U niekrałohu rasijskaha praparščyka ŭspłyli padrabiaznaści pracy ŭ Homieli vajskovych miedykaŭ RF u pačatku vajny
U Homiel kamandziravali rasijskich vajskovych miedykaŭ ź Pieciarburha i Maskvy.
Na niekrałoh, apublikavany administracyjaj Ščarbinaŭskaha rajona Krasnadarskaha kraju, źviarnuŭ uvahu «Fłahštok». Tam zhadvałasia infarmacyja pra rasijskuju miedustanovu, jakaja pracavała ŭ Homieli ŭ pačatku poŭnamaštabnaj vajny RF suprać Ukrainy.
U niekrałohu ŭ pamiać pra praparščyka Dzianisa Burboŭskaha, jaki prachodziŭ słužbu ŭ desantna-šturmavoj rocie na pasadzie fielčara, upieršyniu zafiksavany nazvy rasijskich miedustanovy i pieryjad ich pracy:
«19 lutaha 2022 hoda byŭ prykamandziravany da 442-ha vajenna-kliničnaha špitala horada Sankt-Pieciarburha, adkul byŭ nakiravany ŭ kamandziroŭku ŭ składzie vajenna-sanitarnaha ciahnika № 1 dla miedycynskaha zabieśpiačeńnia śpiecyjalnaj vajennaj apieracyi, vykonvaŭ abaviazki apieracyjnaha miedbrata ŭ h.Homiel Respubliki Biełaruś, dzie dvojčy ŭdzielničaŭ u dźviuch sanitarnych evakuacyjach paranienych z dastaŭkaj ich na bazu Vajenna-miedycynskaj akademii h. Sankt-Pieciarburh.
Paśla druhoj transparciroŭki paranienych byŭ viernuty ŭ Respubliku Biełaruś i praciahnuŭ pracu ŭ składzie miedycynskaha atrada śpiecyjalnaha pryznačeńnia im. Burdenki, dzie prabyŭ da 14 maja 2022 hoda».
Takim čynam, u Homieli pracavali śpiecyjalisty jak minimum dźviuch vajenna-miedycynskich ustanoŭ: 442-ha vajenna-kliničnaha špitala horada Sankt-Pieciarburha i miedycynskaha atrada śpiecyjalnaha pryznačeńnia, stvoranaha na bazie Hałoŭnaha vajennaha kliničnaha špitala im. Burdenki ŭ Maskvie. Dastaŭka vajennych miedykaŭ ź Pieciarburhskaj ustanovy ažyćciaŭlałasia čyhunačnym transpartam: vajenna-sanitarnym ciahnikom № 1.
Padrychtoŭka da miedycynskaha supravadžeńnia viałasia da pačatku bujnamaštabnaha ŭvarvańnia i praciahvałasia paśla vyviadzieńnia hrupoŭki z poŭnačy Ukrainy da 14 maja 2022 hoda.
Paśla praparščyka nakiravali ŭ zonu vajennych dziejańniaŭ na ŭschod Ukrainy, dzie jon i zahinuŭ u pačatku 2023 hoda.
U pieršyja dni poŭnamaštabnaha ŭvarvańnia Rasii va Ukrainu mnohija miedustanovy Homielščyny byli addadzienyja pad lačeńnie paranienych rasijskich vajskoŭcaŭ. Va ŭsich asnoŭnych miedycynskich ustanovach tady byli vyłučanyja cełyja pavierchi adździaleńniaŭ dla terminovych apieracyj. Rasijskich vajskoŭcaŭ lačyli nie biełaruskija miedyki, ale mnohija pasłuhi dla biełarusaŭ byli prypynienyja praz adsutnaść u miedustanovach miescaŭ.
U Homieli sanitarny transpart fiksavaŭsia kala Respublikanskaha navukova-praktyčnaha centra radyjacyjnaj miedycyny, tam ža ŭ anhary byŭ arhanizavany časovy morh. Tady ž pastupała infarmacyja ab vykarystańni špitala invalidaŭ VAV i Homielskaj abłasnoj kliničnaj balnicy dla patreb armii RF.
U mahiloŭskaj kałonii pamior 22-hadovy palitźniavoleny Dźmitryj Šlethaŭer4
Kamientary