ABFF nie viedaje, što rabić z «Šachcioram». A pryniać rašeńnie treba ciaham tydnia

Historyja z padazronymi matčami, na jakija nibyta ŭpłyvaŭ salihorski «Šachcior», kab uskładnić žyćcio svaim supiernikam pa čempijonskaj honcy, nabližajecca da zaviaršeńnia. 

Biełaruskaj fiederacyi futboła ciaham tydnia nieabchodna vyznačycca, ci stymulavaŭ Salihorsk inšyja kamandy finansava, a kali stymulavaŭ, to jakoje pakarańnie za heta pavinien panieści (źniaćcie ačkoŭ, panižeńnie ŭ kłasie, pazbaŭleńnie čempijonskaha tytuła?).

Ciažkaść u tym, što rasśledavańnie viadzie nie ABFF, a Śledčy kamitet. Adpaviedna, fiederacyja znachodzicca ŭ infarmacyjnaj zaležnaści ad hetaj struktury, a samo rasśledavańnie jašče nie zavieršanaje.

Pra što havorka?

27 krasavika rasijski ahient Anton Śmirnoŭ, jaki ŭžo nie pieršy miesiac aktyŭna vajuje z «Šachcioram», paviedamiŭ, što, pavodle jaho infarmacyi, u ścienach Doma futboła adbyłosia pasiadžeńnie pa dyscyplinarnaj spravie, hałoŭnym fihurantam jakoj źjaŭlajecca salihorski kłub. I na hetaje pasiadžeńnie nibyta byli vyklikanyja 28 čałaviek.

Dyscyplinarny kamitet pakul nie pryniaŭ nijakaha rašeńnia, ale miarkujecca, što jon zrobić heta da 4 traŭnia, bo 5 traŭnia «Šachcior» pavinien atrymać (ci nie atrymać) licenziju dla ŭdziełu ŭ jeŭrakubkach. A vydača licenzii zaležyć ad taho, ci budzie pryznanaje čempijonstva Salihorska ŭ siezonie-2022 lehitymnym. Na hety kont isnujuć sumnievy.

Sioleta ŭ studzieni stała viadoma, što «Šachcior» padazrajuć u stymulavańni kamand, jakija sustrakalisia z supiernikami Salihorska ŭ baraćbie za tytuł. 30 studzienia była zaviedziena kryminalnaja sprava na pradstaŭnika «harniakoŭ» za akazańnie ŭpłyvu na vynik matča čempijanata Biełarusi. Proźvišča padazravanaha nie nazyvałasia, ale ŭ toj ža dzień byŭ zatrymany dyrektar kłuba Alaksandr Marčanka (siońnia jon znachodzicca na voli).

Krychu paźniej stali nazyvacca matčy, što akazalisia pad padazreńniem. Sajt football.by kazaŭ pra hulniu pamiž «Biełšynaj» i minskim «Dynama» (0:0) u 19-m tury. Nibyta z boku «Šachciora» babrujskaj kamandzie naležała ŭznaharoda za taki vynik.

Padazronym byŭ i inšy matč — pamiž «Šachcioram» i ŭsio toj ža «Biełšynaj» u zaklučnym tury čempijanatu, kali vyznačaŭsia ŭładalnik zołata. «Harniaki» na dva bały apiaredžvali «Enierhietyka-BDU», jaki paralelna hulaŭ ź minskim «Dynama». «Šachcior» vyjhraŭ 4:1, u tym liku dziakujučy pienalci, jakoje pryvioz napadajučy «šyńnikaŭ» Dźmitryj Homza na 56-j chvilinie.

Pa infarmacyi «Trybuny», i hety matč vyklikaŭ pytańni ŭ łukašenkaŭskich siłavikoŭ. U studzieni 2023-ha Homzu zatrymlivali — jon pravioŭ za kratami dvoje sutak, paśla čaho byŭ vypuščany na volu.

U kancy studzienia zahavaryli pra toje, što «Šachcior» moža być pazbaŭleny čempijonstva, a załatyja miedali ŭ takim vypadku pieradaduć «Enierhietyku-BDU».

Uviesnu źjaviłasia infarmacyja, što za «Šachcioram» padazrajuć piać dziŭnych matčaŭ. Čatyry z ich nibyta źviazanyja sa «stymulavańniem»: u siezonie-2022 — «Enierhietyk-BDU» — «Dynama-Minsk» (1:3), «Biełšyna» — «Šachcior» (4:1), «Dynama-Minsk» — «Enierhietyk-BDU» (1:4), «Dynama-Brest» — «Dynama-Minsk» (0:0). Taksama ŭ spis uvajšoŭ matč siezona-2021 — «Viciebsk» — BATE (0:0).

Pavialičyć

Što adbyvajecca ciapier?

Nie tak daŭno vydańnie «Presboł» paviedamlała, što ABFF čakaje infarmacyi ad siłavikoŭ, kab potym raźbiracca z udzielnikami padazronych matčaŭ. Jak udałosia daviedacca «Trybunie», sprava pa-raniejšamu ŭ Śledčym kamitecie, a fiederacyja futboła da jaje dačynieńnia pakul nie maje, jak i nie maje dostupu da detalaŭ rasśledavańnia.

«Trybunie» ŭdałosia parazmaŭlać z pradstaŭnikami ŭsich kłubaŭ, jakija fihurujuć u śpisach «padazronych» matčaŭ. Jak zapeŭnivajuć surazmoŭcy, nichto z futbalistaŭ albo trenieraŭ 27 krasavika na pasiadžeńni dyscyplinarnaha kamiteta, što prajšło ŭ ABFF, nie jeździŭ. Treniroŭki prachodzili ŭ štatnym režymie, usie byli na miescach. Kali chtości i pryjazdžaŭ u fiederacyju, to tolki kłubnyja kiraŭniki. Havorka ab pradstaŭnikach «Šachciora», bresckaha «Dynama», «Enierhietyka-BDU». Minskaje «Dynama» žyło ŭ čaćvier zvyčajnym žyćciom.

Što da «Viciebska», to, jak zapeŭnivajuć ludzi, znajomyja ź situacyjaj, ničyjny pajadynak z BATE ŭ siezonie-2021 bolš nie vyklikaje pytańniaŭ. Pradstaŭnikoŭ kamand užo nichto nie turbuje.

A voś u dačynieńni da spartsmienaŭ i funkcyjanieraŭ inšych futbolnych kalektyvaŭ na praciahu apošnich miesiacaŭ śledčyja aktyŭničali. U SK, a taksama ŭ ABFF dla dačy tłumačeńniaŭ (dla hetaha i ŭ Dom futboła zaprašalisia siłaviki) jeździli nibyta byłyja i ciapierašnija hulcy i «Šachciora», i «Enierhietyka-BDU», i «Biełšyny», i bresckaha «Dynama», i navat minskaha. U praces byli ŭciahnutyja i kiraŭniki kłubaŭ. Na dadzieny momant rasśledavańnie nie skončana.

Da čaho ŭsio moža pryvieści?

A voś tut cikava. «Trybuna» parazmaŭlała z mnohimi pradstaŭnikami biełaruskaha futboła, jakija tak ci inakš źviazanyja ź situacyjaj i vałodajuć peŭnaj infarmacyjaj. Nichto z surazmoŭcaŭ nie moža navat vykazać zdahadku, jak u vyniku ŭsio pavierniecca. Bolš taho, navat u ABFF nie ŭjaŭlajuć, što rabić z čempijonstvam «Šachciora» — vypadak biesprecedentny. Inšyja surazmoŭcy pierakananyja, što pazbaŭlać załatych miedaloŭ kamandu nie buduć — maksimum zdymuć punkty ŭ čempijanacie.

Što da hulcoŭ, jakija zamiašanyja ŭ spravie, to, pavodle źviestak «Trybuny», dla niekatorych ź ich usio moža paviarnucca praciahłymi dyskvalifikacyjami. Pryčym ludzi, jakija znajomyja ź situacyjaj, niaredka vykarystoŭvajuć słova «zdača», a nie «stymulavańnie». U vyniku, jak havorać surazmoŭcy, vialikaja vierahodnaść, što niekatoryja spartsmieny atrymajuć navat pažyćciovaje adchileńnie, i razmova nie pra adnaho-dvuch futbalistaŭ.

Tak ci inakš, raźviazki zastałosia čakać prykładna tydzień.

• 3
• 0
• 10
• 4
• 3
• 0
• 5
• 0