«Amkador» pačynaje vyrablać zbroju — što viadoma pra kompleks «Vartavy» i bieśpiłotnik «Śvisłač»
U novym rasśledavańni Biełpoła, siarod inšaha, raspaviadajecca pra asobnaje pradpryjemstva ŭ składzie chołdynha «Amkador», jakoje zajmajecca vytvorčaściu bieśpiłotnikaŭ i inšaj zbroi.
U razhalinavanaj struktury «Amkadora» isnuje ŭnitarnaje pradpryjemstva «Zavod SVT». Jano zajmajecca vytvorčaściu ascyjohrafaŭ, valtmietraŭ, čystamieraŭ, hienierataraŭ, šumamieraŭ. Razam z hetym pradpryjemstva maje schavanuju vytvorčaść u intaresach vajenna-pramysłovaha kompleksu Biełarusi. Jaje nichto nie afišuje, bo moža być niepryjemnaja reakcyja.
U rasparadžeńni Biełpoła akazaŭsia list, nakiravany 30 listapada 2021 hoda na imia Łukašenki za podpisam Alaksandra Šakucina. Ź jaho vynikaje, što na zavodzie SVT sumiesna z upraŭleńniem rakietnych vojskaŭ i artyleryi Hienštaba Uzbrojenych sił Biełarusi pravodziacca vopytna-kanstruktarskija raboty pa stvareńni artyleryjskaha radyjołakacyjnaha kompleksu (ARK) raźviedki i absłuhoŭvańnia stralby (šyfr «Vartavy»)». Hety kompleks dazvalaje vyznačyć kaardynaty varožych batarej i karektavać stralbu svaich vajennych farmavańniaŭ.
Jak śćviardžajecca ŭ liście, ARK «źjaŭlajecca šmatmetavym i nie maje anałahaŭ u śviecie». Pa zadumcy raspracoŭščykaŭ, pa svaich paramietrach jon budzie adpaviadać suśvietnym anałaham, budzie zdolny absłuhoŭvać zapusk rakietnych sistem załpavaha ahniu (RSZA) na adlehłaść 32 km, artyleryi — na 23 km, minamiotaŭ — na 20 km.
Takija charaktarystyki dazvolać raźmiaščać ARK na addalenaści ad linii sudakranańnia. U paraŭnańni z najlepšymi impartnymi ŭzorami kompleks, jak adznačajecca ŭ liście, budzie mieć bolš vysokija charaktarystyki vyjaŭleńnia i budzie zapatrabavany ŭ Ministerstvie abarony Rasii.
Akramia hetaha, jak vynikaje z dakumienta, na pradpryjemstvie pravodzicca rabota pa stvareńni bieśpiłotnaha kvadrakoptara (šyfr «Śvisłač»), jaki dazvalaje likvidavać jak varožyja bieśpiłotniki, tak i naziemnyja celi. Jon moža vystupać jak u roli bieśpiłotnika-kamikadzie, tak i ŭ roli bieśpiłotnika-źniščalnika. Pry hetym, jak adznačajecca ŭ liście, raspracoŭka bieśpiłotnika-źniščalnika pavinna była skončycca ad 31 žniŭnia 2023 hoda.
Da plusaŭ bieśpiłotnika «Śvisłač» raspracoŭščyki adnosiać vysokuju chutkaść, zdolnaść źniščać jak naziemnyja, tak i pavietranyja abjekty, raspaznavańnie abjekta dla paražeńnia z dapamohaj aptyčnaj sistemy roznaha ŭzroŭniu składanaści. Najaŭnaść infačyrvonaj aptyčnaj sistemy dazvolić takomu bieśpiłotniku pracavać nočču, u abłokach i ŭ tumanie. Śćviardžajecca, što ŭ novaj raspracoŭki vysokaja ŭstojlivaść da pieraškod z boku praciŭnika.
Zavod SVT maje namier raspracavać naziemny punkt kiravańnia bieśpiłotnikami, jaki dazvolić dystancyjna kiravać niekalkimi bieśpiłotnikami i vieści praciahłaje dziažurstva niekalkimi raźlikami. Pry hetym punkt kiravańnia moža być zaviazany ŭ sistemu kiravańnia zbrojaj i ahniom. Płanujecca zabiaśpiečyć jaho spałučeńnie z artyleryjskimi radyjołakacyjnymi kompleksami raźviedki «Vartavy».
Taksama pavinna być dasiahnuta poŭnaja łakalizacyja vytvorčaści na płoščach chołdynha «Amkador». Košt takoha bieśpiłotnika nie pavinien pieravysić $50 tysiač za adzinku. Ale ŭsio budzie zaležyć ad koštu optavałakonnaj sistemy.
Raspracoŭki chołdynha znachodziacca pad pastajannym kantrolem Hienštaba.
Čytajcie jašče:
«Amkador» damoviŭsia pra supracoŭnictva z «DNR»
Kamientary
Vot za eto samoje!