U Biardziansku rasijanie zabili dvuch 16-hadovych padpolščykaŭ

Heta nahadvaje raman «Maładaja hvardyja», i zdaryłasia ŭsio nie tak daloka ad Krasnadona, dzie adbyvałasia jaho dziejańnie. Biardziansk — heta port na Azoŭskim mory ŭ Zaparožskaj vobłaści,

Pra zdareńnie, jakoje adbyłosia 24 červienia, pieršym u svaim telehram-kanale paviedamiŭ staršynia kałabaracyjnaha ruchu «My vmiestie s Rośsijej» u Zaparožskaj vobłaści Uładzisłaŭ Rohaŭ. Pavodle jaho słoŭ, 24 červienia prykładna ŭ 19:00, «kali nasielnictva adpačyvała na haradskoj nabiarežnaj», «dvoje bajevikoŭ adkryli ahoń z aŭtamatyčnaj zbroi».

Jak paźniej paviedamili žurnalistam u apieratyŭnych słužbach Zaparožskaj vobłaści, «u Biardziansku ŭ rajonie parku imia Šmita ŭ 19:15 dvoje ŭzbrojenych aŭtamatyčnaj zbrojaj chłopcaŭ adkryli ahoń».

Na miesca zdareńnia apieratyŭna prybyli supracoŭniki Ministerstva ŭnutranych spraŭ i vajskovaj palicyi.

Supracoŭniki siłavych struktur vydalili adpačyvalnikaŭ z nabiarežnaj, «kab paźbiehnuć achviar», paśla čaho «strałki byli abiasškodžanyja na miescy».

Rohaŭ u svaim telehram-kanale paviedamiŭ imia adnaho z tych, chto stralaŭ: «Viadoma, što adzin ź ich raniej byŭ zatrymany za antyrasijskuju dziejnaść, [heta] Tyhran Ahanisian». Paźniej stała viadoma, što druhi junak — adnakłaśnik Tyhrana — Mikita Chanhanaŭ.

Paźniej u sacyjalnych sietkach źjaviłasia videa, jakoje zapisaŭ sam Tyhran. Vidać, što jon z aŭtamatam i ŭ taktyčnych palčatkach.

Na videa chłopiec kaža: «Usio, heta śmierć, chłopcy. Byvajcie! Słava Ukrainie!» Na hetym zapis abryvajecca.

25 červienia paŭnamocny pradstaŭnik Viarchoŭnaj Rady Dźmitryj Łubiniec paviedamiŭ, što Ahanisian i Chanhanaŭ ustupili ŭ boj z akupantami. Jany zastrelili rasijskich vajskoŭca i palicyjanta, ale i sami zahinuli.

Hety epizod pakazvaje, nakolki narodnaj stała vajna suprać rasijskich zachopnikaŭ navat na samych rusifikavanych i šmatetničnych terytoryjach poŭdnia Ukrainy, jakija rasijanie zachapili ŭ pieršyja dni ahresii, u lutym 2022-ha.

Pra Tyhrana Ahanisiana ŚMI pisali i raniej. Atrymała rozhałas paviedamleńnie pra jaho zatrymańnie 30 vieraśnia 2022 hoda. Jak raskazvali žurnalistam vidavočcy, dadomu da junaka pryjechali na vaśmi mašynach, pieraviarnuli tam usio dahary nahami i zabrali ŭsie hadžety i nośbity infarmacyi.

Śledčyja dapytvali Tyhrana z prymianieńniem siły i elektratoku. Jany chacieli, kab chłopiec pryznaŭsia ŭ padrychtoŭcy dyviersii na čyhuncy.

Praź piać dzion, paśla rozhałasu ŭ ŚMI, Tyhran byŭ vyzvaleny z umovaj štodzionnaj jaŭki ŭ miascovyja pravaachoŭnyja orhany.

Mikitu Chanhanavu tady ŭdałosia paźbiehnuć aryštu, ale paźniej jon taksama byŭ vymušany štodnia zjaŭlacca da śledčych i ŭdzielničać u śledčych dziejańniach.

24 maja hataha hoda abodvum chłopcam vystavili abvinavačańnie pa artykule 281 Kryminalnaha kodeksa Rasii, jaki praduhledžvaje pakarańnie ad 10 da 20 hadoŭ pazbaŭleńnia voli. Junakoŭ čakaŭ pakazalny sud.

Jak paviedamlajecca, u abvinavačańni adznačajecca, što ŭ pačatku vieraśnia 2022 hoda chłopcy paškodzili čyhunačnaje pałatno, kab pieraškodzić pastaŭkam uzbrajeńniaŭ rasijskaj armii.

U červieni hetaha hoda Jeŭraparłamient zapatrabavaŭ ad rasijskich uład spynić praces suprać školnikaŭ i dazvolić im pakinuć akupavanuju terytoryju.

Za dzień da pierastrełki chłopcaŭ iznoŭ vyklikali ŭ adździaleńnie palicyi. Za paŭhadziny da taho, jak śledčy patelefanavaŭ baćkam i paviedamiŭ pra toje, što ich dzieci zahinuli, z Tyhranam razmaŭlała maci. Jon skazaŭ joj, što jany hulajuć ź Mikitam i dumajuć, jak adśviatkavać Mikitaŭ dzień naradžeńnia. 25 červienia chłopcu pavinna było spoŭnicca 17 hadoŭ. Mahčyma, paśla vyzvaleńnia Biardzianska ŭdasca vyznačyć, što adbyłosia za tyja paŭhadziny. Biardziansk, jak i Mielitopal, mohuć stać hałoŭnymi metami ŭkrainskaha kontrnastupu.

Čytajcie jašče:

U vyniku ŭvarvańnia Rasii va Ukrainu zahinuła jak minimum 485 dziaciej

Alaksiej Tałaj pryznaŭsia, što vyvaz ukrainskich dziaciej u Biełaruś uchvaliŭ asabista Łukašenka

• 7
• 0
• 4
• 4
• 3
• 118
• 12
• 0