Vajna2121

«Suprać nas vajujuć nie debiły». Dzianis Urbanovič raskazaŭ pra boj, u jakim byŭ paranieny

Dzianis Urbanovič za paŭtara hoda vajny piać razoŭ byŭ paranieny. Ale źbirajecca viarnucca na front i paśla apošniaha ranieńnia, jakoje jon atrymaŭ u Klaščejeŭcy. U bataljonie biełaruskich dobraachvotnikaŭ «Vołat» 34-hadovy vajar kamanduje bajavoj hrupaj. Praź dziesiać dzion paśla ranieńnia jon iznoŭ pačaŭ čuć, i «Naša Niva» raspytała jaho pra boj i situacyju na froncie.

Dzianis Urbanovič. Fota: asabisty albom Dzianisa Urbanoviča

Dzianis Urbanovič (jaho pazyŭny «Vaŭkałak») kaža, što apošni raz byŭ paranieny ŭ bai blizu siała Klaščejeŭka na poŭdzień ad horada Bachmuta, kali ŭznačalenaja im hrupa šturmavała rasijskija pazicyi.

Praciŭnik biŭ pa padraździaleńni pramoj navodkaj hranatamiotami SPH-9 z troch bakoŭ. Ale ŭsio roŭna rasijskija akopy byli zachoplenyja.

Boj pad Klaščejeŭkaj adbyŭsia 10 vieraśnia. Nichto z hrupy Urbanoviča nie zahinuŭ, adnak niekalki sałdat, jak i ich kamandzir, byli paranienyja.

Lidara «Maładoha frontu» paraniła, kali ŭzmacniŭsia abstreł advajavanych akopaŭ.

Askiepak snarada trapiŭ jamu ŭ ruku z unutranaha boku pobač z arteryjaj. Jamu ŭdałosia spynić kroŭ i zastacca ŭ bai. Ad surjoźniejšych ranieńniaŭ bajca ŭratavała amunicyja. Dziakujučy joj adzin z askiepkaŭ nie prabiŭ kapšuka, a zastaŭsia ŭ broniekamizelcy. Ad jašče niekalkich zastalisia drapiny i siniaki.

«Ja ŭžo dumaŭ, što nie vyjdu adtul, — pryznajecca Dzianis. — Dumaŭ, što rasijanie kinucca na našy pazicyi i nas pierastralajuć, ale nam udałosia adbicca. Tych, kaho kinuli nas atakavać, my źniščyli. Ich było ź dziasiatak. Pazicyju my ŭtrymali. Zadaču vykanali. U hrupie byli biełarusy z ukraincami».

U bai pad Klaščejeŭkaj vybucham była paškodžanaja i zbroja Dzianisa Urbanoviča. Fota: asabisty albom Dzianisa Urbanoviča

U špitali Urbanoviču dyjahnastavali mocnuju kantuziju. Jamu parvała barabannuju pieraponku pravaha vucha, a levaje ahłušyła. Tolki praz tydzień špitalizacyi vajar staŭ čuć. Akramia taho, jon praciahvaje zalečvać askiepačnaje ranieńnie ruki.

«Kantuzija ŭ mianie nie pieršaja, i vušy maje duža naciarpielisia. Daktary skazali, što treba miesiaca paŭtara mnie być u cišy. Nijakaj stralaniny, — raskazvaje Dzianis. — Ciapier, možna skazać, majo zdaroŭje prosta šykoŭnaje. Staŭ čuć. A raniej znachodziŭsia niby ŭ vakuumie. Na ruce rana zaciahnułasia. Dzirka budzie z palec, ale ničoha nie parobiš. Na levaj ruce jość, a ciapier budzie na pravaj».

Pa słovach Dzianisa, 21 vieraśnia lekary dazvolili jamu lačycca ŭ chatnich umovach.

Bataljon «Vołat», u jakim słužyć Urbanovič. Fota: bataljon «Vołat»

Urbanovič kaža, što vajskovaje kiraŭnictva padziakavała jaho hrupie za vyzvaleńnie 270 mietraŭ ukrainskaj terytoryi.

«Tam my ŭžo prasunulisia na 500 mietraŭ. Za kožny mietr davodzicca duža vajavać. Naprykład, za dom u Klaščejeŭcy mahli bicca tydzień. I straty byli», — havoryć Dzianis.

17 vieraśnia kamandavańnie Uzbrojenymi siłami Ukrainy aficyjna paviedamiła pra vyzvaleńnie Klaščejeŭki, siała na Bachmuckim kirunku ŭ Danieckaj vobłaści.

34-hadovy ŭradženiec vioski Michałkavičy Łahojskaha rajona Dzianis Urbanovič za čas vajny pieražyŭ piać ranieńniaŭ. Paśla kožnaha viartaŭsia na front. Toje ž źbirajecca zrabić i hetym razam. 

Jon kaža, što jamu nie abaviazkova znachodzicca na pieradavoj. Jak kamandziru hrupy bataljona «Vołat», jamu treba raźmiarkoŭvać zadačy siarod padnačalenych i sačyć za ich vykanańniem.

«U mianie kamandzirskija funkcyi, ale inšym razam situacyja vymahaje majho ŭdziełu ŭ bai. U apošni ja vyjšaŭ, bo jon byŭ vielmi haračym», — tłumačyć Dzianis.

Jon adznačaje, što ciapier bolš času budzie addavać navučańniu papaŭnieńnia. Ale ŭ vypadku nieabchodnaści pojdzie na pieradavuju nie razdumvajučy.

Zabityja rasijskija vajskoŭcy paśla boju pad Klaščejeŭkaj. Fota: skryn videa bataljona «Vołat»

Dzianis Urbanovič zhadvaje, što ŭ advajavanych akopach pad Klaščejeŭkaj lažała šmat zabitych rasijskich sałdat. Trupy lažali paŭsiul. Stajaŭ nievynosny smurod.

Pa jaho słovach, siarod zabitych byli vahnieraŭcy z bataljona «Šturm Z», jakija padpisali kantrakty ź Ministerstvam abarony Rasii, a taksama niamała mabilizavanych z «DNR» i «ŁNR».

«Ja b nie skazaŭ, što suprać nas vajujuć debiły, — padsumoŭvaje Dzianis Urbanovič. — U ich razumna rasstaŭlenyja pazicyi. Kali iduć u boj, to viedajuć, što robiać».

Rasija napała na Ukrainu, u tym liku z terytoryi Biełarusi, 24 lutaha 2022 hoda. Za hety čas, baroniačy Ukrainu, zahinuli jak minimum 32 biełarusy. Jašče dvoje trapili ŭ pałon. Usiaho ŭ składzie ŭkrainskaj armii vajujuć niekalki socień biełaruskich dobraachvotnikaŭ.

«Naša Niva» — bastyjon biełaruščyny

PADTRYMAĆ

Hladzicie taksama:

HUBAZiK pryjšoŭ da baćkoŭ Dzianisa Urbanoviča

Biełaruski dobraachvotnik paŭhoda znachodzicca pad vartaj u Kijevie. Sud admoviŭsia vyzvalić jaho pad chatni aryšt

«Sdochni, Putler. Niet vojnie». Skarynaznaŭca abviaściŭ vajnu Rasii i biespakarana pravioŭ pieršuju dyviersiju

«Vychad z SSSR byŭ niezakonnym, usie naležać nam». Rasijski deputat pradrakaje vajnu z usimi byłymi savieckimi respublikami, navat ź Biełaruśsiu

Kamientary21

  • Mafkees
    22.09.2023
    Ja chz kak podobrať słova čtob nie zvučało po idiotski pośle mnoho vypitoho piva.
    Dienis ty krutiejšij čieł i primier dla mnohich i poetomu tiebie nužno bierieč siebia,potomu čto v Biełarusi takich kak ty očień mało. I jeśli dla Biełarusi kohda-nibud́ nastupit buduŝieje,to ty etoj stranie budieš očień nužien.
  • 3 hłaz
    22.09.2023
    a chto heta?
    Žir, Ty !?
  • karova abo******
    22.09.2023
    Ciapier, možna skazać, majo zdaroŭje prosta šykoŭnaje.

    a jop** diko izianiajuś, hospoda
    mnie b choť niemnoho choť miestami takoho zdorovja /

Udzielnik apazicyjnaha ruchu Vital Łuchvič vyjaviŭsia płatnym milicejskim stukačom

Udzielnik apazicyjnaha ruchu Vital Łuchvič vyjaviŭsia płatnym milicejskim stukačom

Usie naviny →
Usie naviny

Hramadzianina Hiermanii prysudzili ŭ Biełarusi da rasstrełu14

Źnikłaha ŭ Polščy biełarusa znajšli ŭ Varšavie źbitym i biez dakumientaŭ9

«Vada pranikła ŭnutr, zapoŭniła sałon mnie pa pojas, ruki treślisia». Chto taja dziaŭčyna z zapaminalnaha fota minskaha patopu3

U Biełarusi pačałasia pieradvybarčaja ahitacyja za Łukašenku FOTAFAKT32

Suśvietnyja ceny na kavu bjuć rekordy. Košt vašaha łate pad pahrozaj5

Vatykan pryznačyŭ lidskaha ksiandza Andreja Znoska biskupam. Roŭna hod tamu jaho zatrymlivali siłaviki

Stała viadoma, u čym padazrajuć Ramašeŭskuju, Dzikavickaha i inšych top-mieniedžaraŭ «Biełsata»20

U Italii žurnalistku aštrafavali za žarty pra rost premjer-ministra Miełoni — heta paličyli bodyšejminham1

Jak biełarusam jeździć praź miažu na aŭto, zarehistravanych u ES, kali biełaruskija numary akažucca pad poŭnaj zabaronaj4

bolš čytanych navin
bolš łajkanych navin

Udzielnik apazicyjnaha ruchu Vital Łuchvič vyjaviŭsia płatnym milicejskim stukačom

Udzielnik apazicyjnaha ruchu Vital Łuchvič vyjaviŭsia płatnym milicejskim stukačom

Hałoŭnaje
Usie naviny →