Suśvietnyja ceny na kalijnyja ŭhnajeńni viarnulisia na pieradvajenny ŭzrovień
Na praciahu kvartała siaredniaja cana za tonu ŭhnajeńniaŭ skłała $250, kali hodam raniej jana dasiahała $633. «Naša Niva» pacikaviłasia ŭ ekśpierta, jak suśvietnyja tendencyi adbivajucca na Biełarusi.
Ekśpiert daśledčaha centra BEROC Nastaśsia Łuzhina adznačaje, što nizkija ceny — nie adzinaja prablema, ź jakoj sutykajecca «Biełaruśkalij».
«Praz sankcyi ŭ pieršuju čarhu mocna ŭskładniłasia łahistyka. Kali raniej dastaŭka ažyćciaŭlałasia ŭ asnoŭnym praź Litvu (90%), to ciapier usio pieranakiravana ŭ rasijskija party. Heta robić užo sami łahistyčnyja mahčymaści abmiežavanymi, pakolki ni čyhunačnaja ni partovaja infrastruktura nie byli hatovyja da hetaha.
Ułady pracujuć nad tym, jak pavysić pravaznuju mahutnaść čyhunki da partoŭ u RF, a taksama pašyryć mahčymaści samich partoŭ. Ale na heta patrabujecca čas», — tłumačyć ekśpiert.
Taksama ekanamist adznačaje, što z ulikam taho, što kalij źjaŭlajecca padsankcyjnym tavaram, «Biełaruśkaliju» davodzicca rabić dadatkovyja źnižki na svaju pradukcyju.
Jaki jon, pamier hetych źnižak, — dakładna nieviadoma, ale kali abapiracca na dadzienyja za minuły hod, to havorka išła ab dyskoncie 30—60% ad suśvietnych cen.
Razam z tym źmianiajecca i hieahrafija prodažaŭ. Ciapier asnoŭnym rynkam zbytu źjaŭlajecca Kitaj. Biełaruś stała hałoŭnym pastaŭščykom kalijnych uhnajeńniaŭ na kitajski rynak. Pa vynikach dzieviaci miesiacaŭ 2023 hoda Kitaj zapłaciŭ za pradukcyju «Biełaruśkalija» kala 1,25 młrd dalaraŭ (+505 młn dalaraŭ da ŭzroŭniu studzienia-vieraśnia 2022 hoda).
Dniami stała viadoma, što Biełaruś i Iran ukłali damovu na pastaŭki kalijnych uhnajeńniaŭ. Razmova idzie ab pastaŭkach 400 tysiač ton. Pa jakich cenach budzie pastaŭlacca ŭhnajeńnie — nie nazyvałasia.
Pry hetym, ekśpiert adznačaje, što niahledziačy na niespryjalnyja ŭmovy, ułady ŭsio roŭna zajaŭlajuć ab namierach pavialičyć abjomy zdabyčy.
«Sioleta chočuć naraścić abjomy zdabyčy da 8 młn ton, tym samym chočučy nablizicca da davajennych pakazčykaŭ. Pryčym, jak sami ŭłady pryznajucca — hałoŭnaje dla ich ciapier heta abjom, a nie košt».
Nastaśsia Łuzhina nie vyklučaje, što «Biełaruśkalij» nie stavić bolš vysokuju płanku pa abjomach zdabyčy, pakolki hetaha nie dazvalaje łahistyčnaja infrastruktura.
«U ciapierašnich umovach jany hatovyja pradavać ź minimalnaj rentabielnaściu abo navat bieź jaje. Jość nieabchodnaść vypłočvać zarobki i atrymlivać prytok valuty ŭ krainu, tamu rentabielnaść staić nie na pieršym płanie», — ličyć ekśpiert.
Ekanamist nazyvaje takuju madel handlu nieefiektyŭnaj, ale pastupać inakš kancern nie moža, pakolki krainy, jakija iduć na ryzyki, pracujučy ź Biełaruśsiu, pavinny atrymlivać za heta kampiensacyju ŭ vyhladzie dadatkovaha dyskontu. U advarotnym vypadku ŭ ich źniknie cikavaść da zakupak u Biełarusi.
Pa słovach Łuzhinoj, situacyja vakoł kaliju, jakaja skłałasia, akazvaje značny niehatyŭny ŭpłyŭ na ekanomiku Biełarusi, pakolki ekspart kalijnych uhnajeńniaŭ źjaŭlajecca važnaj krynicaj dachodu. Da 2022 hoda na dolu Biełarusi ŭ suśvietnym handli kalijnymi ŭhnajeńniami prypadała 20%. Da ŭviadzieńnia sankcyj Biełaruś zajmała treciaje miesca ŭ śviecie, sastupajučy tolki Kanadzie i Rasii.
U 2022 hodzie dola Biełarusi ŭ suśvietnym handli kalijnym ŭhnajeńniami skaraciłasia prykładna na 9%.
Asnoŭnymi prablemami dla «Biełaruśkalija» źjaŭlajucca mienavita składanaści z łahistykaj i nieabchodnaść rabić vialikija dadatkovyja źnižki. Bo ciapierašnieje padzieńnie cenaŭ — heta chutčej viartańnie da zvyčajnych koštaŭ, a nie hłabalnaje prasiadańnie. Pakolki, aproč anamalnaha 2022 hoda, ceny za tonu ŭhnajeńniaŭ ciaham apošnich piaci hod byli dosyć stabilnymi i vahalisia ŭ miežach 215—265 dalaraŭ za tonu.
U spravazdačy za 3 kvartał kampanii Mosaic, jakaja taksama źjaŭlajecca pastaŭščykom kalijnych uhnajeńniaŭ na suśvietny rynak, prahnazujecca źnižeńnie abjomaŭ ekspartu «Biełaruskalija» ŭ 2023 hodzie na 3—4 młn. ton u paraŭnańni z dasankcyjnym pieryjadam.
«Adnak z dakładnaściu acanić straty nie ŭjaŭlajecca mahčymym, pakolki dziaržava chavaje hetyja pakazčyki. Ale prablemy z łahistykaj, źnižeńnie suśvietnych cenaŭ i nieabchodnaść rabić dadatkovyja źnižki viaduć da małaefiektyŭnaści hetaj haliny», — miarkuje ekśpiert.
Čytajcie taksama:
«Dźvie sistemy tarmažeńnia». Čamu adbyłasia avaryja na šachcie «Biełaruśkalija»
MZS: Nie budziem bicca hałavoj ab bietonnuju ścianu na Zachadzie, a znojdziem inšyja rynki zbytu
«Aŭtabiznes» skončyŭsia. Što za vydańnie heta było
Dalar za miesiac patańnieŭ na 19 kapiejek
Łukašenka pra adklučeńnie internetu ŭ 2020-m: Kali heta paŭtorycca, adklučym zusim23
Kamientary