŭčynkami pierakanać u tym, što zrobić jaje ščaślivaj.
— Kali ja vychodziła zamuž, ja kazała jamu: «Tolki, kali łaska, nie treba stanavicca mužam. Mnie treba, kab ty byŭ chłopcam». Viedajecie, heta vielmi tonkaja miaža, kali mužčyna prysvojvaje ciabie, kali jon užo dabiŭsia, palavańnie zdaryłasia…
Siamiejnaje žyćcio pary prachodzić pa hrafiku: 10 dzion muž Baroŭskaj žyvie ŭ Minsku, a 10 — u Sankt-Pieciarburhu. Ale jana zapeŭnivaje, što kachany maryć uvieś čas žyć u Biełarusi, bo vielmi lubić našu krainu.
— I voś ja prychodžu z pracy, a ŭ mianie na chaładzilniku fłamastaram napisana… Nu, niejkaje pryhožaje słova, jakoje ŭsie dziaŭčatki chočuć pačuć ad chłopčyka.
Śviatłana kaža, što hetyja jaje adnosiny nie byli kachańniem ź pieršaha pohladu.
— Ź dziasiataha pohladu, — znoŭ pažartavała televiadučaja. — Na samoj spravie, ja zaŭvažyła, što mužčyna na mianie vielmi ŭvažliva hladzić. Mianie navat heta krychu razdražniaje, tamu što ja takaja pilnaja. A potym jon prynios niejki kavun, ad jakoha ja nie admoviłasia.
Śviatłana ŭsio ž vyrašyła pakinuć nieznajomcu svoj numar telefona, a toj patelefanavaŭ užo praź dźvie hadziny. A paśla pačaŭ kožnyja dva tydni pryjazdžać na mašynie z Rasii ŭ Biełaruś. Navat kali byŭ karanavirus i zakachanyja nie bačylisia paŭtara miesiaca praz zakrytyja miežy, mužčyna znajšoŭ mahčymaść pryjechać.
— I heta było cudoŭna. I takich učynkaŭ było šmat. Jon robić ich i ciapier. Jon trymaje hety hradus. Jon kaža: «Z taboj składana, ale cikava». Jašče adnu frazu jon mnie skazaŭ: «Kali ciabie zrazumieć, z taboj vielmi prosta».
Baroŭskaja kaža, što muž abaviazkova hladzić usie prahramy ź jaje ŭdziełam. I jon chutčej spaźnicca na pracu, ale na kachanuju pahladzić.
— Jon viedaje ŭsio pra «Dobraj ranicy, Biełaruś!»: usich viadučych, usich hierojaŭ, usie siužety. Jamu cikava. Jamu padabajecca naša telebačańnie.
Pry hetym, Śviatłana padkreśliła, što muž jaje nie tolki chvalić, ale moža i pakrytykavać. A jana moža spytacca jaho mierkavańnie pra svajo adzieńnie.
Adzin ź junych udzielnikaŭ pieradačy «100 pytańniaŭ darosłamu» paprasiŭ padčas zapisu patelefanavać mužu televiadučaj. Jana pahadziłasia i papiaredziła, što jany źviartajucca adno da adnaho «Lubania».
Muž Śviatłany pačaŭ pradkazalna nachvalvać jaje pieradaču. Razmovu jana skončyła chutka: «Kachaju ciabie, Lubačka maja, byvaj!»
Nahadajem: pieršy šlub Baroŭskaj pačynaŭsia pryhoža jak dysnejeŭski mulcik, a skončyŭsia jak małabiudžetny rasijski sieryjał.
Śviatłanu, pieršakurśnicu Biełaruskaha teatralna-mastackaha instytuta, skaryŭ akcior Anatol Kacianioŭ, na 11 hadoŭ starejšy za jaje. U 1989 hodzie para pabrałasia šlubam.
U 1990-ja ŭ Anatola amal nie było pracy — novych rolaŭ jamu nie prapanoŭvali. Zatoje ŭ Śviatłana karjera składvałasia — kožny ranak jana biehła na telebačańnie.
U niejki momant Kacianioŭ pajechaŭ u Maskvu — tam akcioru było praściej znajści pracu. Tak siamja, u jakoj naradziłasia dvoje synoŭ, pačała žyć na dźvie krainy. Narešcie źjavilisia hrošy: muž z žonkaj nabyli kvateru ŭ Minsku i lecišča na Vilejščynie.
Šmat hadoŭ Śviatłana raspaviadała ŭ intervju pra svoj šlub jak pra idealny, ale nasamreč usio było nie vielmi pryhoža. U Anatola ŭ Rasii źjaviłasia inšaja žančyna.
U 2021 hodzie jon raspavioŭ pra svaje zdrady na šou «Los čałavieka»:
— Pryjazdžajučy dadomu, ja bačyŭ, nakolki Śvieta mianiajecca. Ja nie raz joj kazaŭ: «Telebačańnie vielmi mianiaje, papularnaść vielmi mianiaje. Vytrymać vyprabavańnie miednymi trubami — sprava surjoznaja». Ale nie zaŭsiody ja byŭ pačuty. Ale voś tak… Sustreŭsia z druhoj dziaŭčynaj. I ŭsio čaściej, kali ja pryjazdžaŭ, mnie davodziłasia chavać vočy, bo, pa vialikim rachunku, ja prystojny čałaviek, ale tak skłalisia abstaviny, što tam, z tym čałaviekam, mnie było lohka, prosta, svabodna.
Čamu ž Kacianioŭ nie aformiŭ razvodu, sustreŭšy novaje kachańnie (pa infarmacyi ŚMI, Anatol paznajomiŭsia z Alenaj Karpovič na zdymkach sieryjała «Undzina» ŭ 2003 hodzie)? Śćviardžaje, što nie rabiŭ hetaha dziela ich sa Śviatłanaj synoŭ. Ale ž, kali pryjazdžaŭ u Biełaruś, imknuŭsia jak maha chutčej apynucca na leciščy, dalej ad aficyjnaj žonki.
— Ale ja praciahvaŭ žyć, pryjazdžać da dziaciej, da Śviety, pryvozić usio da kapiejki. Tamu što dzieci raśli, im patrebny byŭ baćka. Tłumačyć ja stamiŭsia…
Nijakich adnosin cialesnych u nas užo nie było. Ja staŭ pryjazdžać dadomu jak škadlivy kot, jak pabity sabaka: chavaŭ vočy — bajaŭsia Śviecie ŭ vočy hladzieć, tamu što ja nie končanaja svołač.
U 2014 hodzie Śviatłana narešcie vyrašyła raźvieścisia. Chodziać čutki, byccam tady jana pastaviła mužu ŭltymatum: «Usio daruju, ale pry ŭmovie, što ty zaraz vierniešsia ŭ siamju». Anatola taki zahad pakryŭdziŭ, i jon admoviŭsia.
Pry hetym, dvajažencam mužčyna siabie nie ličyŭ.
— Ja nie žyŭ ź dźviuma žančynami paralelna, nie. Ja maju na ŭvazie fizijałahičny praces. Ja byŭ aficyjna žanaty sa Śviatłanaj Baroŭskaj, a duša maja naležała ŭ hety momant užo nie joj.
Praź niekalki hadoŭ paśla razvodu z Baroŭskaj Anatol ažaniŭsia sa svajoj kachanaj, u pary naradziłasia dačka.
Što viadoma pra biełarusa Viktara Paviełku, jakoha ŭ Polščy padazrajuć u arhanizacyi napadaŭ na rasijskich apazicyjanieraŭ1
Kamientary