Losam «niadobranadziejnych» futbalistaŭ, jakich nie dapuskajuć da ŭdziełu ŭ čempijanacie Biełarusi, zajmajecca kamisija pa palityčnych uciekačach — «Trybuna»
ABFF na čale z novym kiraŭnikom hatovaja dapuścić apalnych spartsmienaŭ da čempijanatu choć ciapier, ale bajacca sami kłuby, bo ich pierapałochała spartyŭnaje načalstva. Tych ža futbalistaŭ, jakija ŭ 2020 hodzie padtrymali pratesty, faktyčna pryraŭniali da palityčnych uciekačoŭ, navat kali jany znachodziacca ŭ krainie, piša «Trybuna».
U čempijanacie Biełarusi pa futbole minuła ŭžo šeść turaŭ, a jak minimum dziesiać hulcoŭ kłubaŭ vyšejšaj lihi pa-raniejšamu siadziać biez pracy i čakajuć rašeńnia kamisii, jakaja pavinna vyznačyć, što ž rabić ź imi — tymi, chto ŭ 2020-m dazvoliŭ sabie vykazacca suprać hvałtu.
Pasiadžeńnie adpaviednaj kamisii ŭsio adkładałasia, choć, pavodle infarmacyi «Trybuny», novy kiraŭnik Biełaruskaj fiederacyi futboła Mikałaj Šarśnioŭ damahajecca viartańnia hulcoŭ na pole bieź jakich-niebudź dadatkovych razboraŭ.
Ale takoje raźvićcio siužetu małavierahodnaje. Da taho ž u im adbylisia novyja pavaroty. Los hulcoŭ pa-raniejšamu pavinna vyrašyć kamisija, ale nie taja, pra jakuju išła havorka raniej.
Jašče zimoj Minsportu zahadała kłubam skasavać kantrakty z hulcami, jakija patrapili ŭ čorny śpis, i da rašeńnia kamisii nie prymać hetych spartoŭcaŭ na pracu. Z taho času futbalisty zastajucca pry svaich kalektyvach, ale mohuć tolki treniravacca. Hulcy siadziać biez pracy ŭžo nie pieršy miesiac.
Tym nie mienš, kłuby i, jak akazałasia, Fiederacyja futboła viaduć pracu pa viartańni spartsmienaŭ u prafiesiju. Jak «Trybunie» ŭdałosia daviedacca, u siaredzinie krasavika ad futbolnych kłubaŭ i ABFF byli nakiravanyja chadajnictvy z prośbaj «pamiłavać» nibyta «niadobranadziejnych» futbalistaŭ.
I budučynia hulcoŭ ciapier zaležyć ad tak zvanaj «kamisii pa razhladzie zvarotaŭ hramadzian Respubliki Biełaruś, jakija znachodziacca za miažoj, pa pytańniach ździajśnieńnia imi pravaparušeńniaŭ» na čale z hienprakuroram Andrejem Šviedam, stvoranaj ukazam Łukašenki ŭ pačatku lutaha 2023 hoda dla taho, kab vyrašać los tych, chto pa palityčnych mierkavańniach pakinuŭ krainu i ciapier choča viarnucca. U jaje składzie — vielmi šmat samych adyjoznych piersanažaŭ łukašenkaŭskaha režymu.
Pry hetym kiraŭnictva fiederacyi ŭžo nibyta navat hatovaje zajavić hulcoŭ u čempijanat, adnak sustrakaje supraciŭ z boku kłubaŭ. Bo ministr sportu Siarhiej Kavalčuk raniej papiaredžvaŭ, što ŭ kłubaŭ mohuć być prablemy ź dziaržpadtrymkaj i nie tolki, kali jany navažacca zaklučyć kantrakty z «niadobranadziejnymi» futbalistami.
Tamu kłuby, niahledziačy na łajalnaść novaha futbolnaha kiraŭnictva, čakajuć rašeńnia kamisii i nie robiać paśpiešlivych krokaŭ. Pry hetym samaje cikavaje, što niekatorym kłubam, niahledziačy na ich «pasłušenstva», dahetul nie padpisanyja płany raźvićcia.
To-bok situacyja vyhladaje nastupnym čynam: kab atrymać dziaržpadtrymku, kamandy skasavali kantrakty z hulcami z «čornaha śpisa», jak i zahadała Minsportu, adnak pa fakcie zaraz nie majuć ni futbalistaŭ, ni hrošaj.
Z momantu zvarotaŭ kłubaŭ, fiederacyi i samich hulcoŭ minuŭ užo amal miesiac, adnak rašeńnie ŭsio jašče nie pryniata. I, jak kažuć krynicy «Trybuny», nieviadoma, kali situacyja vyrašycca.
Pry hetym, jak daviedałasia «Trybuna», śpis «niadobranadziejnych» futbalistaŭ ciapier padzialili pavodle značnaści dla biełaruskaha futboła. Adna katehoryja — tyja, kaho treba viarnuć u čempijanat u pieršuju čarhu, inšaja — hulcy, ź jakimi možna nie śpiašacca.
Jakija futbalisty kudy zaličanyja, pakul daviedacca nie ŭdałosia, adnak abaznanyja ludzi paviedamlajuć, što da «značnych vykanaŭcaŭ» u pieršuju čarhu adnosiać tych, chto najbolš aktyŭna prajaviŭ siabie ŭ patryjatyčnych akcyjach, zdymaŭsia ŭ «pakajannych» videa i apošnija hady vyklikaŭsia ŭ zbornuju Biełarusi.
Pry hetym praktyčna ŭsie, chto zaraz zastajecca ŭ Biełarusi i čakaje rašeńnia kamisii, aktyŭničali ŭ «patryjatyźmie» napakaz. Tamu da «mienš značnych dla biełfutboła» vykanaŭcaŭ, rašeńnie pa jakich moža pačakać, adnosiać, vidać, u asnoŭnym tych «niadobranadziejnych», chto hulaje za miažoj.
Asobnaja situacyja — u Stanisłava Drahuna. U čornym śpisie, jaki jość u rasparadžeńni redakcyi «Trybuny», hety futbalist staić pad pieršym numaram. Usio, zdajecca, idzie da taho, što adzin z najlepšych hulcoŭ čempijanatu zavieršyć karjeru. Damovicca nakont jaho z čynoŭnikami barysaŭskamu BATE nie ŭdajecca, tym bolš što jon nie byŭ zaŭvažany ni ŭ adnoj z «patryjatyčnych» akcyj, u jakich zaśviacilisia mnohija inšyja.
Ci stała praściej zapisacca na polskuju vizu paśla ŭviadzieńnia fotavieryfikacyi? Dośvied čytačoŭ7
Kamientary