Italjanski režysior pryjechaŭ u Minsk pastavić opieru, niahledziačy na palityčnyja represii ŭ krainie
Premjera «Sievilskaha cyrulnika» ŭ Vialikim teatry opiery i baleta adbudziecca zaŭtra.
Pastaviŭ opieru režysior ź Italii Alda Tarabieła i mastak Enryka Musienič. Apošni byŭ adkazny za scenahrafiju i kaściumy.
Tarabieła — opierny režysior, piedahoh i kampazitar. U svaim reziume artyst paznačyŭ, što supracoŭničaŭ z rasijskim kinarežysioram Mikitam Michałkovym padčas pracy nad filmam «Vočy čornyja» (1987).
Damoviŭsia ab rabocie ź italjanskim režysioram dyryžor-pastanoŭščyk Vialikaha teatra Uładzimir Avadok. Pra heta jon raskazaŭ u adnym z intervju dziaržaŭnym miedyja.
«Niahledziačy na toje, što Vialiki teatr Biełarusi maje šyroki italjanski repiertuar, ź italjanskimi režysiorami my jašče nie supracoŭničali. Kali mastackaja rada i kiraŭnictva teatra vyznačylisia z nazvaj budučaj pastanoŭki, mianie paprasili źviazacca z vydatnymi pradstaŭnikami italjanskaj opiernaj muzyki. Jany, u svaju čarhu, paraili źviarnucca da Alda Tarabieła, jaki na praciahu 20 hadoŭ kiravaŭ teatram u Łucy. Pa rekamiendacyi źjaviŭsia i mastak-pastanoŭščyk Enryka Musienič, jaki adkazvaje za scenahrafiju i kaściumy», — padzialiŭsia jon.
Italjanski režysior pryjechaŭ u Biełaruś u krasaviku i za šeść dzion paśpieŭ pastavić uvieś muzyčny materyjał. Paśla jon pryjazdžaŭ u Minsk u mai na repietycyi.
Vizit Tarabieła i jaho pracu ŭ Vialikim teatry prapahanda padaje jak «kulturnuju dypłamatyju nasupierak žaleznaj zasłonie».
«Ja sapraŭdy jak pasoł dobraj voli, dla mianie heta vialiki honar. Ździŭleny i navat šakavany, jakaja tut arhanizacyja i kamanda. Słuchaju salistaŭ i zabyvajusia, što jany ź Biełarusi i Rasii: jany na adnym uzroŭni ź italjanskimi śpievakami. U ich cudoŭnaje vymaŭleńnie», — kazaŭ Alda Tarabieła ŭ siužecie BT.
«Sievilskaha cyrulnika» Tarabieła stavić užo čaćviorty raz. Pakazy opiery z udziełam italjanskaha režysiora byli ŭ Miłanie, Taronta i Sieule.
Dyrektar u spravie kulturnickaj dypłamatyi Biełaruskaj rady kultury Aleś Čachoŭski miarkuje, što «zamiežnyja tvorcy mohuć być nie ŭ kursie palityčnaj situacyi ŭ Biełarusi i tych piermanientnych represij, da jakich Vialiki teatr maje niepasrednaje dačynieńnie».
«Chacia, ščyra kažučy, ja nie vieru ŭ heta, tut, chutčej, spracoŭvaje teza «hrošy nie pachnuć», — kaža Alaksandr. — Dla ich heta «prosta praca», a režym takoje vykarystoŭvaje na svaju karyść. Vialiki teatr takim čynam demanstruje, jakaja idzie mižnarodnaja supraca. I ŭvohule ciapier tam asnoŭnyja hości — salisty i dyryžory z Rasii, bo hości ź inšych krain całkam razumiejuć, što vystup na scenie Vialikaha teatra aznačaje zhodu z usim tym žacham, što jość jak u samim teatry, tak i va ŭsioj śfiery kultury ŭ Biełarusi».
Pradstaŭnica narodnaj ambasady Biełarusi ŭ Italii Julija Juchno dasyłała Alda Tarabieła niekalki listoŭ, u jakich tłumačyła, što ciapier adbyvajecca ŭ Biełarusi, ale adkazu na ich nie atrymała.
«Sprabavała sustrecca ź im, ale taksama nie atrymałasia, — kaža jana. — Ciapier rychtuju materyjał, jaki budu dasyłać u miascovyja italjanskija miedyja. 21 červienia budzie sustreča na abłasnym uzroŭni pa temie Biełarusi, tam płanuju taksama raskazać pra hety vypadak.
Nie viedaju, ci heta jaho asabistaja pazicyja, ale jamu 75 hadoŭ, mahčyma, jon užo nie ŭ palitycy.
Viedajecie, u Italii šmat biełarusaŭ, i jość tyja, jakija padtrymlivajuć Pucina. Tych, chto žyvie ŭ Italii i razumieje, što tut i jak adbyvajecca, hetaja situacyja nie ździŭlaje. I pra Biełaruś tut sapraŭdy mała infarmacyi. Jon papraŭdzie moža nie viedać taho, što ŭ nas u krainie adbyvajecca».
«Naša Niva» taksama skiravała italjanskamu režysioru Alda Tarabieła list na elektronnuju poštu z prośbaj prakamientavać, čamu jon vyrašyŭ pryniać zaprašeńnie Vialikaha teatra Biełarusi, ale adkazu ad jaho na momant publikacyi nie atrymała.
Ź leta 2020 hoda bolš za 1000 dziejačaŭ biełaruskaj kultury sutyknulisia z represijami, minimum 90 čałaviek u hety momant znachodziacca za kratami.
Takuju statystyku pryvodzić Biełaruskaja rada kultury.
Sa žniŭnia 2020 hoda ź Vialikaha teatra byli zvolnienyja «za palityku» znakavyja artysty i muzyki: salist opiery Ilja Silčukoŭ, hałoŭny kancertmajstar Rehina Sarkisava, hałoŭny dyryžor Viačasłaŭ Volič, dyryžor Andrej Hałanaŭ, skrypačka Ała Džyhan, altystka Alaksandra Paciemina.
Čytajcie taksama:
Viadomy litoŭski tenar vystupiŭ u Minsku i vyklikaŭ skandał
Litoŭski śpiavak prynios prabačeńni za vystupleńnie ŭ Biełarusi
U Muziei volnaj Biełarusi prezientujuć instalacyju «1525» pra biełaruskich palitviaźniaŭ
U Lajpcyhu pastavili balet pry dapamozie štučnaha intelektu. Upieršyniu ŭ śviecie
Kamientary