Prapahanda vypuściła film pra analityka Andreja Parotnikava i pakazała, jak zapisvali razmovy ź jaho telefona
Na ANT vypuścili film, dzie raskazali, u čym vinavaciać analityka Andreja Parotnikava i jak jaho zatrymlivali (a paśla rabili vyhlad, što adpuścili).
Andrej Parotnikaŭ. Skryn videa ANT
Na Parotnikava zaviali kryminalnuju spravu pa č. 1 art. 356 «zdrada dziaržavie».
U čym jaho vinavaciać? U tym, što rychtavaŭ analityčnyja zapiski na temy biełaruskaj palityki i ekanomiki i publikavaŭ ich, u tym liku ŭ svaim Belarus Security Blog, a taksama rassyłaŭ ich inšym, u tym liku ludziam, jakich ANT nazyvaje supracoŭnikami polskaj raźviedki.
«Danyja źbiraŭ praz znajomych siłavikoŭ, čynoŭnikaŭ, na sustrečach i bryfinhach. A paśla adpraŭlaŭ za miažu — za hrošy», — kaža zakadravy hołas.
U efiry pakazvajuć kadry schavanaj zdymki jašče z 2016 hoda dypłamatyčnaha supracoŭnika Polščy Jakuba Mušynskaha, jaki sustrakaŭsia z Parotnikavym. ANT nazyvaje Mušynskaha supracoŭnikam Ahienctva raźviedki Polščy. Publikujucca taksama frahmienty prasłuški ich razmoŭ.
Schavanaja zdymka Parotnikava i polskaha dypłamata, pakazanyja ŭ efiry ANT
Pakazvajuć taksama pierapisku Parotnikava pa elektronnaj pošcie (dostup da jaje atrymali, vyhladaje, paśla zatrymańnia) z polskim palitołaham Hžehažam Arłoŭskim. Toj paśla pačatku vajny ŭ 2022-m pytaŭsia ŭ analityka, što robiać u Biełarusi rasijskija vajskoŭcy, kolki ich, jakija nastroi ŭ siłavych šerahach, jakuju techniku vyvoziać ź Biełarusi ŭ Rasiju. Raspytvaŭ Arłoŭski taksama pra kalinoŭcaŭ i toje, ci nie čuŭ Parotnikaŭ niešta pra połk, jaki nibyta źbirajecca stvarać Karač.
U filmie pakazany momant zatrymańnia. Doma ŭ Parotnikava praviali pieratrus, znajšli «hrošy, ekstremisckuju simvoliku i mnostva dokazaŭ supracoŭnictva z zamiežnymi śpiecsłužbami». Na hetych słovach u kadry demanstrujucca bieł-čyrvona-bieły ściah, brašury «Biełaruskaj chryścijanskaj demakratyi» i «Pravaha aljansu» i kniha navukoŭca Miłhrema Stenli «Jak dobry čałaviek stanovicca niahodnikam».
Jak vynikaje ź filma, u Minsku Parotnikava zatrymali, a paśla vykarystoŭvali, kab daviedacca pra šlachi evakuacyi biełarusaŭ. Jaho prymusili zvanić pres-sakratarcy Cichanoŭskaj Hańnie Krasulinaj, pisać Andreju Stryžaku i inšym — hetyja razmovy i pierapiski zapisvalisia.
Paśla dazvolili jamu zrabić vyhlad, niby jon źbirajecca vyjazdžać za miažu. Maršrut musiŭ być Minsk — Lozna — Rudnia — Smalensk. A paśla Maskva.
Miarkujučy z kadraŭ filmach, niekatoryja ź pierapisak padčas «ahienturnaj hulni» vialisia 30 sakavika i 1 krasavika 2023 hoda. «Naša Niva» ž napisała pra zatrymańnie Parotnikava 21 sakavika, za 9 dzion da taho.
Andrej Parotnikaŭ u mašynie ź siłavikami padčas apieracyi KDB. Skryn videa ANT
Što admietna, u anonsie filma jaho prezientavali jak «zasnavany na realnych padziejach». I niekatoryja kadry ŭ im pastanovačnyja. Naprykład, taja samaja scena zatrymańnia Parotnikava — niajasna, ci heta realnaja zdymka, ci pastanoŭka, bo zašmat rakursaŭ, zaplečnik, jaki padaje pry zatrymańni, to ŭ kadry, to źnikaje.
Bolšaść śćviardžeńniaŭ, što prahučali ŭ filmie, nijak niemahčyma niezaležna pravieryć.
Miarkujučy ź filma, tyja, chto moh dapamahčy Parotnikavu z evakuacyjaj, nie asabliva jamu daviarali. Zastajecca niezrazumiełym, ci ŭ vyniku «ahienturnaj hulni» z Parotnikavym KDB niekaha jašče zatrymaŭ.
«Nam było viadoma pra jahony aryšt ad samaha pačatku, — napisaŭ u svaim fejsbuku Andrej Stryžak. — Usie pieramovy sa mnoj asabista Andrej vioŭ, kali ŭžo byŭ zatrymany. Ad samaha pačatku było viadoma, što čałavieka «viaduć». Viadoma dziakujučy tamu, što ŭnutry śpiecsłužb dahetul jość nieabyjakavyja da spravy pieramienaŭ ludzi», — piša Stryžak.
«My razumieli, što evakuacyja Andreja chutčej za ŭsio skončycca ničym. U nas było niekalki zadač — pasprabavać vyciahnuć našaha kalehu i siabra; adsačyć i daviedacca, jak pracujuć i što robiać śpiecsłužby ŭ takich apieracyjach; u vypadku niemahčymaści evakuacyi zabiaśpiečyć mahčymaść Andreju paspać «na biełych praścinach» zamiest hebešnaj škonki jak maha daŭžej», — śćviardžaje Stryžak.
«Śpiecsłužby nie ŭskryli i nie pieraciali anivodnaha z našych kanałaŭ, jakija my vykarystoŭvajem dla evakuacyi», — padsumoŭvaje Stryžak.
Łukašysty ŭsio čaściej interpretujuć jak «zdradu dziaržavie» hramadskuju, kulturnuju ci daśledčyckuju dziejnaść. Samy pakazalny tut prykład — sprava Paŭła Biełavusa.
Ciapier Parotnikaŭ u SIZA, jamu pahražaje da 15 hadoŭ źniavoleńnia.
Minčanka pakinuła stanoŭčy vodhuk na sumku — i raptam vykryła zdradu čužoha muža20
Kamientary