Čym karysny burak i jak pryhatavać ź jaho soki i siropy

Cukrovyja, karmavyja, stałovyja

Z cukrovych burakoŭ robiać cukar, karmavymi — kormiać žyviołu. Ludzi zvyčajna ŭžyvajuć nie cukrovyja i nie karmavyja, a stałovyja buraki.

Karmavyja buraki mohuć važyć da 10—12 kiłahramaŭ, byvajuć žoŭtyja, biełyja, čyrvonyja. 

Cukrovyja buraki — techničnaja kultura, vynik sielekcyi, heta syravina dla cukrovaj pramysłovaści. Ich karaniapłody zvyčajna śvietłyja, važać 400—500 hramaŭ, jany bahatyja na cukar (da 23%).

Płady stałovych burakoŭ važać ad 400 da 900 hramaŭ, mohuć być ciomna-čyrvonyja, bardovyja, čyrvona-fijaletavyja. Stałovyja buraki bahatyja na cukar (9—16%), białok (1,8—03%), minieralnyja soli, klatčatku, vitaminy. Spažyvajucca karaniapłody — varanyja, kansiervavanyja, sušanyja — i baćvińnie.

Čym karysny burak?

Buraki źmiaščajuć vuhlavody: fruktozu, cukrozu i hlukozu, — a taksama naturalnyja farbavalniki, piekcin, vitaminy — A, C, B, K i RR, ščaŭjevuju i jabłyčnuju kisłoty, białki i minieralnyja soli: kalij, kalcyj, fosfar, mahnij i cynk. Dziakujučy takomu bahatamu sastavu jany majuć hajučyja ŭłaścivaści.

Buračny sok i buračny sirop vitaminizujuć i ŭmacoŭvajuć arhanizm. Ich užyvajuć u časie prastudnych zachvorvańniaŭ, asabliva pry kašli, a taksama pry zachvorvańniach kišečnika, piečani i pry hipiertanii.

Buraki ščołačnyja, tamu ich rajać užyvać ludziam, jakija jaduć sałodkaje i miasa, kab uraŭnavažyć kisłotnaje asiarodździe.

Ale ludzi z cukrovym dyjabietam, niefrałohijaj i reŭmatyzmam pavinny być aściarožnyja.

Varanyja čyrvonyja buraki majuć vysoki hlikiemičny indeks i admoŭna ŭpłyvajuć na padtrymańnie naležnaha ŭzroŭniu cukru ŭ kryvi. Ale dyjabietyki mohuć śmieła ŭžyvać syryja buraki ŭ vyhladzie sałataŭ abo sokaŭ.

Aksałaty, jakija jość u burakach, mohuć vyklikać źjaŭleńnie kamianioŭ u nyrkach, tamu ludzi, schilnyja da adkładaŭ kamianioŭ, pavinny abmiežavać spažyvańnie peŭnych praduktaŭ, u tym liku burakoŭ, ščaŭja, špinatu, čaju i revieniu.

Aściarožnaść varta prajavić i pacyjentam z asteaparozam, zachvorvańniami piečani i padstraŭnikavaj załozy.

Častkova pazbavicca ad aksałataŭ možna, kali kipiacić buraki ŭ vadzie, bo razam sa źlitaj vadoj my prybirajem kala 50% škodnych rečyvaŭ.

Ci ŭsim možna buračny sok?

Navukovyja daśledavańni pakazvajuć, što śviežy buračny sok stanoŭča ŭpłyvaje na mozh, jaki lepš nasyčajecca kisłarodam, što pryvodzić da bolš chutkaj reakcyi i bolš praciahłaha času aktyŭnaści biez pačućcia stomy. Ludzi, jakija zajmajucca sportam, a taksama pažyłyja ludzi, jakija rehularna pjuć buračny sok, majuć dobruju fizičnuju formu. Užyvańnie buračnaha soku ŭmacoŭvaje arhanizm, taksama heta efiektyŭny srodak pry prastudzie i słabaści, naprykład, pry hrypie.

Tym nie mienš kožnamu indyvidualna pierad užyvańniem buračnaha soku ŭ lačebnych metach lepš prakansultavacca ź lekaram.

Pavialičyć

Onet.pl prapanuje niekalki karysnych receptaŭ.

Buračny sok ź miodam

Buračny sok ź miodam dapamoža źnizić arteryjalny cisk, a taksama palepšyć samaadčuvańnie.

Spatrebiacca:

• śviežy buračny sok — paŭlitra,
• miod — paŭlitra.

Hatavańnie:

1. Vyciśnicie sok z burakoŭ — ababranych i narezanych na bolš drobnyja kavałački. Lepš za ŭsio vykarystać sokavyciskałku. Maładyja buraki bolš sakavityja. Dla paŭlitra soku spatrebicca 2—3 štuki.
2. U aparany słoik ulicie buračny sok, dadajcie miod i ŭsio staranna pieramiašajcie draŭlanaj łapatkaj.
3. Picie sok dva tydni za 30 chvilin da ježy — pa 2 stałovyja łyžki, 2—3 razy na dzień.

Buračny sok ź miodam ad kašlu:

Składniki:

• buračny sok,
• miod.

Hatavańnie:

1. Buračny sok źmiašajcie ź miodam u praporcyi 1:1. Kastrulu z sumieśsiu pastaŭcie ŭ bolš vialikuju z haračaj vadoj.
2. Nahravajem kastrulu na vadzianoj łaźni na słabym ahni, nie davodziačy da kipieńnia, kab inhredyjenty zachavali svaje hajučyja ŭłaścivaści. Tempieratura siropu nie pavinna pieravyšać 45 hradusaŭ pa Celsiju.
3. Hatovy sirop zachoŭvać u chaładzilniku.

Sirop z cukrovych burakoŭ

Buračny sok i sirop, atrymanyja z cukrovych burakoŭ, utrymlivajuć vitaminy, minieralnyja soli, folijevuju kisłatu, aminakisłatu — bietanin i naturalnyja farbavalniki — bietacyjaniny, dziakujučy jakim razburajucca niebiaśpiečnyja svabodnyja radykały. Buračnaja pataka, ci buračny sirop, jaki ŭtvarajecca pry vytvorčaści cukru, vykarystoŭvajecca ŭ charčovaj pramysłovaści.

Varta pakaštavać buračny sirop, kali vy chočacie pamienšyć kolkaść cukru, što spažyvajecie. Buračnaja pataka zamianiaje cukar, nadaje sałodki smak vypiečcy, napojam i jość vydatnym dadatkam da desiertaŭ abo blinoŭ.

Naturalny sirop z cukrovych burakoŭ maje šmat azdaraŭlenčych ułaścivaściaŭ: jon dabratvorna ŭpłyvaje na niervovuju i sardečna-sasudzistuju sistemy, padtrymlivaje funkcyju nyrak, rehuluje kryviany cisk i pavyšaje imunitet. Buračny sirop mohuć spažyvać dzieci, ludzi, jakija zmahajucca ź lišniaj vahoj, i pažyłyja ludzi, jakija chočuć palepšyć svoj fizičny i psichičny stan.

Składniki:

• cukrovyja buraki — niekalki štuk (z 1 buraka atrymajecca 1 šklanka siropu),
• vada — stolki, kab pakryć buraki, jakija varacca.

Hatavańnie:

1. Abiarycie cukrovyja buraki i narežcie nievialikimi kavałačkami.
2. Źmiaścicie narezanyja buraki ŭ kastrulu z šyrokim dnom i zalicie dastatkovaj kolkaściu vady, kab jana ich pakryła.
3. Varycie ŭsio heta na słabym ahni, pakul nie atrymajecca husty sirop.
4. Duchmianaja pataka paśla taho, jak stanie karyčnievaj, hatovaja da ŭžyvańnia.

Buračny sirop ź miodam ad kašlu

Buračny sirop — efiektyŭny adcharkvalny srodak, jaki ŭžyvajecca pry nadakučlivym kašli i zapaleńni vierchnich dychalnych šlachoŭ.

Składniki:

• buraki — 3 vialikija kavałki čyrvonych burakoŭ,
• miod (padzievy, lipavy abo hračany — 3 stałovyja łyžki).

Hatavańnie:

1. Abiarycie buraki i natrycie ich na tarcy. Dla hetaha varta vykarystoŭvać miedycynskija palčatki, inačaj buračny sok vypackaje ruki.
2. Składzicie ŭsio ŭ kastrulu, dadajcie miod i pieramiašajcie.
3. Varycie masu na słabym ahni kala 20 chvilin.

Buračny sirop z cukram ad kašlu

Spatrebiacca:

• čyrvonyja buraki — 1-2 št.,
• cukar — 3 st. ł.

Hatavańnie:

1. Staranna pamyjcie buraki. Trochi zrežcie vierchniuju častku.
2. Zrabicie ŭ burakach vialikija adtuliny, nasypcie ŭ pahłybleńni cukar i pakińcie buraki na 1—2 hadziny.
3. Źbiarycie ŭ kubak sok, jaki źjaviŭsia. Zachoŭvajcie buraki ŭ chaładzilniku, źbirajučy sok, jaki vydzialajecca.

Čytajcie jašče:

Na Kamaroŭcy źjavilisia pieršyja čarnicy. Pačym pradajuć?

Try śniadanki z aŭsianki: jabłyčna-arechavy, vanilna-muskatny i kunžutna-sojevy

«Chočacie ekanomna raschodavać siamiejny biudžet — ježcie, jak jeli našy prodki». Tak raić vybitnaja kucharka, vyprabavaŭšy ŭsio na sabie 

• 7
• 0
• 0
• 1
• 1
• 1