Viadomy ekanamist Siarhiej Čały, jak i abiacaŭ, zapuściŭ novaje šou ŭ jutubie. Raspaviadajem, čym jano admietnaje. Spojler: heta toj samy Čały, tolki z muzykaj i Baruškaj.
U adroźnieńnie ad papiarednich, novy prajekt zadumany jak bolš zabaŭlalnaje tok-šou. U studyi prysutničajuć hości, scena aformlenaja ŭ vyhladzie haścioŭni, pieravažajuć jarkija kolery. Nie zabylisia i pra žyvuju muzyku, jakaja stvaraje muzyčnyja akcenty.
Farmat nahadvaje šou kštałtu «Viečiernij Urhant», ale ŭ Čałaha jano hramadska-palityčnaje. Mienš žartaŭ, bolš navin i analityki.
Jak adznačaje Siarhiej Čały, jon maryŭ pra takoje šou jašče ŭ Minsku ŭ dakavidnyja časy, ale atrymałasia realizavać zadumanaje tolki ciapier u Varšavie z udziełam biełarusaŭ i dla biełarusaŭ.
Šou składajecca z troch častak. U pieršaj viadoŭca raspaviadaje pra padziei, jakija zrabili na jaho ŭražańnie za apošnija dni. U hetym vypusku takimi stali parłamienckija vybary ŭ Polščy. Ale vielmi chutka Čały pieravodzić pohlad na Biełaruś i Łukašenku, zhadvaje padziei 2020 hoda i toje, što adbyłosia paśla i adbyvajecca ciapier.
Čały sprabuje hetyja padziei patłumačyć praz šabłon pavodzinaŭ muža i žonki padčas razvodu. Jon śćviardžaje, što «Łukašenka paetapna prachodzić usie etapy kinutaha».
Na pohlad Čałaha, niama nijakaha racyjanalnaha tłumačeńnia ŭsim inicyjatyvam uładaŭ. Ale ich dziejańni jaskrava śviedčać ab tym, što jany padzialili hramadstva na «svaich» i na «vorahaŭ», siarod jakich i ludzi, jakija syšli va ŭnutranuju emihracyju ŭ Biełarusi.
Čały prakamientavaŭ źjaŭleńnie na polska-biełaruskaj miažy rekłamnych płakataŭ z tannaj stamatałohijaj i dranikami i patłumačyŭ z punktu pohladu ekanamista, jakoje pasłańnie biełaruskich čynoŭnikaŭ za hetym chavajecca: chvalacca čynoŭniki nie tannymi pasłuhami, a nizkimi zarobkami.
Dla praviadzieńnia druhoj častki pieradačy Čały zaprasiŭ žurnalistku Kaciarynu Baruška. Razam jany abmierkavali padziei, źviazanyja z zabaronaj abmienu pašpartoŭ za miažoju, ekanamičnaje stanovišča ŭ Biełarusi i tradycyjnyja kaštoŭnaści z punktu hledžańnia aŭtarytarnaha hramadstva (hamafobija, antysiemityzm i chatni hvałt).
U niejki momant razmova znoŭ viarnułasia da paraŭnańnia vybaraŭ u Polščy i Biełarusi i da mahčymaści pierazahruzki adnosinaŭ pamiž Biełaruśsiu i Polščaj. Surazmoŭcy akcentavali ŭvahu na tym, što demakratyja — heta nie tolki svabodnyja vybary, ale i doŭhi šlach.
Nie abyšłosia biez ekskursu ŭ historyju Polščy (za apošnija 200 hadoŭ u Polščy było dziesiać paŭstańniaŭ, jakija ŭ bolšaści byli biespaśpiachovymi) i razvah ab tym, kolki paŭstańniaŭ spatrebicca biełarusam, kab dasiahnuć pieramohi.
Hetaja častka była pabudavanaja ŭ formie adkazaŭ Čałaha na pytańni z boku Kaciaryny Baruška.
Treciaj i apošniaj častkaj šou było intervju z hościem. U pieršaj pieradačy im stała biełaruskaja kampazitarka i arhanistka Volha Padhajskaja. Jana aŭtarka muzyki da opiery «Dzikaje palavańnie karala Stacha», pastaŭlenaj na scenie teatra Barbican u Łondanie Mikałajem Chalezinym i Natallaj Kaladoj. Padhajskaja taksama padrychtavała na zamovu Deutsche Welle simfaničny tvor razam z «Volnym choram», pryśviečany Maryi Kaleśnikavaj, — «Nieba Maryi».
Temaj razmovy stała tvorčaść kampazitarki. Volha patłumačyła, čamu jana lubić trylery i jak vybudoŭvalisia adnosiny z režysioram padčas pastanoŭki opiery. Akramia taho, Padhajskaja padzialiłasia svaimi ŭspaminami pra padrychtoŭku tvora dla arhana «Bach ihraje» i raspaviała, čamu z nazvy było prybrana słova «ihraje». Ciapier u Volhi svoj ansambl i prajekt «Ja hulaju pa čužych dvarach».
Padhajskaja raspaviała pra toje, nakolki dla kampazitara važna, kab jaho tvory vykonvalisia chacia b pad psieŭdanimam, i adznačyła, što kampazitar-pijanist, kampazitar-skrypač i kampazitar-arhanist pa-roznamu pišuć muzyku.
Nie abyšłosia i biez analizu pracesaŭ u biełaruskaj kultury i trecim siektary, jakija adbylisia pamiž dźviuma «Płoščami» — 2010 i 2020 hadoŭ, bieź jakich, na dumku Čałaha, nie było b kreatyvu ŭ «prahułkach» 2020 hoda.
U zaviaršeńnie razmovy Padhajskaja raspaviała, jak kampazitarcy žyviecca ŭ čužoj krainie i što dla jaje jość vyratavańniem.
Šou zaviaršyłasia ŭryŭkam z opiery «Dzikaje palavańnie karala Stacha». Kampazitar vykanała temu furmana.
«Kali ludziej advoziać, heta taki stan, jon padajecca tryvožnym. Pastajanna niešta adbyvajecca. Pastajanna niechta niekudy pieramiaščajecca, niekaha niekudy pastajanna zvoziać. Pieramiaščeńnie — heta ruch pastajannaj tryvohi», — patłumačyła Volha sens muzyčnaj temy.
Čytajcie jašče:
«Takoha ŭ biełaruskaj infaprastory jašče nie było». U Siarhieja Čałaha budzie novy prajekt
Papularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»29
Kamientary
Kak možno etu čuš davať v efir ?